الموضوع: حد لية فى البورصة؟

المشاركة الأصلية كتبت بواسطة mmtronic

بص يا سيدى

انا حقولك شويه نصائح صغيره كده و ربنا يكرمك بس أبقى افتكرنى و ادعيلى

١. المبداء الاول - متتطمعش - مهما كانت الإغراءات - أوعى تطمع

٢. محفظتك الى حتفتحها علشان تشترى منها ابداء ب ١٠٠٠٠ جنيه الاول بس و بقولك بس و مستمعي كلام اى حد يقولك و يغريك ( المبداء ١ ) و لما تفهم الدنيا ماشيه اذاى تقدر تذودها الى حد أقصى ٣٠٠٠٠ الف و بقولك أقصى ( مبداء ١ ) مهما كانت المغريات و كلام الناس

٣- حتختار شركه من الى شغالين اون لين بمعنى بتمضى معاهم عقد و يفتحلك المحفظه و انت بنفسك بتباشر أوامر ألبيع و الشراء من خلال الموقع بتاعتهم على النت و انت من اى حته فى مصر و تحولهم كمان الفلوس من البنك لو ليك حساب إنترنت بنك

٤. قبل ما تعمل الى قولتلك عليه فوق لازم تتابع حركه الأسهم على الأقل ٣ شهور - ليه - علشان تعرف الحيز السعرى الى بيتحرك فيه السهم علشان تعرف إمتى تشترى السهم و إمتى تبيعه و ممكن تجرب تتابع من موقع arab finance موقع بسيط و سهل

٥. بعد ما عينك تاخد على بعض الأسهم و تعرف من متابعتك الحيز السعرى بتاعتهم ممكن تبداء تشترى لما الأسهم الى انت متابعها تنزل فى السعر علشان تبيعها لما ترفع شويه و إياك و الطمع - لما تلاقى السهم كسب معاك بيعه حتى لو المكسب معقول و مش كبير قوى - مبداء ١

٦. أشتغل بس بفلوسك الى فى المحفظه - معاك اشترى ممعكش يبقى ميلزمكش - لا تدين و لا ناخد من شركات السمسرة كريديت مهما كانت المغريات - مبداء ١

٧. اخر حاجه - متفتكرش ان ممكن تعمل دخل ثابت من البورصه - ممكن تكسب ٣ شهور و را بعض و ممكن تقعد ٦ شهور مش عارف تشترى ( مش لاقى فرصه أسهم )

بالتوفيق بس أبقى ادعيلى و أوعى الطمع مهما كانت المغريات و تذكر ان السوق ده مليان ناس معندهاش ضمير -خليك مع نفسك كده و أمشى براحه وواحده واحده

متشكر جدا لنصائح حضرتك طبعا
انا فعلا هفتح بمبلغ صغير فى البداية لحد ما افهم الدنيا كلها
وطبعا الطمع مش ف الحسبان لانى عارف البورصة ومش ناقصة الواحد يخسر حتى لو الف جنية
بالنسبة لمتابعة الاسهم فوالدتى ليها سنتين فى البورصة وطبعا بتعمل متابعة للاسهم فهتفيدنى فى النقطة دى

المشاركة الأصلية كتبت بواسطة dodge2013

الراجل ده بيقول كلام زي الفل

وخصوصا رقم 7 ممكن ربنا يكرمك كام شهر وتيجي تتزنق في سهم شهرين تلاته او مش لاقي فرص
وتفضل كده 3 شهور بدون اي ربح من البورصه

لو المبلغ صغير تحت ال 50 الف جنيه فا مش حيجيب تمن التعب والمتابعه حطهم وديعه اضمن او في اي مشروع.... لو 100 الف وطالع انصحك
بس بعد اكتساب خبره والافضل طبعا التجاره في اي مشروع مضمون او تشتري عقار وتأجره
وقته مع الوقت بيزيد وبيجبلك عائد شهري مضمون والريسك يكاد يكون 5 %

انما البورصه فيها ريسك وريسك كبير للمبتدأ

طبعا المبلغ المبدئى اقل بكتير من 50 الف لانى لسة جديد
لكن ممكن فى المستقبل لما افهم الدنيا اوى ازودة

المشاركة الأصلية كتبت بواسطة ahmed4000

البورصة ممكن تعملك مكاسب كويسة جدا لو اجدتها
وممكن تعملك خسائر كبيرة لو دخلت وانت مش فاهم حاجة
نصيحتى جرب برنامج اسمه
stock riders
ده برنامج بيدربك على الاستثمار فى البورصة برنامج محاكاة على اسعار الاسهم بالظبط
اقعد على الاقل 3 شهور اشتغل بالبرنامج ده
ومهما كسبت عليه اوعى تدخل فلوس عادية (اتحكم فى عواطفك)

بعد كده افتح حساب حقيقى ولو معاك 30 الف مثلا متدخلش بيهم كلهم مهما كسبت الا بعد شهور على الاقل
يعنى ابدا تدريجيا

نصيحتى ملكش دعوة بالسمسار ولا بنصايحه

برده متعتمدش على رؤيتك فى الامور...ذاكر الاول تحليل فنى كويس وحاول تطبقه

لو مش حتعرف تعمل الكلام ده كله يبقى روح على اى بنك واشترى وثائق صندوق استثمار فى البورصة

والبنك حيستثمر فى البوصة بالنيابة عنك

ولو الدنيا متحسنة حتلاقى نفسك بتحقق مكسب معقول

متشكر جدا لنصائح حضرتك
انا فعلا مش هغامر فيها
هدخل بمبلغ قليل فى الاول اتعلم بيه
ومش هطمع مع اى مغريات نهائى
هحمل البرنامج الى قلت علية اشتغل عليه فترة واشوف
وبالنسبة للمتابعة فانا عامل متابعة لاسهم معينة من مدة

متاااابع

المشاركة الأصلية كتبت بواسطة mody112

بص يا ريس البورصة دى زيها زى اى تجارة فيها المكسب وفيها الخسارة بس للاسف كل الناس اللى بتبقى داخله البورصة لاول مرة مبتحطش فى حساباتها خاااااااالص موضوع الخسارة ده بتاتا وعشان كده بتضرب ضربة جامدة قوى .
ولازم تعرف ان البورصة دى بتاعت الحيتان زى اى تجارة برضه وانت مش هتعرف تاخد من الحيتان حاجة الا بان منهم ( يعنى انت يادوب هتركب الموجة معاهم مش تعوم ضد التيار ) .
للاسف الناس اللى بتخش لاول مرة البورصة على السمع وبتبقى رسمه الاحلام الوردية وانها هتعمل 100*100 من فلوسها فى اسبوع وهتركب مرسيدس وهتشترى التوروماى وكده ومع اول عملية بتكسب فيها تقوم رايحة جايبة كل فلوسها وتحطها فى البورصة ( فاكرة ان تحت القبة شيخ ) وطبعا مش فاهمة اى حاجة وهوب ضاعت فلوسك يا صابر .
1 - هقولك على نصيحة طالما انت لسه مبتدأ اشترى ياما فى اكتتاب ( بمعنى شركة لسه جديدة وهتنزل فى البورصة ) او اشترى فى المصايب بمعنى انك تشترى فى عز ما الناس شايفة الدنيا سودة وكله بيبيع وفى ثورة او حرب او اى حاجة من الحاجات دى صدقنى ( عن خبرة 10 سنين فى البورصة ) هو اده اكتر وقت الناس بتعمل فيه فلوس .
2- البورصة مبتحبش الغباوة ( يعنى متتغاباش مع السوق يعنى بلاش عند فى البورصة يعنى بيبقى فى حاجة اسمها نقاط دعم ومقاومة لكل سهم وانت لازم تحط سعر معين لو طلع تعمل جنى ارباح عنده ولو نزل تعمل ايقاف خسائر عنده ( وبلاش طمع ).
3 - فى تقارير فنية بتعملها الشركات الكبيرة والمحللين حاول تطلع عليها وتفهمها كويس .
4 - فى مواقع خاصة بالبورصة والشركات لازم تدخل عليها باستمرار واشهرهم موقع اسمه ( مباشر ).
5 - الفلوس اللى بتحطها فى البورصة لازم متكنش باكى عليها يعنى لا قدر الله لو خسرتها ميحصلكش صدمة .
6 - لازم تعرف ان كل شىء نصيب وان رزقك مقدر ومكتوب سواء بالبورصة او غيرها .
7 - ابعد عن الشركات ذات الانشطة المشبوهة عشان الحرمانية وكذلك البنوك .
8 - اى استفسار تحت امرك .

متشكر جدا لنصايح دى وفعلا انا مقرر اعم الى انت قلته عليه :)