الموضوع: قنبله عند مدرسه ابنى.. ورد فعل ابنى الصغير ايضا

المشاركة الأصلية كتبت بواسطة طارق _عبد السلام

السلام عليكم ورحمه الله

برجاء ومن فضلكم انا بعرض موقف اجتماعى ممكن يحدث لنا كلنا ومش عايز اشوف موضوعى ده فى مستنقع السب الشماته والتريقه

النهارده يعتبر تانى يوم دراسه عندنا فى المحله ... بعد ذهاب ابنى الصغير فى الصف الاول الابتدائى للمدرسه ومعروف ميعاد خروج المدرسه فوجئت بالجرس بيرن اتكلمت فى الانتركم وبقول مين قبل مايقول لى افتح يابابا ..لقيته بيقولى مش هروح المدرسه تانى علشان الارهابيين .. حطولنا قنابل فى المدرسه فضحكت ومهتمتش وقلتله اطلع انا فى دماغى ان الولد بيخترع لانه من امبارح بيقولى المدرسه وحشه ومش عايز اروح تانى ..طلع لقيته بينهج وعمال يقولى قنبله يابابا اتصلت بناس ولادهم مع ابنى لقيت فعلا البلد هايجه والاهالى راحوا المدرسه والدنيا مقلوبه.. قعدت اهدى ابنى واقول له مفيش حاجه من الكلام ده وكده ..
قلقت جدا فقلت ادخل على الفيس بوك افتح شبكه اخبار المحله.. لقيت الموضوع حقيقى والبلد مقلوبه واحنا ولا كأننا موجودين فبطمن ام ولادى على ابننا الكبير فى الثانوى وعرفت فعلا ان فيه قنبله انفجرت جنب مدرسه احمد عرابى عند الحى... فافتكرت ان مدرسه ابنى جنب نفس المدرسه قدام الحى على طول.. بتصل بابنى وبكلم نفس وبقول القنبله قدام مدرسه الولد .. امه طبعا مريضه وملهاش اى ضغط عصبى طبعا ربنا اللى عالم بيها دلوقتى.. اتصلت على الولد قالى احنا مشينا من المدرسه وانا راجع هقولك ايه اللى حصل طبعا جاء لى بسلامه الله وقال واحنا فى اليوم الدراسى عادى جدا لقينا انفجار لدرجه ان حسيت ان المدرسه بتقع وبتترج وبعدين نزلونا من المدرسه بسرعه وكان فيه هرج جامد ونزلنا تحت وبعدها جت الشرطه

طيب المطلوب مننا كآباء نعمل ايه دلوقتى .. المفروض نخاف .. ونترعب ( وده حاصل فعلا خوف على اولادى ) ولا نعمل ايه الكبير بيقولى حولنى منازل.. والصغير خايف يروح المدرسه مفتكر ان كل يوم هيكون فيه قنابل

الله يلعن الارهاب ويلعن من يمولوه... انا بجد قمه فى القلق على اولادى ... يارب اللهم اهلك الظالمين بالظالمين واخرجنا من بينهم سالمين

ربنا يحفظ اولادى واولادكم يارب وماحد يعيش لحظه الرعب والقلق دى

الحمد لله أولا وأخيرا علي سلامة الأولاد............ وعايز أقول لحضرتك انه ايا من كان المتسبب في هذه الأفعال (فدع الخلق للخالق .......... ويمكرون ويمكر الله والله خير الماكرين)...... فهذا هو الهدف الذي يريده هذا الكائن وهو ارباكنا وايقاف ساعة الحياة وارجاعها للخلف وهذا ان شاء الله لن يكون ........ واعلم انه ما شاء الله كان وما لم يشأ لم يكن ولاحول ولا قوة الا بالله العلي العظيم......... توكل علي الله واكمل مسيرتك مع ابنائك ولا تخف فمن يتوكل علي الله فهو حسبه ........... وقل ربي أدخلني مدخل صدق وأخرجني مخرج صدق واجعل لي من لدنك سلطانا نصيرا...........