مشكلة مع جار عامل مزرعة كلاب في مكتبه في العمارة

**A_H_M_A_D** · 22-09-2014 11:21 AM

المشكلة كالأتي :

لي جار واخد شقة صغيرة إيجار قديم في الدور الأرضي في العمارة اللي انا ساكن فيها , كانت زمان عياده و حاليا المفروض انها مكتب مش شقة سكنية , وبابها بيفتح على مدخل العمارة الرئيسي من جوه

هو أساسا واخد شقه تانيه في عمارات العبور تقريباً , وكان بييجي كل يوم يقعد في المكتب ده يدعبس في شوية عدة قديمة كده لأنه هو عميد جيش متقاعد و سنه كبير , بس غاوي يقعد يصلح في أي حاجه قديمه و غسالات و تلاجات و كلام من ده

مرة واحده من حوالي 6 شهور كده طلعت في دماغه يربي كلاب , بس واضح انه مش واخد الموضوع تربيه للهواية لأ ده بيربيهم كتجارة , اشترى كام كلب صغير و كلبين كبار , الكلاب الصغير (حوالي 4) كبروا دلوقتي وبقى شكلهم مرعب

المشكلة بقى في انه بيسيب باب المكتب مفتوح و يحط شبكه معدن عشان الكلاب متطلعش بس المكتب بتخرج منه ريحه بشعة جداً ولا كأنها زريبة , يمكن ريحة الزريبة أرحم من ريحة الكلاب بتاعته , وريحة الفراخ الميته اللي بيطبخهلهم , والريحة بتنتشر في العمارة كلها

ده بالإضافة للرعب اللي عاملة للمدام و الولاد و هم طالعين أو نازلين , بقوا يخافوا يعدوا من قدام باب مكتبه اللي سايبه مفتوح علطول من منظر الكلاب الضخمه المرعبه

وكمان بالإضافة لبلاعة العمارة اللي بتتسد كل شوية نتيجة رميه لمخلفات الكلاب دي فيها

ومدخل العمارة اللي علطول بقى مزبلة بسبب المية الوسخة اللي خارجه من عنده

المهم ...

حاولت أكلمه بالحسنى مفيش فايده , بيقولي انا حر اعمل اللي انا عايزه في شقتي , وراجل في منتهى قلة الأدب و السفالة رغم سنه الكبير

انا عايز نصايحكم و تجاربكم المماثلة مع الأشكال دي , إيه التصرف السليم اللي أقدر أعمله معاه ؟

مع العلم إن اسلوب التفاهم و الإقناع مش جايب معاه أي نتيجة ولازم يكون فيه أسلوب تاني عن طريق جهة رسمية مثلاً

**amr011111** · 22-09-2014 11:52 AM

بالتأكيد مش انت بس اللى بتعانى من الموضوع ده فحاول تجمع السكان وتشوفوا حل

**DODGE2013** · 22-09-2014 12:11 PM

اعمله محضر في الشرطه وخلاص

**A_H_M_A_D** · 22-09-2014 12:15 PM

المشاركة الأصلية كتبت بواسطة amr011111

بالتأكيد مش انت بس اللى بتعانى من الموضوع ده فحاول تجمع السكان وتشوفوا حل

للأسف بقية السكان سلبيين جداً

المشاركة الأصلية كتبت بواسطة dodge2013

اعمله محضر في الشرطه وخلاص

ده اللي أنا بفكر أعمله فعلاً , بس مش عارف هايجيب نتيجة ؟

**hdmrdash** · 22-09-2014 12:18 PM

مع قليل الزوق مفيش حل

الحل انك تروح لمربي كلاب وتطلب منه الحل

بس كده

**أحمد صبرى** · 22-09-2014 12:22 PM

يعني حضرتك عايز منه إيه؟
يخلي الباب مقفول ولا ميربيش كلاب خالص؟

**A_H_M_A_D** · 22-09-2014 12:28 PM

المشاركة الأصلية كتبت بواسطة hdmrdash

مع قليل الزوق مفيش حل

الحل انك تروح لمربي كلاب وتطلب منه الحل

بس كده

معلش مفهمتش قصد حضرتك , ياريت توضحلي؟

المشاركة الأصلية كتبت بواسطة أحمد صبرى

يعني حضرتك عايز منه إيه؟
يخلي الباب مقفول ولا ميربيش كلاب خالص؟

أكيد مش الطبيعي ان في عمارة سكنية يتعمل مزرعة كلاب و بالشكل اللي انا بوصفه ده

يمكن لو فضل مخلي الباب مقفول ده يحل جزء من المشكلة , بس هو لازم بيفتحه عشان يهوي الشقة على حساب قرفنا احنا

**Ghamrawy** · 22-09-2014 12:28 PM

سم الكلاب

**احمد المصرى** · 22-09-2014 12:48 PM

اعتقد ان سم الكلاب هيحل المشكله بس مش عارف حلال ولا حرام فى الحاله دى بس فعلا الناس بقوا ولاد كلب واحد بيربى كلام فى شقه سكنيه بس السؤال هل هو يرضى يعيش فى العماره دى والكلاب موجوده ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟