حماتى ومراتى والشقه

**hamada sayed** · 24-09-2014 01:43 PM

حماتى ومراتى والشقه
مش عارف ابتدى الموضوع منين بس الاهم انا عاوز نصيحه لوجه الله
انا متجوز من اربع سنين تقريبا جواز صالونات
وربنا كرمنى بطفل
البدايه كانت ان الشقه معجبتهومش عشان صغيره وكمان المدينه بعيده عن سكنهم
بعد رفضى انى اغير الشقه تم الغاء الموضوع وبشكل رسمى عن طريق اتصال تيليفونى وبعد كده بفتره فضلت افكر انى ليه مغيرش الشقه (لآنى بصراحه اصلا مكنتش حابب الشقه من ساعه ما اشترتها لكن اشترتها عشان سعرها وقسطها القليل جدا )
فعلا فكرت وقررت اغير الشقه مع نفسى وكلمتهم بعديها وعرفتهم انى قررت ابيع الشقه
الناس فرحت جدا وقلتلهم نبيع وندور بقى مع بعض
فى نفس يوم بيع الشقه تم الاتفاق على موعد قراءه الفاتحه بعدها بأسبوع تقريبا
المهم بعد تدوير كتير ولف اكتر ملقتش اى حاجه مناسبه للسعر اللى معايا
المهم عرضو عليا عرض انى ادفع الفلوس اللى معايا فى الشقه وهما يدفعو النص التانى ويتم كتابه الشقه مناصفه بينى وبين زوجتى
رفضت الموضوع رفض تام
وكان من ضمن الاقتراحات نبنى شقه فى نفس عماره حمايا وطبعا برضو يبقى ليها جزء من الشقه الموضوع ده منفعش
الفلوس اللى كانت معايا قبل بيع الشقه يدوبك على قد الشبكه والعفش (والشقه كانت شبه متوضبه؟)
المهم اتفقنا ان اخد قرض من البنك بجزء من المبلغ وهما هيدفعو تمن العفش كله على ان اتم سداده بعد انتهائى من القرض
وكمان اخدت منهم مبلغ تانى (تم سداده تقريبا ) خلال السنتان الاولى من الجواز
انا كنت شغال شغلنتين صباحا ومساء ونظرا لظروف البلاد تم اغلاق الشركه بتاعه المساء ودى اللى كنت معتمد على مرتبها فى سداد الديون ومفيش شغل تانى خالص
انا بقالى كده حوالى سنه ونص مش بسدد اى مبلغ عليا لآى حد
المهم هما عيزين ايه بقى دلوقتى ؟؟ عايزين اكتب الشقه مناصفه بينى وبين مراتى (الموضوع ده اتفتح حوالى ثلاث مرات بشكل عير رسمى خلال السنتان اللى فاتو ) الموضوع طبعا اصلا من حماتى اللى شغاله فى الهرى ده وبنتها دلوقتى عائمه على عومها
لكن المره دى كان بشكل رسمى مع العلم ان المبلغ اللى عليا ميجيش حتى ربع تمن الشقه
رفضت الموضوع واعلنته لزوجتى وقلت هتصرف فى الفلوس طالما الموضوع كده
انا صح ولا غلط ؟؟
موضوع كتابه الشقه دى للزوجه ولو حتى بالنصف بالنسبه ليه شيء مش بلعه تماما

**canner** · 24-09-2014 02:00 PM

موضوع انى اكتب او ادى حاجة لمراتى تبقى انا اللى عاوز كده مش بسبب ضغط بس المشكلة اللى انت بتقول عليها ليها ابعاد تانية

واضح انهم قلقوا على اللى ليهم علشان كده عملوا كده بس مش هى مراتك مش عايشة معاك و شايفة الظروف اللى بتمروا بيها و لا انت عملت حاجة قلقتهم منك؟

**hamada sayed** · 24-09-2014 02:06 PM

المشاركة الأصلية كتبت بواسطة canner

موضوع انى اكتب او ادى حاجة لمراتى تبقى انا اللى عاوز كده مش بسبب ضغط بس المشكلة اللى انت بتقول عليها ليها ابعاد تانية

واضح انهم قلقوا على اللى ليهم علشان كده عملوا كده بس مش هى مراتك مش عايشة معاك و شايفة الظروف اللى بتمروا بيها و لا انت عملت حاجة قلقتهم منك؟

معملتش اى حاجه بالعكس همى بحبونى جدا (اعتقد هيتغير )وعارفين قد ايه انا شايلها جو عنيا
مراتى بدأت هى كمان مش قادره تستحمل الذنقه الماليه اللى احنا فيها من غلو اسعار ومع عدم زياده فى الراتب من ايام الثوره (قطاع خاص بقى )

**MaZaGAngeE** · 24-09-2014 02:20 PM

الازمة المادية دي مشكلة كلنا عايشينها
و مطولة و هتزيد السنتين اللي جايين
لو مكانك همسك ابوها و ابلغه ان ينسوا كلهم حكاية الشقة و ان فلوسه هياخدها حين ميسرة و لو مش عاجبه ياخد بنته في ايده و هوه نازل
و اطمن اللي زي ده الجنيه اهم من ولاده عنده و الموضوع ده مش هتسمع عنه تاني.
لو عاند معاك و خدها مش هيستحمل اكتر من شهر لو انت منعت عنها الفلوس و هيبعتولك اي حد عشان تاخدها

**elpilot** · 24-09-2014 02:27 PM

لازم الشدة مع الناس دي كفاية دلع بقي علشان دول كده بيستهبلوا وعاملين يجرجروا رجلك عشان توافق تكتبلهم نص الشقه
انصحك لو انا مكانك هحط النقط فوق الحروف واللي هيحاول يستغلني او يستغل ظروفي هعلمة الأدب إذا لم تتذأب أكلتك الذئاب

**hamada sayed** · 24-09-2014 02:31 PM

هما مش محتاجين الفلوس دى على فكره
بس هما بيقولوا طالما انت كده كده مش هتدفعهم خلاص نظرا لآزمه الماليه وكمان مرض طفلى اللى هيطول سنين تكتب نص الشقه عشان يكون ضمان لمستقبل البنت وكمان عرفان منى بالجميل بتاعهم
الموضوع فى الاساس برعايه حماتى

hh · 24-09-2014 02:55 PM

متسمعش كلام الناس اللي بتسخنك. الناس شاريينك من الأول و ساعدوك بالفلوس مرة و اتنين زي ما انت قلت يعني مش طمعانين فيك و لا حاجة, بس في الأول و الأخر هما شايفين ان طالما فلوسهم مش حترجع يبقى يضمنوا انها لبنتهم, أظن ده حقهم.

أعتقد ان الحل انك تشوف الفلوس اللي دفعوها كانت تساوي نسبة قد ايه من تمن الشقة (وقت الشراء) و تكتب لمراتك النسبة دي من الشقة مش النص. بالطريقة دي انت رجعتلهم حقهم و الجميل اللي عملوه فيك و في نفس الوقت انت مالك للنسبة الأكبر من الشقة و بالتالي تملك التصرف فيها براحتك يعني مفيش داعي انك تحس انك مش بالع الموضوع زي ما قلت.

نصيحة أخيرة, طالما الناس كويسين و انت معاشر بنتهم بالمعروف متنشفش دماغك عالفاضي لأن لو فكرت فيها بالعكس لو أختك مثلا اللي في موقف مراتك كان حيبقى ايه رأيك في جوزها اللي مقدرش مساعدتك ليه في الأول؟

**الاستاذ** · 24-09-2014 02:58 PM

خلاص اكتب بالفلوس الى ليهم وصلات امانة ودة يحفظ حقهم

**fepsceasar** · 24-09-2014 03:14 PM

على قد ما فهمت لو هتسد ديونك وتكتب نص الشقة باسم مراتك .. مش مشكلة
هو الموضوع فى شبهة استغلال بس احسن حل لو مش لاقي حد يسلفك
وكمان هتطمنهم انك مش طمعان