الموضوع: هل لا يزال مترو الأنفاق بديل للسيارة؟

مهما كان المترو لسه وسيله سريعه ومضمونه

أنا ساعات باروح الشغل مع زمايلي بعربياتهم وأنا راجع باسيبهم وأركب المترو لما أكون مستعجل، أي نعم هو زحمه وقرف بس إلى حد ما تقدري تظبطي مواعيدك لما تركبيه وهايكون هامش التأخير مش كبير أوي.

المشاركة الأصلية كتبت بواسطة OlaOsman

يااااااااااااه.. المترو ده أول ما عملوه كان عامل زي السحر.. نضافة و نظام و مواعيد تظبط عليها ساعتك و روقان و ممنوع الشحاتين و ممنوع الباعة الجائلين اللي بيرموا بضاعتهم على حجر اللي قاعدين رزالة كده و مافيش حاجة اسمها حد يبلطج على حد و يعدي وراه من الماكنة من غير استئذان و كان اللي بيرمي حاجة ع الأرض كان بيدفع غرامة 10 جنيه.. كان حاجة كده كنا حاسين انها مش هاتستمر كتير.. و قد كان

بجد بجد.. قلبي مع كل اللي بيضطروا يستخدموه في مشاوريهم اليومية.

دا لما كانت متولية ادارته شركة فرنسية
انما من ساعة ما المصرين تولوا الادارة والعملية بقت زي ما حضرتك شايفة يا باشمهندسة
بس نرجع ونقول لسة المترو ارحم من قرف الطريق. على الاقل التأخير مش هايبقى كبير.
يعني انا ساعات باروح من حلوان للتحرير. افضل اركب المترو اللي ضامن انه هايوصلني في نص ساعة افضل ما اروح بالعربية في ساعة او ساعة ونص

المشاركة الأصلية كتبت بواسطة OlaOsman

انا عن نفسي بطلت استخدمه من فترة حتى قبل ما أجيب العربية.. حسيته أداة تعذيب مش وسيلة مواصلات المفروض انها بتريح الواحد من اللي بيحصل فوق الأرض.

+1

لكن ساعات برضه بينفع

المشاركة الأصلية كتبت بواسطة OlaOsman

يااااااااااااه.. المترو ده أول ما عملوه كان عامل زي السحر.. نضافة و نظام و مواعيد تظبط عليها ساعتك و روقان و ممنوع الشحاتين و ممنوع الباعة الجائلين اللي بيرموا بضاعتهم على حجر اللي قاعدين رزالة كده و مافيش حاجة اسمها حد يبلطج على حد و يعدي وراه من الماكنة من غير استئذان و كان اللي بيرمي حاجة ع الأرض كان بيدفع غرامة 10 جنيه.. كان حاجة كده كنا حاسين انها مش هاتستمر كتير.. و قد كان

لأن الإدارة كانت فرنسية في الأول وكانت الصيانة بتاعته بتتعمل في مواعيدها وبتتعمل صح (عشان كده عمرة ما كان بيعطل في الأول) وكان مواعيده مظبوطة

لكن بمجرد ما مدة العقد انتهت مع الشركة الفرنسية ووزارة النقل تسلمت مسئولية الإدارة والحال بقى زي مانتوا شابفبن كده

وعلى فكرة في الأول المترو كان تابع لسكك حديد مصر وهية اللى أدارته لفتر مش كبيرة وبعد كده اتعمل هيئة مستقلة وبرضه مافيش فايدة

والسبب في كده ان احنا بند الصيانة عندنا حاجة عيب وإذا اتعمل بيتعمل بشغل طلسقة وخلاص لأن مافيش رقابة على الجودة وفي فساد وما فيش ضمير و... و... الخ غير طبعا ان في عربيات كتير عمرها الإفتراضي خلص ومابتتغيرش ومش هاتتغير ( لأن طبعا مافيش فلوس للتغيير عشان المترو أكيد بيخسر )

إحنا البلد الوحيدة اللى مرافق النقل العام فيها بتخسر رغم عدد التذاكر المهول اللى بيتقطع يوميا واللى بيكون أزيد من المعدل اللى أكيد كان متوقع في دراسة جدوى المشروع لما الفرنسيين عملوه وبرغم ان إحنا مابنصرفش على بنود الصيانة والنظافة والتجديد زي ماهمة كانوا بيصرفوا (لكن همة كانوا بيكسبوا واحنا بنخسر!!)

المشاركة الأصلية كتبت بواسطة solycar

من 3 ايام ماتت بنت فى المترو بسبب انو مشى بيها 60متر ( رجليها جوة المترو و جسمها برة )

مش هاقدر اقول غير حسبي الله ونعم الوكيل
انا لسة شايف الموضوع ده مش شوية في برنامج 90 دقيقة
البنت عمرها 25 سنة. وهية نازلة من القطار الباب قفل على رجليها
والقطر مشي بيها 150 متر وفصل ايديها ورجلها وراسها عن جسمها
يعني قطعها حتت. الموضوع ده في محطة حدائق المعادي
المفروض ان فيه صفارة انذار بتفضل شغالة لغاية ما كل الابواب تغلق تماما ومش مسموح للسائق انه يتحرك والصفارة ديه شغالة. طبعا اكيد الصفارة مش شغالة من اصله
ثانيا المفروض ان فيه مرآة في مقدمة القطار يستطيع السائق من خلالها انه يشوف الرصيف بالكامل
ثالثا بيكون فيه مساعد للسائق موجود في نهاية القطار

يعني البنت ديه ما ماتتش ديه اتقتلت نتيجة اهمال سائق وادارة وعمال صيانة
حسبنا الله ونعم الوكيل