هل لا يزال مترو الأنفاق بديل للسيارة؟
هو لسه الناس بتعتبر مترو الأنفاق كوسيلة مواصلات أفضل من استخدام السيارة الخاصة زي ما كان زمان؟ أصلي شايفاه ما بقاش نافع أي حاجة خالص، و خصوصا خط المرج حلوان و مشاكله كترت أوي بطريقة بتهدد بكارثة :dupe:
كل يوم و التاني تيجي زميلتنا متأخرة الشغل الصبح عشان المترو اتعطل.. أو وقف في محطة السادات ربع ساعة بدون سبب مفهوم.. أو اتأخر اوي فالناس اتكربست على المحطة فاضطرت تفوت متروهين عشان تعرف تركب. انا عن نفسي بطلت استخدمه من فترة حتى قبل ما أجيب العربية.. حسيته أداة تعذيب مش وسيلة مواصلات المفروض انها بتريح الواحد من اللي بيحصل فوق الأرض.
يااااااااااااه.. المترو ده أول ما عملوه كان عامل زي السحر.. نضافة و نظام و مواعيد تظبط عليها ساعتك و روقان و ممنوع الشحاتين و ممنوع الباعة الجائلين اللي بيرموا بضاعتهم على حجر اللي قاعدين رزالة كده و مافيش حاجة اسمها حد يبلطج على حد و يعدي وراه من الماكنة من غير استئذان و كان اللي بيرمي حاجة ع الأرض كان بيدفع غرامة 10 جنيه.. كان حاجة كده كنا حاسين انها مش هاتستمر كتير.. و قد كان :ANSmile23:
بجد بجد.. قلبي مع كل اللي بيضطروا يستخدموه في مشاوريهم اليومية.