السلام عليكم
بصراحة شكل m12 عجبني جدا بس مش لاقي معلومات عنها كتير
من حيث الاعتمادية وقطع الغيار متوفرة ولا لا
شكرا
عرض للطباعة
السلام عليكم
بصراحة شكل m12 عجبني جدا بس مش لاقي معلومات عنها كتير
من حيث الاعتمادية وقطع الغيار متوفرة ولا لا
شكرا
يا باشا الصينى كلة زبالة
و ال m12 دى مع واحد صاحبى
شكلها حلو من برة
بس عربية ورق .. و تحس انها من جوة بلاستك اعادة تصنيع
بلاش صينى خالص
شوفلك فيرنا ولا لانوس
و بالتوفيق
مع احترامي لشخص استاذ هشام اللى رد قبلي: ام 12 بلاستيك اعادة تصنيع وبلاشها.. هو حضرتك فعلا جربتها؟.. مستحيل اتخيل حد ساق العربية دي ويقول عليها كده.
باختصار العربية ممتاااااازة مقارنة بسعرها..
انا معايا اسبرانزا 516 اصلا.. لكن ال m11 "اخت m12 بس بشنطة" معايا لظروف ما بقالها شهر.
عربية طيارة اداء وثبات ونعومه وجري ماشاء الله مع ان حالتها متوسطه وشارينها باقل سعر فى السوق
امبارح انا ماشي بيها مشوار واحد 500 كيلو متر. خليط بين السير على الاول والتاني والجري 120 الى 140 طول الطريق رغم انه طريق وحش.
وانا جواها حاسس انى راكب نيسان او تيويوتا فى نعومتها.. وثبات لانسر ( طبعا هى مش احلى منهم لكن انا بضرب لك مثل بعربيات انا ركبتها كتير وحافظها كويس).
مشكلتها الوحيده رغم انها فى حجم الـ516 بتاعتى الا انها ضيقه عنها.. وانا 190 سم وراكب عربية اصلا واسعه جدا فحسيت بفرق كبير.
وعيب كمان ان الكرسي مصمم للقصيرين او متوسطي الطول.. انا كتفي كان فوق فتعبني خصوصا ان المشوار 500 كيلو. اما اللى كان راكب جنبي سألته بعد مارجعنا قالى الكرسي مريح ( هو قصير )
وتعليقا على جملة شوفلك لانوس او فيرنا.. بكل ثقه اقولك مفيش مقارنه نهائيا بين الاسبرانزا واللانوس او الفيرنا وعن تجربه... وبسيطه اركب دي واركب دي وانت فورا هتشتري الاسبرانزا. (فرامل، سحب،ثبات،شياكه بره وجوه، عزل جيد، إحساس بالفخامه)
وعلى فكره انا ركبت عربيات كتير لفترات طويله زي نيسان صنى 2005 و لانوس ورينو كليو وستروين AX بالاضافه لقيادة سيارات الاصدقاء مثل كرولا ولانسر وفورد مونديو وغيرهم. فبتكلم من واقع تجربة سنين.
شكرا ياجماعة لمشاركتكم
طيب ياستاذ Ahmender اخبار قطع الغيار ايه متوفرة في التوكيل وخارج التوكيل وبرضة استهلك البنزين ايه اخباره معاك
تحياتى لك انا معايا ال a516 من 2008 زيرو و ده مستوى كفاءة العربية من خلال التجربة و ليس من كلام مرسل
الموتور ممتاز
شاسيه قوى
كماليات كثيرة بسعر معقول عن مثيلاتها
و لو فيه مقارنة بينها و بين الفيرنا يبقى هى افضل و الدليل شوف وزن ال 516 و وزن الفيرنا و اللى بيسوق ال 516 و يسوق الفيرنا حيشعر بيها و تحياتى لك
فيرنا ولانوس افضل من 516 او ام 12
جايز!!!!!!!!!!!!!!!!!!
قطع الغيار خارج التوكيل سعرها مناسب.. تزيد عن اللانوس 10% او 15% مثلا..
هديك امثله لاخر حاجات اشتريتها خارج التوكيل من 3 ايام
تيش ميزان 60 جنيه
مقصات كامله 120 جنيه
جوز مساعدين 360 جنيه
مكينة ستوب 30 جنيه
حساس سرعه 70 جنيه
حساس كرنك 100 جنيه
موتور طلمبة بنزين 120 جنيه الكوري
علبة شكمان خلفى 250 جنيه
زجاج امامي 340 الاصلي
انا مابشتريش من التوكيل وماعرفش اسعاره غير مره اضطريت اعمل فيه سير كاتينه وبساتم وديسك واسطوانه بس كان فى الـ516 ولما سألت على السعر بره لقيت كل الاسعار نفسها عدى اسعار الاكسسوار زي المرايات والاكصدام كان التوكيل 3 اضعاف بره.
الكلام هنا عن الصيني بوجه عام؟ ولا عن الـ M12 بالذات؟
أصل انا ممكن اتكلم عن الفيرنا واقول لحضرتك هاتلى اوحش من الكوري فى مصر... فى حين ان الكوري فيه عربيات ممتازة جدا زي السيراتو والكروز وغيرهم.
عموما عن تجربه m11 و a516 "الصيني" الاتنين احلى من لانوس "الكوري" بكتير. (مع ان اللانوس عربية كويسه جدا بالنسبة لسعرها)
بالنسبة لاستهلاك البنزين.. عفوا نسيت ارد على النقطه دي.
انا ماحسبتهاش بالظبط.. لكن من يومين مشيت بيها 500 كيلو زي ماذكرت.. طالع من هنا بنص التانك وراجع فيه اقل من ربعه بحاجه بسيطه.
انا مش فاكر التانك فيها سعته كام لتر بالظبط.
السلام عليكم .. فين محل قطع الغيار ده .. انا محتاجة اغير زجاج امامى ومرايا شمال
على فكرة انا راكبة m12 من 3 سنين ومعايا كويسة كنت باعمل الصيانة فى التوكيل لكن بعد حوالى سنة ونصف اصبح زوجى يعمل لى الصيانة عند واحد فى عين شمس
العربية ممتازة معايا وفى السفر ممتازة العيب الوحيد اولادى بيقولو ان الكنبة الخلفية ضيقة شوية عن m11
هو انا بافكر اغيرها بس علشان عايزة اجيب اوتوماتيك وولادى كبروا محتاجين عربية اوسع من الخلف
وانا عاجبانى العربية جدا ولو فى منها اوتوماتيك كنت جبتها بدون تردد
اريد عنوان محل قطع الغيار هذا لو سمحت
أنا من طنطا. فبشترى قطع الغيار من عند: "أبو عوف" فى أول شارع حسن رضوان من سكة المحلة. وفى واحد عند محل ام محمد عند موقف سوق الجمله بس مش فاكر اسمه .. اما الزجاج فمن عند "الحاجة" وده فى سكة المحلة عند جامع شلبي.
وفى "المركز الصيني" هو بجوار أبو عوف لكن جودة أبو عوف أفضل شوية.
صديق ليا معاه ال m11
وعربية جميلة وهو بيحافظ عليها
وبركبها وشايفها كويسة جدا علي سعرها ده غير الثبات العالي
الكلام دا غير سليم بالمرة .. و هو يدل على عدم المعرفة او التجربة .... انا معايا m11 هايلة و قوية و تسارع و ثبات بشد مع عربيات اعلى منها على الطريق و ثابتة وجودها بالذات و قت التسارع على التانى و التالت.
صاجها اقوى من عربيتى السابقة و تقفيلها احسن .. عربيتى السابقة صاجها قليل عن صاج m11
عيوبها بقة:
الكنبة من ورة ضيقة
استهلاك بنزين عالى ...
بس مافيش اى حاجة تانى... ما دومت صاينها و مش كسلان تروح للميكانيكى و تعمل الصيانة فى مواعيدها... فهى لا يعلى عليها ...
باخد بيها الملفات الضيقة على سرعات اكتر من العربيات اللى حواليا و بتقبل بثبات و نعومة
عجل عريض و جنط 16 مافيهاش اى غلطة
شكلها جميل و اصحابى قالولى انها اقيم بكتير من اللانوس و الفيرنا و ال 516 و عجبانى مش بعانى فى حاجة منها... غير الطبيعى بتاع اى عربية... من صيانة و خلافه.
انا ماشتريتش عرببات الفيرنا و لا الانوس و لا سوقتها بس شوفت شكلها من جوة و من برة ... عربيات قديمة و شكلها من الزمن السابق... يعنى لو تتجدد هتبقى احلى... الشكل عندى بيفرق كتير
بالنسبة لى العربية الصينى دى اسمها مايضرهاش فى شىء ابداً انما يضرها لو فيها عيوب
انا عمرى ما احكم على الحاجة بدون تجربة.
اعز اصدقائى معاه 516
عربية صينى برده بس زى الفل مليانة اوبشن و ثابتة و بقالها معاه من 2007 عاملة 150 الف كيلو مافيهاش اى مشاكل بالمرة غير الصيانة اللازمة لها فى وقتها زى اى عربية...
يعنى ايه صينى !!!!
مش قادر افهم.. هو كلام و بس
كلام الناس اللى زى دى هو اللى خلانى اتردد فترة كبير على ما اشترى الصينى بس بعد ما جربتها عرفت انى ماسمعش للى بيتكلم بدون تجربة
اللى بيشترى صينى و يبوظها و بهمل صيانتها او كسلان انه يروح يصينها .. هو هو نفس الشخص اللى لو اشترى الالمانى برده هيبوظه.
العربية يحكم عليها من مواصفاتها او شهادة ملاكها اللى اختبروها بنفسهم.
ال m12 من جوة ورق .. يعنى لو المية جات عليها تبوش .... مش فاهم.