انا والماروتى والكاسيت....وفكرة مختلفة
انا تابعت كل اللى اتكتب هنا على حكاية الكاسيت بتاع الماروتى، وحيث انى من محبى ان يكون فيه حاجة بتقول اى كلام جنبى ، فانا كان عندى فكر مختلف شوية فى موضوع الكاسيت، لأن الواقع ان حاليا احنا مش محتاجين كاسيت شرايط لأنها قاربت على ان تلحق بالديناصور والماموث وطائر الدودو فى سجل الكائنات المنقرضة، واللى بيجيب عربية فيها كاسيت شرايط النهاردة بيجيب له الأدبتور اللى بيخليه يشغل عليه ام بى ثرى، فانا فكرت ببساطة ان اللى انا محتاجه ليس كاسيت ولكن راديو ووسيلة لتشغيل الأم بى ثرى
ومن خلال تجربة سابقة انا عاملها فى البيت انا عارف بوجود هذا الاختراع اللى هو عبارة عن سماعة ستريو كومباكت جدا(طولها حوالى 25 سم-شاهد الصورة)مزودة بأمبليفاير صغير لكى تعمل على مشغلات الام بى ثرى، وبتشتغل بالبطاريات مقاس AAA (حجر الريموت) او مدخل كهربى 6 فولت وفيه منها غالى ورخيص كما سنرى فى الصور
الصورة الأولى: دى سماعة ماركة جينياس ، تمنها فى كارفور 160 جنيه
http://up.haridy.org/storage/PICT0003.JPG
الصورة الثانية: نفس السماعة من الخلف موضح بها مكان تركيب البطاريات
http://up.haridy.org/storage/PICT0012.JPG
الصورة الثالثة: ده نوع تانى صينى، نفس الحجم تقريبا وبتتباع فى هايبر وان ب 20 جنيه فقط
http://up.haridy.org/storage/PICT0010.JPG
النوع الرخيص صوته حلو ، لكن النوع الغالى صوته احلى كما تتميز السماعة الغالية ان زرار on-off وزراير تعلية الصوت تاتش وموجودة من الأمام مما يسهل التحكم بها اثناء السواقة بعكس النوع الصينى اللى زرار الon-off منزلق زرار الصوت بكر وموجودين من الخلف مما يجعل التحكم مش سهل، والنوعين صوتهم حلو جدا على صالون الماروتى
كل ما نحتاج اليه بعد ذلك هو مشغل ام بى ثرى مزود براديو ، زى ده كدة،تمنه يترواح من 60 جنيه وحتى 250 جنيه حسب النوع والذاكرة
الصورة الرابعة: مشغل ام بى ثرى،
http://up.haridy.org/storage/PICT0009.JPG
ووصلة صوت زى دى ، تمنها 3 جنيه من عند الكهربائى( السماعات بتيجى معاها واحدة)
الصورة الخامسة: وصلة الصوت
http://up.haridy.org/storage/PICT0008.JPG
ميزة هذة السماعة انها بتبات حلو جدا فوق علبة الشرايط اللى فى الماروتى بدون فك ولا تركيب ولو عايزها متتحركش ممكن استعمال المفرش الصغير اللى بيخلى اى حاجة تتحط على التابلوه متتزحلقش والم بى ثى ممكن يتحط فى اى حته لسهلوة التحكم فيه وصغر حجمه
هيبقى لدينا مشكلة البطاريات، ودى ليها 3 حلول، الحل الأول هو بطاريات بتتشحن ، الحل التانى محول تيار من 12 الى 6 فولت من راديوشاك، الحل التالت المكلف بطاريات عادية وكل ما تخلص ترميها وده الللى انا عامله حاليا لحين ما اعمل زيارة لراديوشاك