الموضوع: نبذه تفصيليه عن الثلاثى المرح الفولت - الامبير - الواط

السلام عليكم
كان فى اخ عارض مشكله مع شحن البطاريه وحاولت ارد عليه رد بسيط بس الموضوع فتح منى ونسيت نفسى ولقيت ان الرد بقى تقريبا موضوع قلت انقله لحبيايبى قسم سيات لتعم الفائده
مبدئيا فى حبه حاجات لازم نعرفها عن الشحن والتفريغ للبطاريات (معظم المعلومات عن تجارب شخصيه ونصائح الاصدقاءخصوصا المهندس ايهاب منصور )
1- وحده قياس البطاريه الفولت + الامبير
-الفولت هو فرق الجهد بين قطبى البطاريه الموجب والسالب بمعنى هو فرق جهد تنافر الالكنرونات بين القطبين
- الامبير هو شده التيار الكهربائى المار بالسلك ويجب مراعاته جيدا فى حساب الاحمال
2- معظم البطاريات المعروفه للسيارات تتراوح بين 12 الى 24 فولت ولكن خارج البطاريه الحقيقى يزيد عن 12 فولت بمقدار ربع الى نصف فولت اى 12.25 الى 12.50 وهذه القيمه البسيطه لا تؤثر اطلاقا
3- البطاريات المفترض كونها 70 امبير هى فى الاصل 62 ولكن ال70 هو اسم دعائى فقط
4- البطاريه ال73 امبير هى فعلا 73 وتتواجد فى السيارات التى تعتمد بشكل كلى على الكهرباء حتى فى حاله كون المحرك متوقف مثل الرينو ميجان والبى ام بفائتها ويكون سعرها من 700 جنيه فيما فوق
5- يجب ان يكون هناك فرق بين دائره الشحن والبطاريه مقدار 1.5 الى 2 فولت ويجب ان يكون الامبير مساوى او اعلى
6- طريقه قياس الامبير صعبه جدا ويلزمها بنسه قياس الامبير ويجب تحميل الدينامو او البطاريه حتى تخرج اعلى امبير لها بعكس الفولت يمكن قياسه ولو لم يكن هناك احمال تماما
7- يوجد ثلاث انواع للبطاريات المتداوله ال55 امبير وال70 امبير وال73 امبير وكما سلف ذكره الثلاث بطاريات يكون خرجهم 12.25 فولت تقريبا لذلك يكون الدينامو من 13.75 الى 14.25 وتستطيع البطاريه الشحن على 13.25 فى حالات قليله ولكن ليس ذلك هو الاهم لان الامبير هو العامل الفعال فى عمليه الشحن ويكون الامبير مكتوب بشكل واضح على البطاريه وعلى الدينامو لصعوبه قياس فى حين يمكن عدم كتابه الفولت على الدينامو فى بعض الحالات
8- اذا قمت بالضغط على دواسه البنزين اثناء القياس واعطى الدينامو قراءه اعلى فهناك خلل فى دايره توحيد التيار داخل الدينامو وتؤدى على المدى البعيد الى تلف البطاريه على الرغم بان هذا العطل يساعد فى شحن البطاريه فى وقت قصير مقارنه اذا كانت دايره توحيد التيار تعمل فياخذ الدينامو الوقت العادى فى شحن البطاريه باعتبار ان البطاريه فارغه تماما فى الحالتين
9- يمكن حل مشكله دايره التوحيد بتغيير الدايره الموجوده داخل الدينامو او تركيب الدايره على مدخل البطاريه الموجب ايهما اسهل ويعطون نفس النتيجه ويمكن التاكد من عملها برفع عدد لفات المحرك اثناء القياس كما وضحت سلفا
10- (معلش الوصف ده بلدى شويه) الامبير زى الصندوق اللى هتشيل فيه حاجتك يعنى لو انت عندك صندوق سعته 10 لتر يبقى انت هتقدر تحط جوه الصندوق اللى يناسب ال10 لتر دول والزياده عن كده ياما هيضغط اللى فى الصندوق ويزاحمه فى المكان لحد ما هيجى وقت مش هينفع تزود فيه وممكن كل المكونات اللى جوه الصندوق تبوظ نيجى بقى للعربيه معاك مثلا بطاريه 62 امبير يبقى انت هتحمل عليها ال62 امبير دول بس ممكن اقل بس مش اكتر وهتلاقى كل حاجه شغاله معاك تمام جدا مراعاه ان الدينامو امبيره مناسب لشحن البطاريه
-واحد هيقولى هعرق اقيس الامبير ازاى وانا كل ما اشترى حاجه كهرباء فى العربيه الاقى مكتوب عليها القدره بالواط هقوله بسيطه طبق القانون ده وانت تعرف الامبير بتاعها وهو ان الواط=الفولت*الامبير او ممكن تحول قدره دايره تغذيه الكهربا عندك الى واط وتتعامل يعنى تضرب الفولت بتاع البطاريه فى امبيره يطلعلك الواط بتاعها يعنى 12*62=744 يعنى احمال عربيتك لا تزيد عن الرقم ده وهى متوقفه طب لو الدينامو اعلى من البطاريه يبقى ممكن تركب اضافات تتناسب مع قدره الدينامو بس خد بالك البطاريه مش هتشحن طول مانت شاغل الامبير كله للحاجات دى لان الامبير يا هيشحن البطاريه بالامبير بتاعه او هيشغلك الحاجه بتاعتك فالبطاريات دايما بتشحن كويس وانت طافى الانوار والكاسيت والجى ام ومش مستخدم الولاعه كمان
11- زياده الامبير لا يؤثر ابدا ابدا ابدا على عمر البطاريه بالعكس بيساهم فى شحن البطاريه بصوره سليمه حتى مع استخدام الاضاءه وما شابهها ولا يؤثر نقص الامبير الا فى عدم عمل الجزاء الكهربائيه بشكل سليم ولو البطاريه امبيرها اعلى من الدينامو يبقى هتشحن بس بصعوبه جدا وتدريجيا البطاريه هتبدأ تضعف لعدم تعويضها ما يتم استهلاكها منها بسبب المارش والانتظار وكل ما يتم تشغيله اثناء توقف المحرك
12- زياده الفولت يسبب مشاكل كبيره جدا منها احتراق اللمبات وتلف المكونات الاخرى كالكاسيت وخلافه
13 الفيوزات بتتحرق مع زياده الامبير مش الفولت لان كده كده اى سلك فى العربيه بيستحمل ال12 فولت مهما كان لكن يجب تناسب سمك السلك مع الامبير المار به يعنى اسلاك المارش والدينامو والارضى الواخدين من بطاريه السياره بيمشى فيهم امبير عالى جدا فلو وصلت المارش مثلا على سلك رفيع هيتحرق فورا وهتلاقى دايما الامبير الاساسى للعربيه بيكون 40 او 50 امبير لان كل مكونات العربيه مش هتستهلك كل الامبير ده ولو حصل الفيوز هيتحرق فورا عشان ينبهك ان فى عندك مشكله واللى بيركب لمبات اضاءه ويجيب جى ام وكاسيت حيوان وبعدين ميشتغلشى معاه او يحرق الفيوز الرئيسى بيكون هو مراعاش قدره الكاسيت وهل تتناسب مع امبير عربيته ولا لا
14- لو فى يوم فكرت تستبدل سلك بسبب انه بايظ فى العربيه يجب مراعاه ان السلك المستبدل كله يكون نفس السمك ويتناسب بشكل جيد مع الامبير السارى بداخله يعنى هتوصل لمبه 30 واط هتجيبلها مثلا سلك نص مللى ومتخليش فى سلك ارفع او اتخن سواء قبل او بعد الكتاوت لان الكهرباء دايما لما بيحصل شورت بتدور على اضعف مكان وتحرقه وغالبا بيكون الفيوز يبقى الفيوز مهم جدا جدا جدا ويجب تركيبه لو انت بتعمل اى اضافه او تعديل خاص بالكهربا فى عربيتك
15- السلك الرفيع موصل جيد جدا للكهرباء وبيقلل المقاومه فبيستخدم بصوره كبيره لاى حاجه امبيرها واطى وتركيب سلك سميك مش شطاره ولا حاجه بالعكس ده هدر فى الفلوس وفى الجهد المبذول لتشغيل المكون الكهربائى وكذلك للسلك السميك استخدامته طيب لو عايز تعرف انسب سلك يبقى بص على الفيوز فى غطا علبه الفيوزات يعنى الكلاكس بيكون 30 امبير يبقى لو هوصل سلك خاجى عشان الاصلى باظ مينفعشى سلك نص مللى تعبان ويكون واصل على الزرار على طول لازم يكون فيه كتاوت يقفل الدايره بين مصدرين كهربا امبيرهم عالى عشان مفيش حاجه تسيح او تتحرق
16- فى العربيه مجموعه اسلاك شغاله على اقل اقل امبير ويجب الحذر فى التعامل معاها لان الاسلاك دى بتكون رفيعه جدا ودى بتكون مغذيه للازرار ودراعات النور والتحكم فى التكييف واى زرار جوه العربيه ويدوب يكون بينور لمبه ماعدا زرار الانتظار او سخان الزجاج الكهربائى وطبعا مفتاح الكونتاكت وضفيرته كامله وحاجات تانيه زيهم متوصله مباشره على فيوز وبعديه البطاريه على طول المهم الزراير دى والدراعات لو حاولت تمشى فيهم امبير عالى شويه الزرار يسيح ويولع فتيجى هنا لعبه الفيوزات والكتاوت خد بالك والكهربائى شغال عشان فى ناس عكاكين
17- الزينون هو الحاجه الوحيده تقريبا فى العربيه اللى بتحتاج موديول عشان يحول الكهربا من 12 الى فولت اعلى لان لمبات الزينون لا تستطيع اخراج قدرتها على فولت قليل فدى ليها معامله خاصه ويجب تركيبها من متخصص لمراعاه الامبير لانها ممكن تسيحلك ضفيره النور بمنتهى السهوله
18- عايز تشترى بطاريه 73 وتريح دماغك من وجع الاحمال والكلام ده راعى فقط حاجتين ان البطاريه ال73 حجمها اكبر وتانى حاجه لازم تغير الدينامو بواحد مناسب للبطاريه الجديده
19- معظم العربيات الهاتش باك او السيدان الصغيره بيكون بطاريتها 55 لان مش المشكله فى الانوار والكلام ده هى المشكله الاكبر فى المارش فيفضل لو حد سقط مكنه 1600 او اكبر فى عربيه زى الابيزا مثلا انه يجيب بطاريه اعلى او يشوف البطاريه المثلى اللى كانت راكبه على العربيه اللى خد منها المكنه
20- مكن الزجاج الكهربا بيسحب امبير عالى فخد بالك وانت بتركبه على عربيه غير مجهزه او نازله مانيوال لانهم مبيكونوش عاملين حسابهم فى الامبير والحمل الاضافى فممكن تركب 2 بس قدام كفايه وبلاش تركب وحده رفع فى عربيتك لو بطاريتك اقل من 70 امبير لانهم هيبهدلو البطاريه
22- وانت بتشترى عربيه خد بالك من موضوع الكهربا كويس وخلى سبب ان الضفيره فيها عك من الاسباب اللى تخليك تراجع نفسك فىها واصرف نظر كمان على عكس السمكره مثلا لان العربيه لو فيها مشاكل فى الضفيره ممكن تعقدك من نفسك وتزاولك وحاجات تشتغل وتفصل لوحديها وانت ولا فاهم اى حاجه
23- على قد ما تقدر ما تغسلشى موتور العربيه الا لو كان ديزل وتحت اى ظرف من الظروف متغسلشى عرييتك من جوه بالميه والصابون ممكن كيماوى لكن ميه لا هتندم كتير
انا عارف انى خرجت عن الموضوع اللى بدانا فيه وهى اساسيات الشحن والتفريغ بس اظن انا غطيته فوق
ارجو انى اكون افدتك :)
احمد عبد السلام

تم تثبيت الموضوع
17/3/2016
م ع 7