فين أماكن شراء الملابس الجيده والمتنوعه

السلام عليكم ورحمة الله وبركاته

مشكلتي مع الملابس .. مش عارف البس حاجه .. مفيش حاجه عجباني .. واللي يعجبني يطلع مش مظبوط او ردىء

عايز اشتري لبس .. بناطيل جينز تتلبس وشياكه ومريحه .. وماتكونش مصري ولا صيني
كل ما اجيب بنطلون يطلع فيه حاجه غريبه

بحس ان التفصيله فيها حاجه غلط .. البنطلون مقاسي لكن مش مقاسي .. يا الوسط مظبوط بس الحجر خربان
يالرجل مظبوطه بس الوسط ضايع .. في حاجه غلط في البناطيل بقالها سنتين ولا تلاته

كذا بنطلون اجيبه واشحته جديد من غير ما اخرج بيه .. وحجات تلبس مره وانا مضايق واركنها

وفي بناطيل البسها تبقى ماشي الحال .. اجي اقعد الاقي لامؤاخذه نصي التحتاني من ورا بقى في الهوا

انا معنديش كرش ولا تخين وجسمي تقريبا ماتغيرش من سنين ( الهدوم خلتني اشك في نفسي )

المهم عايز اشتري بناطيل جينز محترمه ومتنوعه في اللون والموديل والخامه ( مش مصري ولا صيني )

وعايز تيشرتات بياقه كوم ونص كوم وقمصان تتلبس برا البنطلون تكون مظبوطه وحلوه

وعايز احذيه

كله كاجوال مش كلاسيك

مش مهم السعر .. المهم حجات حلوه ومحترمه بجد ( ومش شرط يكون غالي علشان يبقى حلو .. في حجات غاليه وبتطلع اي كلام )

فييين بقى الكلام ده ؟

ياريت يكون مكان فيه تجمع محلات كتير .. علشان اتفرج واختار ويبقى فرصه الشراء اكبر

يعني مش عايز اروح مشوار مخصوص لمحل في عباس العقاد ويطلع مش اللي في دماغي

وبعدين اروح مشوار تاني للمهندسين علشان محل .. وافضل اخد البلد من شرقها لغربها علشان اجيب حاجه

وشكراً .

انزل ستى ستارز لو ميزانيتك كويسة
وهاتنزل مخصوص على توكيلات
مثلا
H&m
timberland
Zara
espirt
lc wekiki
مش فاكر دلوقتى بس هتلاقى توكيلات كتير بس خد معاك 2 من اصحابك يقلولك اخبار المقاس اية والشكل العام

عجبنى اوى محلات اسمها مركز النصر الرياضى اصلها اصلا فى الكويت و ليها فروع فى مصر عندها حاجات ممتازة وماركات و بتنزل خصومات الحاجه سعرها بينزل جدا مرة جبت جاكيت ماركة anta سعره الاصلى 700 جنيه جبته بعد لما نزل عليه 3خصومات جبته ب 150 جنيه . وجبت بنطلون ماركه برضه بس مش فاكرها اصله 350 جنيه جبته ب 120 جنيه

outlet mall فى المنطقة الصناعية في أكتوبر

عندك Max بفروعه, أسعاره مش غالية أوى وعنده تشكيلة كويسة, فيه فرع فى سيتى سنتر مكرم عبيد, القمصان فى رينج 100 جنيه, ولسه جايب Casual jacket ب 350 جم.

فيه محلات سيتى ستارز وتوكيلاته, فيه محلات بتعمل عروض كويسة ومحلات تانية الناس الغلابة اللى حالتنا مش ال Target consumer بتاعهم وأسعارهم هلامية, American Eagle مثلا كان عامل عروض على البناطيل الجينز, 2 ب 430 جم, وده يعتبر كويس بالنسبة للتشكيلة والجودة بتاعتهم, والمعاملة طبعا, فأنزل لف وأتفرج براحتك.

وفيه Nile stock, وده زى ماكس بس أرخص, والحاجة اللى فيه الجودة بتاعتها مش تمام, بس ممكن ب 500 جم تجيب 4 بناطيل جينز و قميص, أينعم البنطلون هتغسله 20 مرة لحد ماتعرف تلبسه ومتبقاش ريحتك عاملة كأنك لسه خارج من جهنم (ريحة كبريت), لكن جودة+سعر, أو سعر+كمية, مينفعش ال 3, ليهم فرع جنب النادى الأهلى فى مدينة نصر.

ال trainers و الأحذية الرياضية والتي شيرت, فيه Activ, وده ليه فروع كتير وبيبيع حاجات كتير برضه, والجودة والأسعار معقولة, جبت من عندهم سيفتى شوز ب 300 جم تقريبا, وعاش معايا أكثر من أى حاجة تانية لبستها, وأنا بمشى كتير.