استشاره بخصوص خبطه "فرامل لانوس للاسف "

**meero_boy2000** · 29-09-2014 11:07 AM

اولا كل سنه وانتوا طيبين وعيد سعيد يارب :b4_007:

ثانيا حصل موقف غريب معايا امبارح كنت مشغلى التكييف وحمل في العربيه وفجأه بدوس فرامل جبت الدواسه لاخرها مفرملتش والار بي ام اترفع فجأه ل 4 فخبطت في اللي قدامي الكبوت دخل تقريبا 2 سنتيمتر لجوه بعد الشفه اللي علي اول الاكصدام فبالتالي الكابوت مش بيفتح دلوقتي والكبوت رحل شويه لبعد الفانوس بشويه صغيرين سؤالي هنا حد عنده تفسير للي حصل في الفرامل ده ؟؟ مع اني كملت مشواري وفي فرامل عادي ؟؟ بس لاحظت اني لما بركب عدد وبشغل التكييف قوتها بتقل ؟ ثانيا موضوع الكابوت واستعداله اروح لسمكري ولا بتاع كوالين واخليه يعمل ايه انا خايف تبقي باينه وبعدين هو هيفتحه ازاي خايف الشبكه تبوظ واسف للاطاله

السياره دايو لانوس 2

**shiko85** · 29-09-2014 11:30 AM

اولا: كل سنه و حضرتك طيب و عيد سعيد على حضرتك و الأسره الكريمه
ثانيا: الحمد لله على كل شئ و بسيطه ان شاء الله
ثالثا: تفسير اللى حصل هو الــ inertia (القصور الذاتى) و هى مقاوله الأجسام للتغير فالحركه بمعنى ان العربيه و الركاب و الحموله داخلها بيقاوموا التغيير فالحاله من الحركه للسكون بس الفرق ان العربيه الفرامل بتساعد انها تقف لكن الركاب و الحموله مفيش حاجه تمنع حركتهم فالبتالى بيأثروا على سرعه العربيه و المسافه اللازمه لتوقف العربيه و على كفاءه الفرامل
بمعنى اسهل ان الركاب و الحموله اثناء سير العربيه بياخدوا سرعه مساويه لسرعه العربيه و لما العربيه تقف سرعه الركاب و الحموله بتتنقل تانى للعربيه
و كل ما يزيد وزن الركاب و الحموله مقارنه بوزن العربيه التأثير بيزيد و المسافه المقطوعه بعد الفرامل تزيد و كفاءه الفرامل تقل و لو وزن العربيه او المركبه اكبر من وزن الركاب التأثير بيكون مختلف العربيه بتقف لكن الركاب بتتغير حالتهم من السكون الى الحركه (زى اللى بيحصل فالأتوبيس او المترو) الناس بتتحرك للخلف لما المركبه تنطلف للأمام و العكس
علشان كده حزام الأمان مهم لانه بيعمل على تثبيت الركاب فالعربيه و بيقلل من تأثير الى القصور الذاتى

**meero_boy2000** · 29-09-2014 11:39 AM

كل سنه وحضرتك والاسره الكريمه بخير

شكرا جدا للتوضيح والافاده بس لو حضرتك تقدر تفيدني هل ده معناه انك تيجي تدوس فرامل متلاقيش خالص وكأنها هو ؟؟؟ شكرا مره تانيه لحضرتك

**shiko85** · 29-09-2014 12:16 PM

المشاركة الأصلية كتبت بواسطة meero_boy2000

شكرا جدا للتوضيح والافاده بس لو حضرتك تقدر تفيدني هل ده معناه انك تيجي تدوس فرامل متلاقيش خالص وكأنها هو ؟؟؟ شكرا مره تانيه لحضرتك

العفو, الشكر لله وحده
بالظبط كده هتلاقى الفرامل ضعيفه جدا و كأنها مش موجوده و المسافه المطلوبه للتوقف بتزيد بشكل ملحوظ و ده بيختلف طبعا على حسب سرعه العربيه و الوزن الداخلى (ركاب + حموله) و بمجرد ان الوزن يرجع تانى للوزن العادى هتلاقى الفرامل كويسه و استجابتها اتحسنت

**meero_boy2000** · 29-09-2014 12:20 PM

بس انا كملت مشواري بنفس الحموله عادي جدا والفارمل كانت شغاله كويسه هي اللحظه دي بس اللي ملقتش فيها فرامل مش عارف ده تيل ولا ماستر ولا ايه

**lutenit030** · 29-09-2014 12:32 PM

اكشف عالماستر العمومي

**shiko85** · 29-09-2014 12:44 PM

المشاركة الأصلية كتبت بواسطة meero_boy2000

بس انا كملت مشواري بنفس الحموله عادي جدا والفارمل كانت شغاله كويسه هي اللحظه دي بس اللي ملقتش فيها فرامل مش عارف ده تيل ولا ماستر ولا ايه

ممكن تكون مشيت بسرعه اقل او عملت حسابك على ضعف الفرامل او متعرضتش لموقف تانى زى الموقف بتاع الحادث
خلى بالك استخدام الفرامل وقت الحادث (التوقف الكامل) مختلف عن استخدامها لتقليل السرعه

**lutenit030** · 29-09-2014 12:48 PM

الوصف اللي شيكو بيقول عليه يخلي البدال يحجر ميروحش لتحت خالص

**amoor89** · 29-09-2014 12:48 PM

المشاركة الأصلية كتبت بواسطة shiko85

اولا: كل سنه و حضرتك طيب و عيد سعيد على حضرتك و الأسره الكريمه
ثانيا: الحمد لله على كل شئ و بسيطه ان شاء الله
ثالثا: تفسير اللى حصل هو الــ inertia (القصور الذاتى) و هى مقاوله الأجسام للتغير فالحركه بمعنى ان العربيه و الركاب و الحموله داخلها بيقاوموا التغيير فالحاله من الحركه للسكون بس الفرق ان العربيه الفرامل بتساعد انها تقف لكن الركاب و الحموله مفيش حاجه تمنع حركتهم فالبتالى بيأثروا على سرعه العربيه و المسافه اللازمه لتوقف العربيه و على كفاءه الفرامل
بمعنى اسهل ان الركاب و الحموله اثناء سير العربيه بياخدوا سرعه مساويه لسرعه العربيه و لما العربيه تقف سرعه الركاب و الحموله بتتنقل تانى للعربيه
و كل ما يزيد وزن الركاب و الحموله مقارنه بوزن العربيه التأثير بيزيد و المسافه المقطوعه بعد الفرامل تزيد و كفاءه الفرامل تقل و لو وزن العربيه او المركبه اكبر من وزن الركاب التأثير بيكون مختلف العربيه بتقف لكن الركاب بتتغير حالتهم من السكون الى الحركه (زى اللى بيحصل فالأتوبيس او المترو) الناس بتتحرك للخلف لما المركبه تنطلف للأمام و العكس
علشان كده حزام الأمان مهم لانه بيعمل على تثبيت الركاب فالعربيه و بيقلل من تأثير الى القصور الذاتى

كلام علمى جميل جدا محدش يقدر يختلف عليه
لكن لو طبقنا الكلام ده فى الواقع على كل العربيات كل الناس هتلبس
اللى حصل هنا حصل بسبب عيب فى دايرة الفرامل ماستر عمومى او سيرفوا

**meero_boy2000** · 29-09-2014 01:09 PM

المشاركة الأصلية كتبت بواسطة amoor89

كلام علمى جميل جدا محدش يقدر يختلف عليه
لكن لو طبقنا الكلام ده فى الواقع على كل العربيات كل الناس هتلبس
اللى حصل هنا حصل بسبب عيب فى دايرة الفرامل ماستر عمومى او سيرفوا

انا برضه بقول كده لان لو الموضوع حموله كل واحد مشي لوحده في العربيه ثانيا انا وقت مفرملت كنت ماشي مثلا علي 25 كيلو بالكتير لان ده كان في البحر الاعظم فمش قادر احدد عيب ايه عشان الميكانيكي رايحله انهارده ومش عايزه يعملهالي فيلم ويلبسني

الموضوع: استشاره بخصوص خبطه "فرامل لانوس للاسف "

LinkBack

أدوات الموضوع

عرض