ايه رأيكو في تويوتا هايلوكس دبل كابينه فل كامل ...
السلام عليكم
انا جديد معاكم في المنتدي
مش عارف اذا كان الموضوع مكانه صح ولا لا لان مافيش قسم للونيت هنا غير الديزل والسياره اللي انا عاوز اخد رايكم فيها دي بنزين .
انا مقيم في السعوديه وكنت بفكر انزل عربيه لاستخدامي الشخصي في مصر كنت ناوي علي كورولا لكن جتلي فكره تانيه حابب اخد رايكم فيها وهيا هايلوكس دبل كابينه عاديه او دفع رباعي .
بصراحه العربيه دي عجباني جداااااااا عربيه فعلا جباره وفيها كل اللي انا عاوزه :
1) الماكينة 2700 سي سي بتديك 158 حصان نفس ماكينة الفورتشنر ودي اهم ميزه فيها القوه الجباره اللي في الماكينة بعكس السيارات الصغيره .. وعلي فكره استهلاكها في البنزين معقول جدا عشان محدش يقلي الماكينة كبيره وهتبقي غير اقتصاديه في استهلاك البنزين .
2) العربيه فيها كل الكمليات اللي انت محتجها .. سنتر لوك وريموت في المفتاح ، قزاز كهربا ، مرايات كهربا ، اشارات علي المرايات ، حساسات خلفيه واماميه ، شاشه لمس ، مدخل USB ، تحكم في الكاست من الدركسيون ، جنوط المونيوم ، طبلون خشب ، عداد السرعة اوبتترون مع تحكم بشدة الاضائة ، وفيها كونسول وسطي ، الكراسي الاماميه مفصوله يعني نفس كراسي الملاكي بالضبط تقدر تتحكم فيها زي ما انت عاوز من ارتفاع وتحريك للامام والخلف وامالة الظهر للامام والخلف ، مقابض الابواب كروم ، الصندوق الخلفي فيه فرش حمايه بلاستك معزول ييه كل الصندوق وشكله حلو ، صدام حماية امامي حديد ، فرامل aps ، ايرباج للسائق والراكب الامامي ، كشافات ضباب
3) السياره عمليه جدا خصوصا في المطبات والطرق اللي عندنا اللي تكسر اجدع عربيه وعاليه عشان المطبات
4) انا موش من سكان القاهره ولو نزلت القاهره بيبقي كل شهر مره او مرتين وانا اعتقد انها مناسبه للمحافظات اكتر من القاهره
5) العربيه ممكن تفيدك في حاجات كتير يعني ممكن تفيدك في الشغل لو عندك سوبر ماركت او محل أجهزه كهربائيه او اي مشروع تاني هتكون مفيده اكتر من الملاكي يعني هتبقي ملاكي وشغل .
6) السياره عزلها ممتاز وصوت الماكينه ممتاز ولما تركبها متحسش ابدا انك راكب وانيت وخصوصا انها بنزين
اخيرا العربيه فيه منها 2×4 وفيه منها 4×4 والاتنين ممتازين وفيه منها جير عادي وجير اتوماتيك وسعر اعلي فئه فيها فل كامل 4×4 جير اتوماتيك موجود في المعارض في حدود 95 الف ريال .
انا حسبتها لقيت تكلفتها لحد ما توصل مصر وتدفع جمرك (اعلي فئه) تقريبا 240000 جنيه يعني قريبه من سعر الكورلا الهاي لاين .
ايه رايكم فيها اتمني انكم تنصحوني انا عارف ان ممكن يبقي شكلها بايخ انك راكب وانيت في مصر بس هنا الامر طبيعي جدا ومعظم الناس عندها السياره دي ، هل ممكن تتقبل الفكره انك تركب وانيت بدل ملاكي ؟؟؟؟؟ ونظرة الناس موش هتفرق معاك !!!
