الموضوع: تقرير صيانه 20000 كم ونقاش جديد

ازيكوا ياجماعة
مبدئيا كدا انا هتكلم عن الصيانه ونشوف حكاية النقاش مع المهندس المسؤول
انا معايا 301 مانوال كانت عامله 19000 كم وكنت ع معاد صيانة ال 2000 طبعا لو حد كان قرا موضوع تغير الزيت لنوع جديد كان عرف اني كنت هغير الزيت واختارت زيت اسمه وولف بدل الموبيل .
الاول انا رحت ابو رواش ع معادي والمهندس استلم مني العربيه وشيك عليها واخد ملاحظاتي واللي هي كانت زيادة استهلاك البنزين ضعف التكييف شويه ضعف سحب العربيه تقل الفرامل نوعا ما زنة في التكيف ع الاول صوت العربيه اعلي من الاول بكتير العفشه مش تمام الكونتكت مش سريع في تشغيل العربيه الشبكة الاماميه بتقع باستمرار الازاز اللي قدام بتاع السواق بيتك تكة بعد رفعه ع الاخر .
ملاحظات اغلبها بسيطه باستثناء السحب والاستهلاك وقالي لما تخرج من الصيانه نتكلم تاني لحد كدا كله تمام .. جت لحظه وانا بطلع الزيت الجديد من جوه العربيه وبدهوله وبدانا نطقش في بعض اول حاجه قالي ممنوع اغير غير موبيل قلتله طيب استني بقي متدخلش العربيه وهاتلي مدير الصيانه 5 دقايق وجالي المدير وقالي ايه حكاية الزيت دا قلتله الملاحظات بتاعتي وان العربيه أدائها اتغير خالص بعد صيانه ال 10000 للاسوء بدأنا انا وهو نتناقش اول نقاش علمي وبدا يتكلم معايا في اللزوجه والكثافه والمقاومة وغيرها ولقاني بقدر اجاريه في الكلام وعندي رد لكل كلمه بيقولها فسألني انت بتشتغل ايه قلتله مهندس مدني بس قبل ماابقي مدني قضيت سنتين في قسم كيمياء فتقريبا انا فاهم كل اللي انت حضرتك قلتله واللي لسه مقولتهوش قلتله خلينا نكون متفقين ان موضوو موبيل دا عبارة عن بيزنس بس بين بيجو وموبيل ليس الا قالي انت عارف ان الزيت الي انت جايبه دا ممكن يكون افضل من موبيل واغلي كمان بس انا بقي هقولك ع اللي فيها انا معنديش مانع نهائي اغيرلك بالزيت اللي انت جايبه بس بشرط قلت ايه هو قالي هكتب ان العميل طلب تغير زيت غير الموصي بيه في مركز الخدمة والسيارة داخل الضمان وان تغيره هيكون ع مسؤوليتك الشخصيه عشان لو اخدت العربيه وقفلت منك يبقي عربيتك بره الضمان .!!
انا سمعت كلمة تخرج عربيتك بره الضمان دي واتجننت هما فكروا انهم كدا بيخوفوني وانا طبعا مش هقدر اضر عربيتي وهرضي للامر الواقع ووقتها دخل معانا مدير المركز في الحوار وكام واحد من اللي واقفين .. انا رديت عليه وقلتله انا قبل مااجي ابو رواش رحت صلاخ سالم وقلتلهم اني هغير الزيت ومحدش جابلي سيرة ان الزيت يخرج العربيه بره الضمان ازاي حضراتكوا تقولوا كدا قلتله مفيش مشكلة عندي عكتب ع مسؤليتي في الورقه بس بشرط المهندس اللي يستلم مني العربيه يكتب تحت في الورقة انه قال ان الزيت يخرج العربيه من الضمان ويمضي عليها ويمضي عليها مدير المركز كمان عشان انا هروح الادارة واخد الورقه دي معايا عشان الكلام لما يختلف اعرف ساعتها احاسب مين . طبعا جرعه الثقة دي لما سمعوها مني اتلجلجوا والمدير اللي كان بيقول ع مسؤوليتك قالي لا احنا مابنمضيش عشان التعليمات اكتب ع مسؤليتك واي حاجه تحصل لعربيتك تبقي انت مسؤل . قلتله يعني مش هتخرج العربيه بره الضمان ولا حاجه قالي لا بس ع مسؤليتك تاني
قلتله لو سمحت انا بسال حضرتك سؤال واضح المعالم ومباشر وصريح تغير الزيت يخرج العربيه بره الضمان ولا لا ؟ قالي مش بالظيط بس يتكتب انه ع مسؤليتك عشان افرض انت خرجت بالعربيه دلوقتي وجيت تدور العربيه وقفت يبقي الحل ايه ؟ قلتله ايوه الحل ساعتها اننا نكشف نشوف العيب من ايه لو كان العيب بسبب الزيت يبقي وانه هو اللي وقع الموتور اتحمل مسؤلية عربيتي لكن انت تحكم قبل ماتكشف ع العربيه يبقي انت حضرتك بتهرج تهرييييبببج اسمه تهرييييييج وكررت كلمة تهريج دي كتير قالي لا انا مقولتش كدا انا بس بقولك اللي فيها .
رجعلي تاني المهندس اللي كان بيستلم وقالي انت لسه واقف انا خلصت عربيتين وانت لسه مدخلتش طبعا كنا عدينا اكتر من ساعه في النقاش دا .
بصراحه المهندس دا كان شخص كويس وصريح معايا وانا وهو طول اليوم ولا اتخانقنا ولا علينا صوتنا اصلا بداء يتكلم معايا تاني وبدانا نتناقش في ظروف تشغيل العربيه والمواصفات وغيرها وقالي تعالي هدخلك معايا الورشه ودخلت قالي بص انا هغيرلك الزيت ونش هكتب ع مسؤليتك ولا حاجه وان الزيت اللي انت جايبه دا فعلا احسن من موبيل وان دي مساله تجاريه وتسويقيه بحته بين بيجو وموبيل بس انا عاوز اقولك حاجه عربيتك ممكن تفصل بسبب الزيت فعلا وتجيبها واحنا ممكن منعرفش انه بسبب الزيت وممكن تفصل بردو بسبب تاني بس مش الزيت وان دي تعليمات عندنا عشان محدش يعمل معانا مشاكل ويتهمنا في حاجه تكون مش من عندنا قلتله انا هقولك ع حل تاني لاني مصمم بردو اني اغير الزيت قلتله انا هبعت ايميل لخدمة العملاء في فرنسا وهقولهم نوع الزيت اللي انا جبته واعملي تقرير بحالة الموتور والزيت بتاعك هبعته مع الايميل وهما ياكدوا عليا هل الزيت دا ينفع ولا لا وياكد عليا مسالة الضمان واقسم بالله ساعتها هاخد الايميل واطلع بيه ع ادارة الشركة واشتكيها في فرنسا وكمان اشتكي التوكيل في الرقابة الاداريه و هعملكوا فضيحه قالي بس هدي نفسك خالص الموضوع مش مستاهل ابعت الايميل وخليهم يىدوا عليك وهات الايميل حطه في عين اتخن واحد في الشركة وهعملك كل اللي انت عاوزه من غير ماتزعل نفسك
قلتله سهله لسه بياخد مني الزيت عشان يفتحه اخدته من ايده وقلتله لا غير بقي موبيل المره دي انا بقي هبعت الايميل واشوف هيقولوا لي واجيلك ع صيانة 30000 بنفس الزيت وهتتحملوا تمنه ..
(وقتها انا اتصلت بصاحبي معاه 508 وغير وولف وسالته قالي انه كتب ع مسوليته من غير مايحك معاهم من الاخر وكبر دماغه يعني مجرد ماالمدير قاله ع مسؤليتك قاله ماشي بس من غير مايجيب سيرة الضمان دي)
لحد كدا والله الراجل كان متفاهم معايا خالص وبداو يشتغلوا في العربيه طبعا كان تغير زيت - فلتر زيت - فلتر هوا- فلتر بنزين( كان مسدود خالص) وليه قصه لوحده
بوجيهات تيل فرامل امامي -سوائل السياره -زيت الفرامل والدريكسيون - شيك ع السيور والكهرباء والقطع كلها وتربيط عفشه تقريبا مكنش في مسمار مربوط ع اخره في العربيه كلها العربية غابت 4 ساعات تقريبا -شيكت ع ازاز العربيه كله وسخانات الكراسي وتممت ع كل حاجه وفكوا الاكصدام الامامي وتم تربيط الشبكه بمسامير ضغط وركبت الفوانيس اللي تحت .
لحد هنا والعربيه خلصت
قصة البنزين دي بقي وانا جوه الورشه وراني فلتر البنزين لكذا عربيه 301 وفعلا كانت حاجه غريبه فلتر عامل 2000 كم ومسدود تمام وفلتر بعد 500 كم جواه شحم تانك بنزين مليان جااااااااااااااااااز!!! وبلاوي كتير تخليك تكتشف ان مصر مفيهاش الشيء اللي اسمه بنزين دا تماما يعني ايه فلتر في شحم ؟؟؟؟؟؟
لحد هنا ذهول غريب من اللي شوفته الاغرب بقي دا في واحد معاها 301 جايه من السعوديه عامله 37000 كم اخر صيانه ليه كانت ال 20000 واصل مصر بقاله 5 ايام جي بتفويله السعوديه معني كدا ان اخر تغير لفلتر البنزين بتاعه كان عدي عليه 17000 كم ندهو ع المهندس وهو واقف معايا فراح يشوف مالها الفني طلعله الفلتر واداهوله وهو واقف نده عليا قالي تعالي بص رحت وياريتني مارحت لو قلت لحضراتكم ان الفلتر شبه جديد مش هتصدقوا قالي عارف دا ممكن يتغسل ويتحط في عربيه زيرو حطينا في الفلتر ميه وزيت وبنزين بيجروا جوا الفلتر ولا كانه جديد بصيتله بس قلتله كفايه بدل ماتجيبلي الضغط.. طبعا انا كنت قاعد في السعوديه وعارف يعني ايه بنزين هناك.
المهم انا كدا خلصت واستلمت العربيه ورحت احاسب زيت 283 ج
الفلاتر اسعارها كويسه جدا 49 جنيه للهوا و57 للبنزين 134 للزيت 134 للبويجيهات 424 تيل الفرامل حاجه مش فاكر اسمها ب 15 ج وسائل مساحات ب 15 ضريبه مبيعات 167 ومصنعيه 493 وتم تثبيت الشبكة من عندهم
الاجمالي كان 1845 ج الاسعار معقولة يمكن المصنعيه عاليه شويه بس انا بصراحه اول مره اكون راضي عن الي حصل معايا بعد تجربة العربية
دلوقتي العربية ماشاء الله زي كانها لسه جديد السحب بقي ممتاز جدا التكيف بقي قوي جدا والسحب مع التكيف اتحسن كتييييير عن الاول يعني لو العربية في التالت وطالع كوبري والتكيف ع 2 بتجري مني وطلعتها في وقفه الاشارة ع الاول والنقل ع التاني ممتاز جدا
عفشه العرييه اتربطت كويس بقيت بحس بثبات افضل من الاول بمراحل في الغرز بشكل عامل اداء العربيه اتغير 180 درجه كان اللي كانت معايا قبل الصيانه حاجه وبعدها حاجه تاني خالص .
انا اسف اني طولت عليكوا بس عاوز اقول ان من النقاش دا استفدت حاجات كتير اولها ان ظروف تشغيل اي عربية في مصر زفت زفت زفت الطرق فككت العربيه المطبات هتخلص عليها البنزين هيجيب اجل الموتور قبل معاده عشان كدا هما بيتابعوك بصيانات مستمره كل 10000كم ودا اللي بيكسبوا منه وعرفت مثلا ان هيونداي كل 5000كم (مش متاكد من المعلومه) عشان بيغيرولك حاجات ممكن تكون لسه شغاله زي بعض الفلاتر او البويجيهات او التيل فبالتالي بياخدوا منك تمن العربيه تاني ع مدي مش قريب ومش بعيد
بمعني مثلا انا عملت صيانه 10000 دفعت 717 وصيانة 20000 دفعت 1845 يعني 2500 ج تقريبا وبكتيري 4 شهور وهروح اعمل صيانة 30000 وتمنها 3000 يعني الاجمالي 5500 في سنه وحده تقريبا .. طيب هل يعقل ان عربيه تمنها 100000 بعد سنه وحده تكون دفعت 5% من تمنها ؟؟؟!!! انا شايفه مبلغ او بمعني اصح ظروف تشغيل العربيه في مصر سيء جدا وطبعا تقدر تعمم ع كل العربيات
بشكل عام بردو انا اكتشفت اني 301 كان افضل قرار لاني الحمد لله مش بشتكي منها وممتازه جدا وراضي عن العربيه والمشكله بس التوكيل ورغم كل دا هو افضل من غيره بمراااااااحل بكل امانه والله وانا ممكن يعني اقيمه انه 75 -80 %
وهو بيعاني بسبب ظروف البلد والحكومة والضرايب وبيطلعوه علينا بافتراء شويه يعني ممكن يتحسن عن كدا بكتير وكله يرتاح بس الحمد لله ع كل حال
اسف اني طولت بس دا للفايده واي استفسار تحت امركوا

المشاركة الأصلية كتبت بواسطة faroojj

شكراَ للموضوع الشيق
بس ليا إستغسار العربية معايا بس معرفش إيه موضوع سخانات الكراسى اللى اتكلمت عنه

العفو ياباشا
لو حضرتك بصيت تحت الكراسي هتلاقي سخانات دي اللي كنت اقصدها