حادثه بالنيسان وtotal loss

**ASHHAT** · 02-10-2014 02:18 PM

السلام عليكم ورحمه الله وبركاته
كل سنه والجميع بخير وعيد اضحى سعيد علينا كلنا
من اسبوع عملت حادثه بعربيتى نيسان صنى الشكل الجديد 2013 عربيه نقل دخلت فيه على مطب فى طريق الواحات وعملت تلفيات عنيفه بالعربيه من الخلف الشنطه والكنبه الخلفيه بقوا حته واحدة
عملت محضر ونقلت العربيه لنيسان اوتو ايجيبت ابو رواش
والنهاردة اخدت مقايسه الاصلاح لقيتها رقم عالى جدا
89 الف جنيه مع العلم ان العربيه ماتلمسيتش من النص الامامى وسليمه موتور وكل حاجه ال اتبهدل فيها النص الخلفى
ورحت بالاوراق لمصر للتامين طلعت حرب لقيتهم بيتكلموا حيبعتوا خبير بعد العيد يشوف يكهن العربيه ولا يصلحها
افيدونا افادكم الله حد عنده فكرة حيحصل ايه بعد كدة والدنيا بتمشى ازاى وعادة مصر للتامين بتعمل ايه بعد كدة

وكل سنه وانتم طيبين

**Batman372** · 02-10-2014 02:38 PM

لو مقايسه التوكيل اكتر من حوالى ٦٠٪ من مبلغ التأمين ... شركه التأمين حتعتبرها توتال لوس totall loss
و تقريبا حتاخد تعويض حوالى ٧٠ ٪ من مبلغ التأمين ...
تحياتى ...

**tameem2010** · 02-10-2014 03:00 PM

الخبير هيروح يعاين العربيه
وهيكتب تقريره
اما الاصلاح واما اعتبارها total loss
في حالة الاصلاح بيتم الاتفاق معاك على مبلغ الاصلاح اللى هنيدفع وهيكون تقريبا 65% من قيمة التلفيات لان فيه خصم اهلاك 10% لانها موديل 2013
في حالة الهلاك الكلي هيبقى ادامك حل من اتنين اما انك تكتب مبايعه بالسيارة لمصر للتامين ووقتها هتاخد 75% من قيمة السيارة اللى في الوثيقة
او انك تحتفظ بسيارتك والخبير هيقيم الاجزاء السليمة ويخصمها من التعويض اللى هيكون 75% من قيمة السيارة
وهيتم خصم 10% من قيمة السيارة كاهلاك
يعنى هتصفي على 65%من القيمة اللى في الوثيقة

يعنى السيارة ب110 الف لو اتنازلت عن السيارة للشركة وعملت مبايعه هتاخد حوالى 70 الف جنيه
لو هتحتفظ بسيارتك هيقدر السليم بكام ويخصمه من ال70 الف وتاخد الباقي والسيارة
الارقام اللى بقولها لك ارقام تقريبية

**eng.m7md.ali** · 02-10-2014 03:33 PM

الف سلامة عليك والحمد لله انك بخير

عربيتي راحت توتال لوس بردو

التأمين قيم التصليح ب 40 الف جنيه "نص خلفي" في حين ان قيمتها في الوثيقة كانت 65 الف جنيه

اللي بيحصل ان حضرتك بتشوف التأمين مقدر العربية بكام في اخر وثيقة وهيتخصم منها 10% .. هو ده مبلغ التعويض اللي حضرتك هتاخده

يعني لو التأمين مقدرها ب 100 الف هتخصم 10% اللي هما 10000 جنيه والشيك يطلع ب 90 الف جنيه