عاجل جداً يا شباب .. نازل أشتري a5 بكرة من السوق و في مشكلة

صباح الخير عليكوا

أنا كنت بقالي فترة كبيرة بأدور في أفضل عربية في فئتي السعرية و الحمد لله إستقريت ع الأوكتافيا

و نازل يكرة الصبح إن شاء الله أجيب واحدة علشان أسافر مع العائلة بيها نزور قرايبنا و كده

كل سنة و أنتوا طيبين

المشكلة دلوقتي إني مش عارف مركز صيانة كويس يكون فاتح بكرة علشان متخوف من مشاكل الفتيس

أنا معايا حوالي 110 ~ 115 .. و برضه كنت عاوز أعرف آرائكم و نصائح ما قبل الشراء

و المبلغ ده يجيبلي a5 موديل كام

أنا عاوزها إليجانس ( الهاي لاين )

بس أهم ئي دلوقتي لو حد يعرف يدلني على ورشة محترمة بكرة تطمني علشان ده مبلغ مش قليل

و مش عاوز يتضحك عليا

شكرا مقدماً

نصيحة بلاش الاستعجال وبلاش السوق .. بس ان كان ولا بد خد معاك حد فاهم اوى علشان السوق فيه محترفين النصب كلهم
وبالنسبة للكشف بنزينة كالتكس اللى ف اول عباس بتدى فكرة مبدئية عن حالة العفشة والميكانيكا
وان شاء الله ربنا يوفقك

ماهو للأسف أنا مستعجل

بس الحمد لله مش هأتدلق يعني .. أنا مش لاقي الفلوس في الأرض

المشكلة إن مش هيبقى معايا حد

أنا هأبص كنظرة مبدئية كده بس و لو عجبتني هاخدها على ورشة متخصصة يشوفوها

و لو تمام هأخلص

المشكلة في الورشة المتخصصة دي بقى

على مهلك ودور بتأنى .. وحاول تشترى من ركيب وخلى التاجر اخر حاجه المبلغ يجيب 2006 هاى لاين

وربنا يدلك على الخير

طيب لو حاجة موديل 2008 ؟؟

هاي لاين

أتكلم في كام ؟

طبعاً تكون حالة كويسة

و أنا فعلاً هأتفادى التجار .. منظرهم بيبقى باين و كلامهم ملزق من كتر السكر :d

بلاش تشترى دلوقتى خالص,, مفيش حد هيبيع عربيه نضيفه ليله العيد هتلاقى كل الى معاه عربيه شمال وعاوز يخلص منها نازل السوق بيدور على واحد عاوز يعيد بعربيه جديده

لو محتاج عربيه ضرورى أجر عربيه بالفين جنيه ولا حاجه

اقتباس:

---

المشاركة الأصلية كتبت بواسطة blazer

بلاش تشترى دلوقتى خالص,, مفيش حد هيبيع عربيه نضيفه ليله العيد هتلاقى كل الى معاه عربيه شمال وعاوز يخلص منها نازل السوق بيدور على واحد عاوز يعيد بعربيه جديده

لو محتاج عربيه ضرورى أجر عربيه بالفين جنيه ولا حاجه

---

كلام موزون .. بس أهه أنا مش هأخسر حاجة لما أبص

لعل و عسى

و لو ملقتش مش هأجيب

أنا فعلاً مزنوق بس لو في حاجة معجبتنيش

يفتح الله

ماله القطر :)

اقتباس:

---

المشاركة الأصلية كتبت بواسطة طارق _عبد السلام

المبلغ يجيب 2006 هاى لاين

---

هو أنا كنت سمعت إن 2005-6-7 فيهم مشاكل في الفتيس فكنت منمر على 2008 صراحة

ولا أنت شايف إيه ؟

2008 هاى لاين من 125 بتوصل 130 للحالات الشاذه

مفيش حاجه اسمها مشكله فتيس كلهم فتيس واحد اهمال الصيانه بيدمر انضف فتيس

المشكله كانت كمبروسور الهواء بس فى 2005 و 2006 وبيضرب بردوا سوء استخدام

لا أنا كده تهت

المشكلة اللي كنت أعرفها حوار الـ dsg

و الفالفات اللي بتبوظ الفتيس إذا ما إتعالجتش

و أعرف إن المشكلة دي إتعالجت في 2008 و علشان كده كنت منمر على الموديل ده

صححلي معلوماتي بقى زي ما لخبطها بقى :)

أنا كده إتوترت

مفيش dsg فى الايه فايف

حتى 2013 ونزل من 2013 دفعه دى اس جى وكانت فئه واحده بس

يعنى من 2005 الى 2013 فتيس ستيب ترونيك بيتعمل له صيانه تغيير زيت وفلتر كل 60 الف كيلو ولو معملش الصيانه بينتش وبيجيب عقل فتيس مع الاهمال الشديد وبيتصلح بردوا دلوقتى عادى

اقتباس:

---

المشاركة الأصلية كتبت بواسطة طارق _عبد السلام

مفيش dsg فى الايه فايف

حتى 2013 ونزل من 2013 دفعه دى اس جى وكانت فئه واحده بس

يعنى من 2005 الى 2013 فتيس ستيب ترونيك بيتعمل له صيانه تغيير زيت وفلتر كل 60 الف كيلو ولو معملش الصيانه بينتش وبيجيب عقل فتيس مع الاهمال الشديد وبيتصلح بردوا دلوقتى عادى

---

طمنتني

شكراً ليك جداً يا فندم

هل ممكن حضرتك ـ لو عارف ـ تدلني على ورشة حلوة تطلعلي تقرير مفصل

لأني قريت هنا شكاوي كتير من التوكيل

كنت فاكر إسم ورشة في صقر قريش بس الإسم مش في بالي دلوقتي فمش عارف أجيب الأرقام

بنزينة كالتكس خلف السراج موول بتكشف بالتفصييل وتقرير مكتوب بحالة العربية والفتيس وكل حاجة

كنت اتمنى اخدمك بس انا مش من القاهره

ان شاء الله الاخوه بمجرد مايشوفوا موضوعك محدش هيتأخر فى النصيحه السليمه

وبالتوفيق ان شاء الله

شكراً يا شباب

إدعولنا بالستر و القوامة

علشان بكرة صيام فوق كل ده

حاسب
اللى انت بتعمله اخرته اسود
العربيات مش هتخلص بعد العيد . خصوصا العربية اللى انت عايزها عايزه فحص كويس

الفنتازيا اتغير فيها الفتيس بفيرجن احدث مفيهوش مشكله ال body valve بتاعه ال A5
انا راى كل ما تعلى بلموديل هيكون احسن ولو تعرف تشترى A5 حتى لو اول فئه اوتو هتكون احسنلك من A5 هاى لاين ماشيه كيلو متر كتير

بلاش استعجال فى الشراء

و حط فى دماغك وانت نازل 》》 انا مش هشترى عربية فيها نصف غلطة .. انزل مستبيع او مستهتر :)

عندك مهندس هاني في جسر السويس
مهندس محمد سمير في النزهة الجديده
مهندس خالد اسماعيل في الحي العاشر مدينه مصر - ألواحه
احمد زاهر في صقر قريش المعادي
دول ناس ثقه وان شاء الله ربنا يوفقك للصالح

بلاش السوووووووووووووووووووووو وق

تجار نصابين جدا

بالاضافة الى

اسوأ عربيات ف مصر بتروح السوق

يبلاش استعجال دور كويس والاوكتافيا كتير مش هتخلص

هو احمد زاهر فى صقر قريش ده اروحله ازاى بالظبط من اول حارة البطئ على الاوتوستراد ؟

ما جبتش حاجة يا شباب

العربيات مش أد كده

كل اللي شفتهم أو معظمهم بأحس إن العربية مشدودة بعد إهانة

تحس إحساس إنك كنت بتبص على تاكسي كده

العربية مش صالبة طولها

حاسسها مريحة حبتين

و هما شادينها و غاسلينها لزوم البيع

كان في حاجات كويسة بس مش اللي أنا عاوزه

الحمد لله على كل شئ

بس الناس اللي بتقول بلاش السوق .. أجيب منين طيب ؟؟

أنا ما أعرفش حد عنده أوكتافيا .. و كل اللي سألتهم قالوا مانعرفش

أي إقتراحات ؟

نصيحة استني لبعد العيد

ياباشا اى حد ماشى باوكتافيا او قدامك اسئله عادى قول له الله يبارك فيه نيه للبيع بس تكون العربيه عجباك


كانت بتحصل معايا كتير وبردوا ساعات بعملها لو عايز اجيب عربيه لصديق ...... وفيه معارض عربيات مستعمله بس يكون حد معروف وثقه لان معرض العربيات منهم من يخاف على سمعته ولو فيه مشكله فى ورق او العربيه بتعرف ترجعله لكن السوق نظام البيع بالمفارقه