كيا سبورتاج - ما سعر الزجاج الأمامي ؟

**heshamg** · 03-10-2014 03:28 AM

السلام عليكم ،

أنا من الاسكندرية و استلمت كيا سبورتاج 2015 من حوالي 4 شهور .. الحمد لله .. قدر الله و كنت راكن العربية في شارع بالليل .. رجعت لقيت الزجاج الأمامي يمين (الكرسي اللي جنب السائق) مكسور تماماً .. و اللص سرق شاحن موبايل و فلاشة عليها قرآن (يا رب يتوب ) و بس !

فأولاً .. نصيحة لكل إخواني ما تحطوش حاجة مهمة أو غالية في العربية نهائي لأني صراحةً ساعات أسيب التابلت مثلاً في العربية .. و اتعلمت الحمد لله.

ثانياً: ما سعر هذا الزجاج بالتوكيل ؟ و أنا لم أستلم الضمان بعد من التوكيل لأنه تأخر فهل يلزمني احضاره أولاً قبل تغيير الزجاج ؟

و هل الأفضل و الأوفر أغيره عند واحد بتاع زجاج سيارات و خلاص و لا التوكيل أفضل ؟

جزاكم الله خيراً .. و ربنا يقيكم السرقات و الحوادث .. اللهم آمين

**Lifz_Good** · 03-10-2014 09:40 AM

متابع

**medo-312** · 03-10-2014 05:39 PM

ربنا يعوض عليك وياريت محدش يسيب حتى ساندويتش في العربية أو حتى شنطة فاضية.. ممكن الحرامى يكسر أي حاجة في العربية علشان حاجة تافهة حتى لو علبة سجاير

**Mohab555** · 03-10-2014 06:16 PM

بص هتلاقى فى التوكيل زجاج الباب الواحد ب 1700 جنية
بره عند بتاع الازاز هتلاقى نوعين :
واحد مستورد Benson صينى و دى اكبر شركه ازاز فى الصين و جودته ممتازة و هتلاقيه ب 500
التانى مصرى جريش وهتلاقيه ب 400

الضمان ملوش علاقه بالزجاج المكسور علشان السرقه

**heshamg** · 03-10-2014 11:17 PM

المشاركة الأصلية كتبت بواسطة mohab555

بص هتلاقى فى التوكيل زجاج الباب الواحد ب 1700 جنية
بره عند بتاع الازاز هتلاقى نوعين :
واحد مستورد benson صينى و دى اكبر شركه ازاز فى الصين و جودته ممتازة و هتلاقيه ب 500
التانى مصرى جريش وهتلاقيه ب 400

الضمان ملوش علاقه بالزجاج المكسور علشان السرقه

أشكرك علي الرد .. أنا توقعت إنه يكون غالي كده في التوكيل .. و بما إني ما كنتش أقدر أسيب العربية كده مفتوحة كتير لحد ما أجازة العيد تخلص كلمت ميكانيكي معرفة وداني النهاردة لواحد بتاع إزاز ركبهولي الحمد لله و كان نظيف في شغله .. و أخد 320 جنيه بالتركيب .. هو الإزاز مش مصري أكيد .. هو قاللي إنهم بيقولوا عليه تركي .. و ممكن زي ما بتقول يكون صيني .. أما السعر كان قليل لأنه معرفة الميكانيكي.

حأبأي أصور الإزاز إن شاء الله و أحطلكم صورة منه تشوفوه للإفادة.

**heshamg** · 03-10-2014 11:21 PM

المشاركة الأصلية كتبت بواسطة ايهاب الفايد

لو سمحت انت استلمت العربية من التوكيل بعد قد ايه بالظبط عشان انا حاجزها وعاوز اعرف المدة من الحجز للاستلام بالظبط وشكراً مقدماً

أ. إيهاب .. هم كلموني بعدها بشهر إني آجي أستلم لو حبيت بس لون علي بنيات بس أنا كنت طالب لون أبيض ففضلت أستني لأني ما كنتش مستعجل و استلمت بعد 3 شهور .. مدة طويلة بس أنا كنت مش مستعجل و كانوا تقريباً هم اللي بيحاولوا يستعجلوني