سجل تجارى & بطاقة ضريبية لمحل .... و طفاية 6 كيلو !!

الســلام عليكم و رحمة الله و بركاته
أولا كل سنة و حضراتكم جميعا بخير ... و عيد جميل سعيد

.
.
بنعمل مكتبة صغيرة على قدنا ،
و ماعملناش زى ما الشعب كله بيعمل و رخصناها مخزن و ريحنا دماغنا
لأ .. ماشيين فى رخصة مكتبة !

و علشان الاجراءات تكتمل ، روحت الدفاع المدنى ، سألنى عن المساحة قولتله 3.25*3 متر

قالى هات طفاية حريق 6 كيلو اما :
99 الحربى
مينورى
بافاريا

و بعدها تعالا بعد العيد ادفع الرسوم

جه فى بالى استلف طفاية من حد اوريهاله ، و ادفع و اريح دماغى ، بدل ما اشترى طفايات !!
سمعت كلام انى لازم اروحلهم بفاتورة باسم الجواب و كلام من ده ،، الكلام دا صحيح ؟؟

تانى هام /
الطفايات دى اسعارها ايه ؟
و ارخصهم ايه ؟

و هل 6 كيلو يبقى لازم 6 كيلو ؟؟
يعنى مارجعلوش تانى و اتكلم معاه يمكن يكون فيه احجام اصغر ؟ ( لغنى شوفت شكل الـ 6 كيلو على النت لقيتها كبيرة ! )

هو قالى اسأل فى المطافى جنبنا بيبيعوهم هناك ، بس روحت مالقتش المسئول عن البيع ..

فـ منتظر افاداتكم ;)

لازم تكون عندك طفايه ومعاك الفاتوره انها جديده

فيه انواع 6 كيلو بتبدأ من 200 الى 500 هات اللى ب200

وطبعا اثناء اجراءات التريص لازم تكون الطفايه موجوده .. وحتى بعد الترخيص لو حتى فتشوا عليك ولقوها منتهيه بتاخد محضر امن صناعى

اشتريها احسن

ربنا يوفقك ...

افضل الطفايات الموجودة بالسوق هى بافاريا ... و اغلاهم سعرا ... و الاحجام بتبدأ من 1 كجم ... ثم 3 كجم .. ثم 6 كجم ... و اعذرنى انا ناسى سعر ال 6 كيلو .. و هو بالفعل حيطلع لحضرتك فاتورة باسمك من بافاريا

ال 99 حربى كويسة .. بس مش فى كفاءة بافاريا ... حضرتك اتفرج على الاتنين و حتعرف الفرق
و للأمان ... لازم يكون عندك طفاية حريق .. و انا بنصح بيها حتى فى البيوت

تقبل مرورى

شاااورولى على الرخيص يا رجالة :)
كدا كدا المحل فاضى ، و البيت نفسه لسه مانقلناش ليه ..

ايه النوع الرخيص اللى بـ 200 ج اللى بتقولوا عليه ده ؟
و هل الاسعار على مستوى الجمهورية متقاربة ؟
ولا لو اشتريت من دمياط .. غير المنصورة .. غير القاهرة ؟
( فروق 10 أو 20 ... ولا تفاوت كبير ؟ )

انا من دمياط بالمناسبة لو حد يعرف مكان مضمون اجيب منه .


الانواع بتفرق فى مدة الصلاحية ؟ ولا كله واحد ؟

و جـــزاكم الله خيرا ♥

شوف انا عندى البافاريا وعندى الرخيص هو كله تقريبا واحد فى الغرض

بس البافاريا التوب اكيد فى كل حاجه والرخيص مشكلته الكبيره انهم ممكن بيعبوه سيبداك :) مش بودره حريق

فيه نوع اسمه فريدكس رخيص

^^^^^^^^^

تمام ،،
بس انا خايف اجيب من الرخيص ده و مايقبلوهوش فى الدفاع المدنى ،، ولا كله يتقبل عادى ؟؟
اللى سالته و قدرلى الرسوم ، اعطانى الـ 3 انواع اللى انا كاتبهم فوق دول ، مش عارف شرط اجيب حاجة منهم ولا عادى :\

علشان ميتلككوش فى الدفاع المدنى ..... حضرتك تجيب نوع من التلاتة الى قالولك عليهم فقط

^^^^^

شكلى هاعمل كدا و امرى لله ،،

أو هاحاول ارجعله الاول و اسأل ، هاقوله انى لقيت فريدكس بسعر رخيص اجيبه ولا لازم اللى قولتلى عليهم ..

اقتباس:

---

المشاركة الأصلية كتبت بواسطة ladawy

^^^^^

شكلى هاعمل كدا و امرى لله ،،

أو هاحاول ارجعله الاول و اسأل ، هاقوله انى لقيت فريدكس بسعر رخيص اجيبه ولا لازم اللى قولتلى عليهم ..

---

لو قال لك لا حضرتك مضطر تسمع كلامه للاسف لازم توفى كل الاشتراطات للموافقه على الترخيص.. انا موافقه الدفاع المدنى كلفتنى اكثر من خمسه الاف جنيه بسبب الاشتراطات والتبرع والذى منه

اسمع كلامه مش هتفرق

وللعلم هى مفيده وثمنها فيها وكمان ساعات بيتعمل بيها خير انقاذ عربيه او حريق محدود عند جار او شىء من هذا القبيل

توكلنا على الله ،،
هاسال على الـ 3 انواع اللى قالى عليهم و اشوف ارخصهم .. علشان اكون ماشى تبع كلامه

الحماية المدنية - دمياط ( شطا "طريق بورسعيد" )

----------------

خلـّـصت الحوار دا كله النهاردة ،
و كل اما اسأل على الاجراءات ، يقولولى روح للاستاذ هانى ،،
الغريب ان آخر واحد المفروض بروحله هو الاستاذ هانى ، و انى غلطت لما روحتله فى الاول
لإنه نـظـّـر براحته على الرسوم و حجم الطفاية ، و هو مالوش فى الحاجات دى اصلا !

روحت لـ ا/شاكر فى المطافى ، و اللى مافهمتش هو كان مسئول عن ايه بالظبط !
هوا عمـّال يدوخنى و يقولى تعالا تانى و معاك الجواب ، اقوله مانا هنا و معايا الجواب !!
و هو مصمم انى آجى تانى ، اقوله آجى و معايا الطفاية يعنى ؟؟ يقولى لأ ، انت تيجى و معاك الجواب ... ارجع تانى و اقوله مانا هنا اهو ، و الجواب فى ايدك !!
و ييجى بتاع 3 مرات نقول نفس القصة !!

لحد ما عدى واحد علينا شكله رتبة عندهم تقريبا ، اعطاله الجواب ، كتب عليه ( طفاية 3 ك ، 2 تدريب )
و بـــــــس ،،

قالى روح ل هانى ادفع الرسوم ، سألته على الطفاية و اسعارها ، قالى انه مالوش دعوة بيها و فيه ناس بتبيعها فى كذا و كذا ، و فيه واحد هنا مندوب ل بافاريا بيبيع ، قولتله تمام نجيب من عنده

نزلت ل هانى ، كان شاكر اتصلنا بالمندوب و لقيته جاى ورايا على مكتب هانى ،

---
الكوميدى بقى : ان شاكر قالى ادفع رسم 135ج عند هانى ،،
روحت لهانى بالورق قالى 130 ج
و انا بدفع قالى الرسوم 131.50 ج ،، طلعت الفلوس بالفكة فعلا ، و هو ادانى الوصل و طلع لحد بيندهله
الوصل مكتوب فيه 130 فــقــط !!
اخدت الجنيه و نص و مسكتهم فى ايدى تانى
جه اخد الـ 130 و ماسألش على الجنيه و نص اللى ألفه ده !!

و الطفاية بـ 370 جنيه ، و معاها ضمانها و فاتورتها ( اللى بالمناسبة لازم اخبط مشوار عند المحكمة الاول اصورهم و ارجعله تانى علشان ارفقهم فى الورق )

و استلمت ورقة مجلس المدينة اللى بيها بقدم على عداد الكهرباء

===========
خلاصة الموضوع دا كله : الـ مية واحد و تلاتين جنيه و نص :d