الموضوع: تكاليف الفرح .. نار نااااار

بعد ما اتفقوا على الشبكة والشقة والمهر وعليكم النجف والستاير وعلينا التلاجة والبوتجاز .. وبنتي شبكهتا مش اقل من بنت خالها وميتكتبلهاش مؤخر اقل من بنت عمتها وووووو...

جينا بقى للفرح ..
ونزلت من 3 ايام مع صاحبتي اللي هتتجوز في نص السنة نسأل على قاعات الافراح في دور الجيش والفنادق ..
وبصراحة اتصدمت من الاسعار .. ومكنتش متوقعة ان الموضوع كده خالص ..
ارقام بجد مبالغ فيها ..
يعني مثلا حاجة زي الميريديان دخلنا اتفرجنا على القاعة وشكلها معجبنيش خالص .. ستايل قديم من ايام السبعينات والوان الستاير كئيبة والاضاءة سيئة جدااا ..
طيب ماشي زي بعضه .. اهه اسم برضه ويبقى اسمك عاملة في الميريديان .. تعالي يا بنتي نسأل على الاسعار ونشوف ..
والمفاجأة .. القاعة اللي مش عجبانا اصلا ومرضاش اعمل فيها ببلاش .. الاقي سعر الفرد فيها 200 جنيه ..
يعني عشان اعمل فرح فيه 200 فرد .. هيكلف 40 الف جنيه ده منغير الزفة والكوشة طبعا ..
يعني ادفع 40 الف جنيه عشان ناس تيجي ترقص وتاكل وتعيب في الفرح والعروسة والعريس ويروحوا ..
ده الجنان ده !!!
وانتركونتيننتال سيتي ستارز .. ال 150 فرد ب 52 الف ..

طيب بلاش فنادق .. احنا نروح نشوف دور الجيش ..
دار الحرس الجمهوري مثلا ..
فيه 3 قاعات .. القاعة الكبيرة تحفة بصراحة .. جميلة جدااا .. ديكورها والنجف والحوئط بجد حلوة جدا ..
طيب تعالي نسأل ..
اسعار الفرد تبدأ من 110 لحد 145 .. جميل جدا .. بس الحلو ميكملش .. ليه بقى ؟ عشان القاعة الكبيرة دي اقل عدد افراد لازم تحجزه بيكون 300 فرد ..
طيب 300 في 110 يعني 33 الف .. برضه احسن من الفنادق وعدد افراد اكتر .. لا لا لا محنا قلنا الحلو ميكملش .. ازاي ؟ السعر ده البوفيه .. يعني 110 دي اكل بس ...
الكوشة اسعار تانية من 2000 حتى 5000 جنيه .. الزفة انواع وكل نوع بسعره .. الدي جي .. المفارش والترابيزات ووووووووو كل بسعره ..
طيب يعني نحسبها كده لو على اقل الاسعار هتطلع كام ..
طلعت 42 الف جنيه .. ( يعني مقدم عربية ) ..
طيب بلاش مصر الجديدة .. نروح نسأل في الهرم ..
مينا هاوس مثلا .. ال 180 فرد هيتكلفوا 48 الف ..

ده غير بقى اسعار الفنانيين .. يعني محمد حماقي اللي كان السنة اللي فاتت ب 15 الف والناس بتقولك ده حماقي بينزل مع البوفيه (على اساس انه رخيص يعني ) .. السنة دي بقى ب 35 الف ..
تامر السنة اللي فاتت كان ب 25 الف .. السنة دي قرب ال 70 الف ..
عمرو دياب لازم الاول يعمل انترفيو مع العروسة والعريس قبل ميحدد سعر او يوافق اصلا يروح الفرح ..

ده غير بقى اسعار الفساتين والكوافيرات ..
يعني اقل فستان ممكن يتلبس مش هيكون اقل من 5000 ده يعني والله بالميت .. عشان يتلبس ساعتين تلاتة في العمر وشكرا ..
ومصففي الشعر والمكياج .. عشان تروحي لحد مشهور مش اقل من 3000 جنيه ..
يرضي مين ده ؟؟؟

طبعا البنت روحت بيتها مضايقة جداا والدنيا سودة ..
هل من المعقول ان واحد بعد مكلف شقة وتشطيب وشبكة ومصاريف وكل ده وهو لسه في اول حياته .. يروح يعمل فرح بما يقرب من 50 الف جنيه !!!!!!
طب ازاي يعني ..
اكيد هو عايز يفرح وهي كمان عايزة تفرح ويفرحوا اللي حواليهم .. بس مش كده يعني ..