اتنازل عن الجنسية المصرية ؟ ايه اللي هيحصلي لو تنازلت ؟

انا كنت عايزة اعرف ايه الي هيحصل لو تنازلت عن الجنسية المصرية ؟

كنا من فترة قدمنا على الجنسية السعودية بطلب من جوزي

فلما قدمنا طلبو مني اروح للمحكمة واتنازل عن الجنسية المصرية عشان يكملوا الاجراءات

بس انا لما شوفت الموضوع فيه تنازل مرحتش المحكمة ولا كملت في الطلب طنشت الموضوع

وجوزي طلب مرتين تلاتة وشافني مطنشة سكت بس انا كلمته بعدها في موضوع اني عايزة انفصل و بعدها بدأ يلح على التنازل بشكل خلاني اخاف اكتر من كتر اصراره

ومرتين يعمل موعد للمحكمة و ياخدني لهناك بدون مايرتب معايا ويقولي يلا ننزل ومرضاش وبرتاب من الحركة دي بس تصرفاته بتخليني اخاف من موضوع التنازل بدون ماعرف السبب بس لمجرد انه مصر كدا بيحسسني اني هفقد حاجة مهمة مش عارفة ايه هيا

المهم

من قبل اجازة العيد والادارة بتاعة شغلي كلموني في قبولهم لطلب الابتعاث لأمريكا وإدوني موعد للسفارة وطلبوا أوراقي

وقت ما قدمت طلب الإبتعاث جوزي إداني ورقة الموافقة وكان حتى مش متوقع القبول منهم

المهم دلوقتي ان الموافقة لما جت قالي أنا مش مستعد لموضوع سفرك ومش هينفع تسافري وتعدي هناك لوحدك قلتله انت كنت موافق طيب ولا كنت بتدحك عليا !

لما كلمته على السفر اكتر من مرة قالي طيب تعالي إتنازلي وأنا هسافر معاكي ونشوف السكن مع بعض واشوف كل حاجة ولو اطمنت هخليكي تكملي

بس انا مبقيتش واثقة فيه انه فعلا صادق المرادي وكمان إلحاحه اني اتنازل عن الجنسية مخليني مش فاهمة سبب اهمية التنازل بالنسباله

والتنازل بيكون عند القاضي عشان الورق يكتمل والمعاملة تتبعت وتطلع الجنسية السعودية بعد انتهاء الاجراءات

طيب ايه اللي هيحصل لو تنازلت هقدر اسافر مصر بسهولة ؟ هقدر اخد الجنسية المصرية تاني ؟

كمان هل فيه محاميين او اي جهة ممكن تفيديني في الموضوع دا لإني مش عارفة المكان الصحيح لإجابة الاسئلة دي

وايه العيوب والمميزات للجنسية المصرية في وضعي

والعيوب والمميزات للجنسية السعودية في وضعي

والافضل بالنسبالي

انا عايزة اسافر مش بس عشان اتعلم لغة بس كمان هغير جو واتعرف على ثقافة الشعب الامريكي واتعلم قيادة السيارة واطلع رخصة دولية وحجات كتير بس مش عايزة دا يخليني اتنازل بدون مافكر

اعتقد القانون في مصر

مبيسقطش الجنسية المصريه غير لما صاحبها بيقدم طلب لوزاره الداخليه
وبيعلمهم بجنسيته الجديده

لان القانون بيمنع انك تجمع ما بين الجنسيه المصريه وغيرها

Sent from my SM-N900 using Forum Runner

الجنسيه السعوديه اعتقد مميزاتها انك تاخدي الفيزا بسهوله

وانك تتمتعي بالاقامه الكامله في السعوديه حتي لو علاقتك بزوجك لم تستمر

Sent from my SM-N900 using Forum Runner

مع رفضي الشديد انك تبوحي بما يحدث داخل بيتك هنا
لكن
مع الافتراض انك هتبقي سعوديه - غير مصرية وهتيجي تقعدي ف مصر مثلا
ولا اي فرق هتحسيه لان النظام الحكومي عندنا فاشل بامتياز
فمش بيعرف يفرق ف المعامله بين المواطن والاجنبي

بلاش ياشباب حد يفتى فى حاجة مش متاكد منها عشان محدش يعرف الخفايا و الثغرات اللى فى القوانين

ايه الموضوع الغريب المعقد ده ؟؟؟؟؟؟؟؟؟؟؟؟؟؟؟!!!!!!!!!!!!!!!!!!!! !!!!!!!!

اقتباس:

---

لان القانون بيمنع انك تجمع ما بين الجنسيه المصريه وغيرها

---

من امتى مصر بتمنع ازدواج الجنسية؟ القانون اتغيّر ولا ايه؟

اعتقد كده

البركه في قضيه ابو اسماعيل اللي علمتنا

Sent from my SM-N900 using Forum Runner

انا مافهمتش الموضوع اوى

لكن / سؤال : انتى هاتتنازلى الاول عن الجنسية بعدها تقدمى على السعودية ؟
يعنى ممكن تتنازلى ، و ماتقدريش تاخدى الجنسية السعودية مثلا O.o !؟

بالنسبة لموضوع دخول مصر بجنسية السعودية ، فالامر مقارب شوية لوضع السوريين عندنا
بس هما هايبقى ليهم امتيازات اكتر علشان هم لاجئين سياسيين فبيتعاملوا فى بعض الحالات معاملة اهل البلد

التقديم للمدارس و الكليات ، هاتبقى بمصاريف الاجانب ( غالية )
رسوم الاقامة و تجديد الاقامة .... الخ
- و تقريبا حق التملك هايبقى غير متاح ليكم ؟ يعنى شراء ارض أو ما شابه .
و حق التصويت فى الانتخابات :)

دول اللى اعرفهم ،

---------
اسمع ان الجنسية المصرية من الجنسيات الصعب الحصول عليها ( شروط و تعقيدات )
فاعملى حسابك انك لو تنازلتى عنها ماتفكريش فيها تانى .

اقتباس:

---

المشاركة الأصلية كتبت بواسطة abou-yahia

لان القانون بيمنع انك تجمع ما بين الجنسيه المصريه وغيرها

sent from my sm-n900 using forum runner

---

غريبة انا اصحابى معاهم جنسية تانية مع المصرية و عادى خالص و دخلوا الجيش كمان

على حسب فهمى الاخير من قضيه ابو اسماعيل
القانون المصرى بيلزم التبليغ باذدواج الجنسيه(معرفش وصل للمنع الكامل ولا لأ) ..فحضرتك بتعمل ايه مش بتجيب سيره فى مصر انك معاك جنسيه تانيه وبتدخل مصر وبتخرج بجواز سفرك المصرى

انتوا خليتوا الشيخ ابواسماعيل مع جنسية امريكية كمان؟؟؟؟
الشيخ ابواسماعيل ربنا يفرج كربه - يحاكم غير شرعيا علي تقدمة لطلب الترشيح للرياسة بتقديم وثيقة ان هو ووالداه لا يحملوا جنسيات اخري

الأخت الكريمه لم توضح جنسيه زوجها ولكن ما فهمته من كلامها انه سعودى ( لو فهمى خطأ اعلمينى )

وفقأ لكلام الاخت ووفقا للقانون السعودى فمن شروط منح الجنسية للمرأة الأجنبية المتزوجة من سعودي هى كالتالى :
1- ثبوت قيام العلاقة الزوجية على الوجه الشرعي.
2- أن تعلن تنازلها عن جنسيتها الأصلية أمام قاض أو كاتب عدل.
3- أن يكون الزواج وفق التعليمات المنظمة لزواج السعودي من أجنبية.
4- أن تقدم إقراراً بأنه لم يسبق الحكم عليها بحكم قضائي في جريمة جنائية أو أخلاقية.
5- عدم وجود ملاحظات أو قيود مسجلة عليها لدى الجهات المختصة.
6- أن تكون مقيمة في المملكة.
7 - أن يمضي على الزواج مدة (5) سنوات على الأقل ويمكن الاكتفاء بمضي جزء من هذه المدة وفقاً لحالات معينه مثل حاله انجاب طفل او ام او اب سعودى فتقل المده عن الخمس سنوات وفقاً لكل حاله

لذلك فمن الواضح ان السلطات السعوديه تشترط ع الزوجه الأجنبيه ان تمتثل امام المحكمه للتنازل عن جنسيتها الاخرى واثبات ذلك الاقرار داخل محاضر الجلسات

وفى حاله تنازل الاخت الكريمه عن الجنسيه المصريه فهى تصبح خاضعه تماماً للقانون السعودى ولا يجوز لها اللجوء للاحتكام للقانون المصرى او المحاكم المصريه فى اى حال

وتذكرى تماما اختى الكريمه انه فى حاله تنازلك عن الجنسيه المصريه فانك ستعاملين كأجنبيه فى حال عودتك لمصر سواء للزياره او الاقامه ومن المعروف ايضاً ان الجنسيه المصريه من الجنسيات الصعب الحصول عليها فالقانون المصرى اعطى سلطه تقديريه واسعه للحكومه متمثله فى وزير الداخليه فى فحص طلبات الحصول على الجنسيه والموافقه عليها او الرفض فهو امر جوازى للحكومه وفقاً لما تراه محققاً للمصلحه العامه ، وايضاً ينص القانون المصرى ان التجنس ليس حقاً للشخص متى توافرت فيه الشروط انما يخضع للتقدير المطلق من جانب الدوله وفقاً لسياستها فى العنايه بالكم والكيف ويسمح للسلطات وقف اعطاء الجنسيه للاجانب اذا اقتضت الظروف الاقتصاديه والاجتماعيه ،،، الخ

لذلك فمن الواضح ان القانون المصرى وضع تعقيدات وعقبات كثيره فى طريق من يطلب التجنس بالجنسيه المصريه ، لذلك ايها الاخت الكريمه ، عندما تفكرين فى التنازل عنها ، فاعرفى انه من الصعب الحصول عليها مره اخرى ، الموضوع نسبى والتقييم متروك ليكى فقط وفقأ لحياتك الشخصيه والعمليه وانتى اكتر حد ادرى ان كنتى ستحتاجين للجنسيه المصريه فيما بعد ام لا

اما بالنسبه لسفرك لامريكا ، فاعتقد ان اسلم حل انك تقعدى مع جوزك وتحاولى تحلى الموضوع بشكل ودى سواء بأقناعه مره اخرى بفكره السفر او اقتناعك بعدم السفر لان زى ما حضرتك عارفه ان القانون السعودى يشترط موافقه الزوج فى الكثير من المعاملات

اتمنى اكون قدرت افيدك واى استفسار انا موجود

تحياتى ،،

اقتباس:

---

المشاركة الأصلية كتبت بواسطة S.h.a.h.e.r

انتوا خليتوا الشيخ ابواسماعيل مع جنسية امريكية كمان؟؟؟؟
الشيخ ابواسماعيل ربنا يفرج كربه - يحاكم غير شرعيا علي تقدمة لطلب الترشيح للرياسة بتقديم وثيقة ان هو ووالداه لا يحملوا جنسيات اخري

---

الموضوع غير سياسي لو سمحت

انا باستدل علي ان الخلاف الذي اثير حول الموضوع هو مصدر المعلومات القانةتيه ليه

Sent from my SM-N900 using Forum Runner

ايه يا جماعة

هو أنا الوحيد هنا اللي مستنكر الموضوع

يعني عادي الواحد يتنازل عن جنسية بلده لأي سبب كان ؟!!

و من أمتى اي دولة خليجية بتدي جنسية لأي حد .. و لمصري و مصرية كمان ؟! أنا اعرف ناس بتتولد و تموت في الخليج و تقضي ما يقارب ال 70 سنة طمعا في الجنسية و لا ينالوا شيئا

ببساطة لو اتنازلتي عن جنسيتك هتبقى (بدون) .. زي البدون بتوع الكويت .. اللي كتير منهم اتنازلوا عن جنسياتهم الأصليه طمعا في الكويتية .. و لا طالوا بلح الشام ولا عنب اليمن زي ما بيقولوا

مش عايز اقولكم ان التنازل عن الجنسية المصرية كاأنه لم يكن مع واحد صاحبي ارني لدرجة انه عمل باسبور وبطاقة وكل حاجة هنا في مصر علي اساس انه لسة معاه الجنسية المصرية

مش عارف ليه لازم التنازل عن الجنسية المصرية
عندي حالات كتير بين المعارف والأصدقاء معاهم باسبورات أجنبيه
و بيدخلوا بالباسبور المصري عادي,
فيه منهم واحد اعرفه شخصيا عنده 55 سنه و طلع بطاقة رقم قومي و فيها مهنة كمان و قبل الثورة 2010.
و هو معاه جنسية اجنبيه بقاله 20 سنه !

السعودية بتشترط عدم الازدواج فى الجنسية مش مصر للى الناس اللى بتسأل ليه تتنازل

هى الفكره هل لو خدت لو اتنزلت عن الجنسيه المصريه.....مين اللى حيبلغ الحكومه انها اتنازلت ؟؟
هل بيتم اعلام القنصليه او الحكومه المصريه ان الشخص اتنازل عن الجنسيه؟؟
لان لو محدش اعلم الحكومه او القنصليه يبقى مفيش اى مشكله وحتتعامل عادى على انها مصريه.
رأى الشخصى لحضرتك انك تروحى القنصليه المصريه فى السعوديه اكيد عدى عليهم حاجات زى دى وممكن يوضحولك لو الموضوع بتاع التنازل دا يعملك مشكله ولا عادى.

طيب سوال بقى ازاى الواحد يسقط الجنسية ؟
انا مش بكلم ليا
انا بكلم لانى اعرف ناس برة قاعدين بشكل غير قانونى
ومن ضمن الحلول انهم يسقطو جنسية ويطلبو حق اللجوء
بس مش عارفين يسقطوها ازاى؟
حد يقدر يفيد ويبقى عمل خير للناس دى

احذرى ثم احذرى ثم الف مرة احذرى من التنازل لان التنازل قد يترتب علية ان تكوت بدون فاهمة يعنى اية بدون يعنى بدون جنسية نعم الخليج بة الملايين بدون وهم كانوا مثل حضرتك سيدات وابناؤهم المتزوجات من الخليجيين ولما كانت تصر على السفر يلجؤون لتلك الحيلة ثم يتم رفض اعطاؤهم الجنسية فتصبح بدون وبالتالى مع الاحترام مثل الجارية لاتستطيع حتى السفر الى بلدها الام الا بتصريح كتابى من الزوج

ولو صرتى سعودية نفس الكلام لاسفر لامريكا والكلام دة الا بموافقة الزوج الكتابية

سيبك من الهبل بتاع ان الجنسية السعودية تساعدك فى الحصول على اى فيزة كلام فااااااااااااااارغ واللى بيقولة جاهل جهووووووووووووول

جميع دول الشرق الاوسط تعامل معاملة سيئة بخصوص الحصول على التاشيرة لاى بلد اوربى ولابد من توافر عنصر التاكيد على العودة مرة اخرى قبل الحصول على التاشيرة

نصيحة من واحد عاش فى الخليج 22 عام لاتتنازلى مهما كانت المغريات لان القانون السعودى يمنع المراة من السفر بدون اذن مكتوب وطبعا الزوج عارف الكلام دة علشان كدة يحاول كل الطرق للتنازل فتصبح السيطرة مطلقة فى التحركات

معلش الكلام جامد ولكنها الحقيقة المرة

مصر من الدول اللى بتسمح بالجنسيات المزدوجة

The amount of
فتي
In this thread is too damn high

اقتباس:

---

المشاركة الأصلية كتبت بواسطة bekatcho

طيب سوال بقى ازاى الواحد يسقط الجنسية ؟
انا مش بكلم ليا
انا بكلم لانى اعرف ناس برة قاعدين بشكل غير قانونى
ومن ضمن الحلول انهم يسقطو جنسية ويطلبو حق اللجوء
بس مش عارفين يسقطوها ازاى؟
حد يقدر يفيد ويبقى عمل خير للناس دى

---

مفيش اسقاط للجنسية المصرية قبل الحصول على غيرها

سأوضح مالدي في نقاط نظرًا لتشابك الموضوع
- هل حضرتك رحتي السفارة الأمريكية ؟ لإن إبتعاث الشركات و المراكز في السعودية بتبقى موافقتهم على الرسوم وتكلفة السفرة فقط
لكن موافقتهم لا تعني الموافقة على السفر , أنا لما بطلع مؤتمر ولا كورس تبع الشركة لازم اعمل إنترفيو في السفارة
وفيه توجه في السعودية ودعم ملحوظ للإبتعاث و يوجد آلاف المبتعثين و المبتعثات والعدد في تزايد مستمر ولا يوجد عوائق حتى أنهم يدفعون تكلفة المرافق لكِ
فلا يوجد مشكلة ( إلا موافقة الزوج أو ولي الأمر فحرصي عليها )
- في موضوع الجنسية طالما كملتي النقاط إذًا الجنسية تصدر إلا لو ظهر مايمنع وفي حالتك مستبعد
- إصرار زوجك متوقع بعد طلب الإنفصال ودا حفاظًا على بيته مش لأذيتك وهو غير قادر على أذيتك البلد فيها قانون مفعل
- التنازل صوري وهيفضل حبيس السلطات السعودية لحين صدور الجنسية سيتم الإعلان في الجريدة الرسمية ( أم القرى ) عن اسمك
وسيتم سحب جوازك المصري بعد أن تصبحي مواطنة فلا تقلقي من مسألة البدون ( دي قضية تانية خالص )
- أثناء سير المعاملة تستطيعين التنقل بالجواز المصري لحين صدور الجواز السعودي وقتها الدخول لمصر بالجواز السعودي
- أنصحك بالتنازل و التركيز على الحياة في السعودية حتى لا تشتتي نفسك وأبنائك مستقبلًا -لو كنتي بلا أطفال الكلام هيختلف -
- من كلامك في مواضيع سابقة يبدو لنا أن زوجك رجل يريد الحفاظ على بيته فلا تسيئي الظن به هو أكثر من يخاف عليكِ
- لن تفقدي من التنازل إلا دعم السفارة في حالة أردتي اللجوء لها و التعامل مع جهة أجنبية وخارجية أصعب بكثير على زوجك من التعامل مع جهة داخلية
- الجنسية السعودية مفيدة في حالة أردتي الإتجاه للنشاط التجاري , أو طلب قروض ميسرة من الحكومة
- في المستقبل إذا كان لك أبناء لن يكون بإمكانك المغادرة إلا بموافقة وليهم ( الأب أو العم ) فحتى لو إنفصلتي أو توفى زوجك لاقدر الله
مايربطك بالسعودية أصبح أبنائك فسفرك لمصر أصعب من ماتتخيلي حتى بوجود الجنسية
- توكلي على الله و تنازلي و قدمي الثقة والخير له فهو على أي حال يسعى للحفاظ على منزله وهذا حقه , حتى وإن فارقتيه فالجنسية مفيدة وضمان وحماية لكِ طالما أنك باقية لأجل أبنائك.
أرى أن هذه المرحلة حتمية الحدوث و خطوة لا بديل عنها

اقتباس:

---

المشاركة الأصلية كتبت بواسطة eso101

سأوضح مالدي في نقاط نظرًا لتشابك الموضوع
- هل حضرتك رحتي السفارة الأمريكية ؟ لإن إبتعاث الشركات و المراكز في السعودية بتبقى موافقتهم على الرسوم وتكلفة السفرة فقط
لكن موافقتهم لا تعني الموافقة على السفر , أنا لما بطلع مؤتمر ولا كورس تبع الشركة لازم اعمل إنترفيو في السفارة
وفيه توجه في السعودية ودعم ملحوظ للإبتعاث و يوجد آلاف المبتعثين و المبتعثات والعدد في تزايد مستمر ولا يوجد عوائق حتى أنهم يدفعون تكلفة المرافق لكِ
فلا يوجد مشكلة ( إلا موافقة الزوج أو ولي الأمر فحرصي عليها )
- في موضوع الجنسية طالما كملتي النقاط إذًا الجنسية تصدر إلا لو ظهر مايمنع وفي حالتك مستبعد
- إصرار زوجك متوقع بعد طلب الإنفصال ودا حفاظًا على بيته مش لأذيتك وهو غير قادر على أذيتك البلد فيها قانون مفعل
- التنازل صوري وهيفضل حبيس السلطات السعودية لحين صدور الجنسية سيتم الإعلان في الجريدة الرسمية ( أم القرى ) عن اسمك
وسيتم سحب جوازك المصري بعد أن تصبحي مواطنة فلا تقلقي من مسألة البدون ( دي قضية تانية خالص )
- أثناء سير المعاملة تستطيعين التنقل بالجواز المصري لحين صدور الجواز السعودي وقتها الدخول لمصر بالجواز السعودي
- أنصحك بالتنازل و التركيز على الحياة في السعودية حتى لا تشتتي نفسك وأبنائك مستقبلًا -لو كنتي بلا أطفال الكلام هيختلف -
- من كلامك في مواضيع سابقة يبدو لنا أن زوجك رجل يريد الحفاظ على بيته فلا تسيئي الظن به هو أكثر من يخاف عليكِ
- لن تفقدي من التنازل إلا دعم السفارة في حالة أردتي اللجوء لها و التعامل مع جهة أجنبية وخارجية أصعب بكثير على زوجك من التعامل مع جهة داخلية
- الجنسية السعودية مفيدة في حالة أردتي الإتجاه للنشاط التجاري , أو طلب قروض ميسرة من الحكومة
- في المستقبل إذا كان لك أبناء لن يكون بإمكانك المغادرة إلا بموافقة وليهم ( الأب أو العم ) فحتى لو إنفصلتي أو توفى زوجك لاقدر الله
مايربطك بالسعودية أصبح أبنائك فسفرك لمصر أصعب من ماتتخيلي حتى بوجود الجنسية
- توكلي على الله و تنازلي و قدمي الثقة والخير له فهو على أي حال يسعى للحفاظ على منزله وهذا حقه , حتى وإن فارقتيه فالجنسية مفيدة وضمان وحماية لكِ طالما أنك باقية لأجل أبنائك.
أرى أن هذه المرحلة حتمية الحدوث و خطوة لا بديل عنها

---

اخيرا بوست خالي من الفتي :)


اضيف على كلامك : الجنسية السعودية = حرية التنقل و العمل و التملك و الاستثمار في كافة دول مجلس التعاون الخليجي بلا قيود او شروط او تاشيرات او كفيل او تصريح عمل

لو انتى خايفة من جوزكى انه يغدر بيكى
هل يا ترى الجنسية المصرية اللى حتحميكى اكتر ولا الجنسية السعودية؟
ده سؤال وليس استنكار

مش عاوز افتى
لكن التنازل عن الجنسيه المصريه بيبقى فى مصر مش من السعوديه
يتهيألى فى حالتك دى انتى حتتنازلى قصاد السعوديه يعنى كأنك بتتعهدى للسعوديه انك مش معاكى جنسيه تانيه
لكن فى مصر انتى زى ما انتى معاكى الجنسيه