الموضوع: عاوزين نهاجر

ياجدعان مش عايزين فتى اللى عنده معلومات مؤكدة يقولها
ولازم صاحب الموضوع يحدد هو عايز ايه بالضبط هيروح شغل ولا استثمار و المبلغ اللى معاه كام يعنى
اولا عشان الفتى الكتير دول الاتحاد الاوروبى وخصوصا غرب اوروبا كلها متشابهة وصعبة من ناحية الهجرة و الاستثمار يعنى مش هتفرق رايح فرنسا من النمسا الخ- وفى الغالب دول الاتحاد الاوروبى مفيهاش هجرة بالمعنى المتعارف عليه ده الواحد بيشوف طريقة ياخد اقامة بيها ويروح يقعد كام سنة لحد ماياخد الاقامة الدائمة و الجنسية
وبرضه استراليا وكندا ونيزلندا تقريبا نفس الشروط المعقدة المعروفة اما استثمار الملايين او وظيفته تبقى مطلوبة هناك ويقدم هجرة او اذا كان يروح عقد عمل
طيب كده خلصنا من الرخى عن الدول المعروفة اللى العالم كله عايز يهاجر لها كندا واستراليا وغرب اوروبا
----
طيب اسيا نفكر فيها بس فعلا لو صاحب الموضوع بيدور على وظيفة مش هيبقى له مكان لان اللى عايز يروح هناك يروح استثمار طبعا جايز الاستثمار هيبقى ارخص من اوروبا بس محتاجة بحث اكتر اسيا لو حد عنده معلومات اكيد هينفعنا
---
نيجى لصديقنا باسم يوسف اللى فاضحنا فى الفضائيات
افريقيا من الاخر مش مضمونة ومتصلحش للهجرة العائلية ده غير الامراض و الايبولا الخ
عندى صديق ليا قالى انه برغم انه شغال هناك بقاله فترة كبيرة بس عمره مافكر يهاجر لهناك او يجيب عيلته عشان المستوى برضه مش متقدم ده غير الايبولا
طيب بالنسبة لاستونيا ومعظم بلاد شرق اوروبا اللى ضمن الاتحاد الاوروبى هتبقى اسهل نسبيا بس مش هتبقى بجودة الحياة فى اوروبا الغربية و المعظم بياخدها كمعبر بس للاسف المعلومات عن الدول دى غامضة شوية بس وبصراحة المعلومات اللى انا دورت فيها كانت عن تاسيس الشركات مش الشغل
وللاسف انا دورت فى المناطق دى ملقيتش غير ليتوانيا هى البلد اللى ممكن اروحها انا وعيلتى بس هنضطر ندفع 5000 يورو ضرايب فى السنة ومعرفش هفتح ايه و الدخل كام الخ يعنى لازم نجمع بعض كناس عايزين نهاجر ونطلع ناخد جولة فى الدول ونشوف هنختار ايه
بس انا صراحة واقع على الاخر فلو جاتلى اى حاجة فى اوروبا هروح وش بس للاسف معنديش خبرة كبيرة فى الاستثمارات ومش عارف هفتح ايه و دخل المشروع هيجيب مصاريف المعيشة هناك ولا هشحت
--
طيب نرجع لصديقنا عمر فراج
دول اوروبا سهلة وجميلة لو معاك فلوس قبرص و اليونان لو اشتريت عقار بقيمة 300 الف يورو تاخد الاقامة تقريبا
لاتفيا 72 الف يورو تقريبا (مع انها دولة واقعة)
فياترى ايرلندا بجلالتها هتبقى اسهل من الدول الواقعة؟
---------
بعد الكلام ده كله نلاحظ اننا لسة مش عارفين هنروح فين :)
ياجدعان حد يقولنا نروح فين
تقريبا صاحب الموضوع عايز يروح شغل فلازم يشوف بقى ومش عارف اذا عرف يجيب مثلا عقد عمل وياخد تاشيرة عمل هل ممكن يروح هو واسرته والبلد اللى يروحها يبقى يقدم بقى من هناك على اقامة
؟
-
وبدل مانفتح موضوع تانى الناس اللى مش هتنفع تشتغل برة اصلا بسبب طبيعة شغلها وشهادتها مش هيبقى قدامها غير الاستثمار ومن الواضح ان الفئة دى اللى انا منهم مش عارفين نروح فين او نستثمر فى ايه بس هو بالتخمين كده اما هتبقى فى دول اسيوية زى ماليزيا (ودى ممكنة فى ظروفى لو انى شفت وقريت حاجات كتير كرهتنى فيها بس لو ملقيتش غيرها هطلع اجرب) و الدول دى او شرق اوروبا
ياريت لو حد بقى يشوف الفئة دى ويفكرنا برة الصندوق ايه يارجالة محدش مثلا راح اى حتة فى اى حاجة لقاها كويسة عشان احنا تعبنا من البحث إن شاء الله لو فى دول فى اوروبا الشرقية محترمة ومتكونش تبع الاتحاد الاوروبى
اى حاجة العبد لله واقع على الاخر اصلا وكتير معايا
(سر: الواحد قلبه فى اوروبا مش عارف ليه)

مينفعش يارجالة يبقى اخرى انى افتح خريطة العالم كل ساعتين ادور على حتة اروحها

حضرتك ممكن تجرب تاخد ميعاد مع سفاره ايرلندا و تفهم منهم كل التفاصيل
انا قولت اللي اعرفه من واقع تجربه واحد قريبي مش اكثر
الموضوع مش فتي و خلاص

عارف انا اتصلت بكام سفارة لحد دلوقتى ياصديقى؟
انا كل سفارة اتصل بيها ترد عليا واحدة بايخة تقولى شوف على النت اقولها طيب بس النت مش موضح تقولى شوف على النت ولا حياة لمن تنادى كانى بشحت
مع ان اما بتكلم مع الاصدقاء الاجانب يقولولى روح السفارة وهما هيفهموك ويرحبوا بيك الخ اجى اتصل الاقيهم بيقولولى دور على النت ريحت دماغى ومبقتش اتصل بدور على النت عيطول :)

المشاركة الأصلية كتبت بواسطة Ahmed_Rahem

الهجرة للموظف او العامل محتاجة 3 حاجات رئيسية:
1- ورق سليم: بمعنى مش هجرة غير شرعية ودخول بدون تاشيرة او كسر تاشيرة الخ، وان شورط الاقامة - التى تؤهل للحصول على الجنسية تنطبق عليك.
2- مهارات مطلوبة: مهنتك مطلوبة وفيها نقص فى البلد الى انت بتفكر فيها، طب لو لأ تقدر تميز نفسك عن باقى سوق العمل، بالخبرة الكبيرة والمتنوعة، شهادات مهنية او اكاديمية متخصصة فى مهنتك.
3- رأس مال: مبلغ يكفيك انة يعيشك اول 6 شهور بدون عمل - على الاقل.

بالنقاط دى اى بلد راح تنجح فيها وكله بمجهودك، دة غير هجرة الاستثمار ودى بتحتاج مبلغ وقدرة بالجنية المصرى ومش الكل يقدر عليها.

فقبل متقول انهى دولة، تقدر توفر اية من الى فوق دول.

مثلاً بالنسبة ليا كندا، مقفولة لان مهنتى مش مطلوبة خالص، استراليا ممكن، غرب اوروبا صعبة جداً لان كل شهاداتى هناك الكل واخدها مفيش غير انك تجيب عقد عمل هناك وتسافر بية، شرق اوروبا ممكن علشان شهاداتى نادرة هناك.

وربنا يوفقنا جميعاً

اللى اقدر عليه هو النقطه الاولى و الثالثه (الاوراق السليمه و المال )
انا بسألكم تحديدا علشان النقطه الثالثه (فرصه العمل )
بالنسبالى العمل بتاعى بيبقى مطلوب فى كندا بس خلاص تقريبا النوك بتاعى خلص السنه دى و السنه اللى جايه حيعملو نظام Express Entry اللى حيقلل فرص الموافقه على الناس حتى اللى مهنهم مطلوبه

الاهم من ده انى عاوز اشوف قصص نجاح بره توضحلى الدنيا عامله ايه - يعنى كندا الواحد نفسه مفتوحلها لإنه عرف اللى فيها بادق التفاصيل من خلال قرئته لاكثر من تجربه
لو الواحد كان بطوله كنت حقول اهه ارمى نفسى فى اى بلد و زى ماتيجي لكن احنا اسره باطفال دلوقتى

المشاركة الأصلية كتبت بواسطة zorg

نيجى لصديقنا باسم يوسف اللى فاضحنا فى الفضائيات
افريقيا من الاخر مش مضمونة ومتصلحش للهجرة العائلية ده غير الامراض و الايبولا الخ
عندى صديق ليا قالى انه برغم انه شغال هناك بقاله فترة كبيرة بس عمره مافكر يهاجر لهناك او يجيب عيلته عشان المستوى برضه مش متقدم ده غير الايبولا

يرجي قراءه الردود بعنايه قبل الرد عليها

و لم تكن متزوج و ليك في البيزنس كنت قولتلك علي تنزانيا او كينيا او حتي تتعلم استوني و تروح استونيا

بس حضرتك متجوز و ملكش في البيزنس فهقولك ربنا يتولاك :))))

طيب بالنسبة لاستونيا ومعظم بلاد شرق اوروبا اللى ضمن الاتحاد الاوروبى هتبقى اسهل نسبيا بس مش هتبقى بجودة الحياة فى اوروبا الغربية و المعظم بياخدها كمعبر بس للاسف المعلومات عن الدول دى غامضة شوية بس وبصراحة المعلومات اللى انا دورت فيها كانت عن تاسيس الشركات مش الشغل
وللاسف انا دورت فى المناطق دى ملقيتش غير ليتوانيا هى البلد اللى ممكن اروحها انا وعيلتى بس هنضطر ندفع 5000 يورو ضرايب فى السنة ومعرفش هفتح ايه و الدخل كام الخ يعنى لازم نجمع بعض كناس عايزين نهاجر ونطلع ناخد جولة فى الدول ونشوف هنختار ايه
بس انا صراحة واقع على الاخر فلو جاتلى اى حاجة فى اوروبا هروح وش بس للاسف معنديش خبرة كبيرة فى الاستثمارات ومش عارف هفتح ايه و دخل المشروع هيجيب مصاريف المعيشة هناك ولا هشحت

و الله دول شرق اوروبا مش هتبقي اسوأ من مصر بأي حال من الاحوال

ممكن تفتح مشروع رأس ماله 16 الف يورو في استونيا و تاخد اقامه

انا شبه متأكد من المعلومه دي و ممكن تروح السفاره تتأكد هناك