الموضوع: نهايه قصتى مع فتيس فانتازيا واستفسار عن بيع الفتيس القديم

السلام عليكم

اخبار الرجاله ايه ! كل سنه و انتو طيبين

دلوقتى يا رجاله انا زى مانتو عارفين كنت عامل موضوع ان التوكيل الله يسامحهم كان عمل مشكله مع قربه المياه و سخنت الفتيس و خلت الفتيس يضرب كلاتشات و طلع incorrect gear ratio 3 error و بعد طبعا ايميلات مع ألمانيا فى الاخر فكسولى و محدش رد عليا فى الاخر و طبعا الحلول الى كانت قدامى انى اصلح الفتيس فى حدود 8000 جنيه بانى اغير مجموعه الكلاتشات بس الكل اجمع ان بعد فتره فى حدود سنه المشكله هترجع تانى ده غير طبعا ان الفتيس هيتفتح و الى بيتفتح مبيرجعش زى الاول و الحل التانى انى اغير فتيس كامل و لما لفيت الحرفيين كله كان بيتكلم فى اسعار من 13500 لحد 16000 بس كان كل دول بتوع A5 مش فانتازيا و ابو 16 ألف ده كان بتاع A5 اخر الموديل 2009 الى هو ال solenides بتاعته صغيره زى الفانتازيا وانهم مبيجبوش فانتازيا لانها بتنزل بره 2000 سى سى او 1400 تربو فهتكون بفتيس DSG بانا مقتنعتش بالكلام ده الصراحه وواحد صاحبى قالى ان واحد معاه فى الشغل شغال فى الحاجات دى و ممكن يظبطك و انا الصراحه قولت حد ثقه احسن من الباقى فقالى هجيبهولك و مكلش دعوه تعالى يوم الاتنين بس و الصراحه الراجل متأخرش ثانيه كلمنى يوم الاتنين و قالى فتيسك جه و فاكينها من نص فانتازيا 1600 جاى من دبى المهم اخدت الفتيس ب 17500 و اتوكلنا على الله تانى يوم العصر كلمنى قالى تعالى جرب الفتيس فروحت جربنا و كله تمام و الحمد الله بس و عدى اسبوعين العربيه مفيش اى شكوى بس النفسيه و الوسوسه الى عندى خلتنى مش مرتاح نهائى فرحتله و قولتله انا عايز أبيع العربيه الكلام ده كان يوم الاحد الى قبل العيد فقالى هشوفلك حد و بعدين لاقيته يوم الثلاثاء بيكلمنى بيقولى فى واحد عايز يشوف العربيه فسيبتله العربيه و قلتله سيبه يكشف مكان ما هو عايز و اى وقت عشان انا مبظلمش حد و على مدار يومين الراجل كشف على العربيه عند كذا حد و طلعله التقارير بالاتى العربيه كانت محتاجه (جلبه مقص يمين - شداد فتيس"عشان من الفك و التركيب خفت شويه" - كاوتش جديد - زجاج امامى عشان كان مشروخ) المهم فصال من هنا لهنا بعت العربيه ب 156 ألف و خلصتله كل ورقها يوم الخميس الى قبل العيد و الحمد الله

ناس كتير طبعا قالتلى حرام بعد الصرف ده تبيع العربيه طب كنت تصلحها و تبيعها وانا كان رائى واضح ان مش اصلح العربيه و بعد فتره تضرب و اكون بعتها يبقى انا كده لبستها لحد يبقى اكون ظلمته و حرام عليا ووالدى قالهالى كلمه بالحرف "صلحها صح كأنها هتعد معاك عشان مش عايزين نظلم حد لو بيعنها" والكلام ده كان قبل قرار البيع اصلا

كده القصه خلصت والحمدلله على كل شئ سؤالى بقى يا رجاله المهم الفتيس القديم الى عندى كان التوكيل لما عرفت المشكله قالو ان الفتيس عقله سليم والمشكله فى مجموعه الكلاتشات هل بناء على ال error الى طلع ده يبقى كلامهم صح و لو كده فتيس زى ده ممكن يتباع مثلا قطع غيار لو العقل بتاعه سليم بكام !!!