الموضوع: تعارف و سؤال للاخوة الاحبة

المشاركة الأصلية كتبت بواسطة sromolla

سلام الله عليكم و رحمته و بركاته

وعليكم السلام ورحمة الله وبركاتة

اولا اعرفكم بنفسى : اخوكم فى الله
عبدالمنعم على
مدرس

أهلا وسهلا بحضرتك نورت المنتدي عموما وقسم سكودا بشكل خاص
اشتريت عربية سكودا فليشيا موديل 1996 و اللى اشترالى اظن انه اعطانى هدية جزاه الله خيرا
فأساسيات السيارة كويسة جدا ,,

ألف مبروك ربنا يجعلها خير ليك وعليك ويكفيك شرور الطريق
أحب أقول لحضرتك اختيار موفق
دواخل و الفرش و الصالون و السقف و القوايم و الشنطة بالفعل فابريكة , الماتور ناعم و اعتقد انه سليم , كل هذا حسبما قاله الاصدقاء و الاقربون و و لم اجد نقدا لها الا ان قطع غيارها غالية و غير متوفرة بشكل جيد

أقول لحضرتك قطع غيارها متوفرة بشكل مناسب وأضيف كمان أنها بأكترمن درجة فمنها ألماني أو تشيكي ومنها التركي أو الصيني حسب اختياراتك
و دى التجربة الاولى ليا فى عالم السيارات , فعلاقتى قبلها بالسيارات كعلاقة شاشة الكمبيوتر بسندوتش الفول

===============================

ثانيا احب اشكر الاخوة الافاضل فى المنتدى خصوصا فى قسم الفليشيا , لان و الحق يقال ما رأيت الا تعاون و تواصل رائعين , اسأل الله دوام الود و التأخى بينكم , و اتمنى قبولى بينكم ضيف خفيف , و لو انى سأبدأ بالاسئلة و الاسفسارات , و ده لانى جديد جدا فى هذا العالم و رجائى ان اتعلم منكم ما استطيع , و احسبكم لن تبخلوا عليا فى التعليم جزاكم الله كل خير عنى و عن الاخوة المنبتدئين امثالى ,,

نتشرف بحضرتك فى كل الاوقات وكلنا هنا بنحاول نساعد بعض متي استطعنا ذلك وكلنا فى الاول دخلنا القسم اتعلمنا وتبادلنا الخبرات

===============================

تجربتى البسيطة جدا مع السيارة ,,
الحمد لله , تجربة جميلة البداية و رقيقة التعارف بينى و بين الفليشيا , انا اتعلمت عليها القيادة و الكلام ده من حوالى اسبوعين ,, فالحمد لله السيارة ناعمة و ليس بها اى عيب ظاهر غير البسيط مثل :

1- العربية بتشرق كتير جدا , ( باستعمل بنزين 80 ) فهل المشكلة من عندى خصوصا انى رجلى تقيلة و انا مش عارف اريح العربية ؟

موضوع الشرقة مش هفصل فيه غير لما حضترك تاخد حساسية العربية والدواسات

2- العربية بتحتاج زيادة مياه كل يوم و بكمية كبيرة قد يكون ثلث القربة تقريبا , فهل ده طبيعى ؟( بزود المياه من الحنفية)

طبعا كدة زيادة عن الطبيعي بس عموما لو حضرتك بتشتكي من أى مشكلة يفضل ترتيب الحلول الاسهل ثم السهل ثم يأتي الاصعب

هنقول مشكلة نقص المياة تسريب مثلا من الردياتير أو الوصلات أو القفزان أو من عند وصلة الشجرة وأحب أقول لحضرتك ان فيه أماكن يتسرب منها المياة وحضرتك متشوفهاش غير لو دققت ونزلت تحت العربية

3- الزيت بيقل , ,,, اول ماخدتها غيرت زيت و كان مستوى الزيت اعلى من العلامة المطلوبة , الوقتى و بعد سير حوالى 100-150 كيلو اليوم لاقيت مستوى الزيت فى منتصف المستوى المطلوب فى مقاس الزيت فهل ده طبيعى ؟

أولا حضرتك لازم نختار زيت مناسب لعربيتك وأنا أرشحلك شيل الاحمر جركن مغلق 4 لتر مرة تغير فلتر الزيت وتحط الجركن بالكامل والمرة اللى بعدها تغير زيت بس منغير الفلتر وساعتها العربية هتاخد أقل من 4 لتر وأحب أقول لحضرتك لازم تظبط مقاس الزيت بقدر الامكان ومتخليش الزيت أكتر من اللازم يمكن لو أقل من المطلوب بحاجة بسيطة مفيهاش مشكلة ...... طيب نيجي لمشكلة نقص الزيت ياتري العربية وهيا دايرة بتشوف دخان من الشكمان ولو فيه دخان ياتري لونه اية ... عارف الغطاء الاحمر اللى بتشيلة وبتحط الزيت الجديد ياتري الغطي نضيف ولا عليه اثار حاجة زي الطحينة

كمان لما بتزود ماية فى القربة ياتري بتلاقي القربة نضيفة ولا فيها اثار زيت
كل الاسئلة دي إجابتها من حضرتك هتحددلنا سبب المشكلة وإن شاء الله بسيطة

4- بتستهلك بنزبن بفظاعة , فحسب المسافة المقطوعة استهلكت + 30لتر بنزين هل ده عيب فى العربية ؟ و يتعالج ازاى ( انا بامشى بيها تاتا تاتا ) لان الشوارع عندنا متبهدلة كمان لسة فى مرحلة تعليم الا فى مشوار بسيط فتحت بيها على سرعة + 80 كم /س و كانت رائعة و بتسحب كويس

موضوع إستهلاك البنزين دة بالنسبالي قتل بحثاً من فترة طويلة

أولا حضرتك لسة جديد فى السواقة ولسة رجلك ماخدتش الحساسية المناسبة على البدالات وموضوع الاستهلاك مش هتقدر تحددة دلوقتي وخصوصاً أن الـ 100 كيلو اللى حضرتك مشيتهم بالعربية أكيد مش مرة واحدة يعني على 3 أو 4 مرات دة غير فترات تسخين العربية
هقولك لو حابب تحسب إستهلاك البنزين تعمل اية بالظبط

هتفول العربية للاخر وتطلع مشوار بيها لمسافة 100 كيلو مثلا بس يكون طريق مفتوح أو سفر وبعد متمشي الـ 100 كيلو ارجع فول العربية تاني واحسب الاستهلاك ( المسافة المقطوعة ÷ عدد الليترات = تقدر تحسب كل لتر مشي العربية كام كيلو ) وفى الطبيعي الليتر بيعمل 11 كيلو لو عربيتك مظبوطة على الشعرة و10 كيلو للتر مناسب بردو ..... ومتنساش طبعا حالة الطريق وحمولة العربية والسرعة كمان

===============================

اسف:zb_sor1[1]: على الاطالة و كتر الاسئلة و عشمى فى الاخوة ما بيقصروا و لا تنسونا بالنصائح اللى تساعدنى فى الحفاظ على العربية و تساعدنى فى تلك الفترة كمبتدئ فى القيادة و كمبتدئ فى عالم السيارات عموما و جزاكم الله خيرا

بجدد التحية لحضرتك وأهلا بيك وسهلا فى كل الاوقات وأسف على الاطالة فى الرد وأرجو أن اكون أضفت لحضرتك شيئ جديد