تعارف و سؤال للاخوة الاحبة

**AYMAN616** · 12-10-2014 10:13 PM

ربنا يباركلك يا عم صبحى و يجزيك عنا كل الخير

**أحمد جودة** · 13-10-2014 09:46 AM

المشاركة الأصلية كتبت بواسطة sromolla

السلام عليكم و رحمة الله و بركاته ,

وعليكم السلام ورحمة الله وبركاته
جزيل الشكر اخى احمد على اثراء الموضوع و تعطيره بنصائحك ,

الشكر لله وحدة استاذي الكريم واشكرك على كلماتك الجميلة
كنت مشغول فى ترخيص و نقل الترخيص باسمى فى المرور اليوم و امس و اول امس ,
سؤال مالوش علاقة بالموضوع هيا عربيتك تبع اى مرور

اولا بالنسبة لنقص المياه : لاحظت ان العربية تحتها مياه تحت الريدياتير مباشرة و لوحظ ان الريدياتير تقريبا بيخر , و الله اعلم منين حتة بالظبط و اعتقد ده محتاج يروح لصناعى ريدياتير للحامه

زي ماقولت لحضرتك قبل دة لما تصادفك مشكلة خد الموضوع من الاسهل الى الاصعب ..... إزاي احتمال كبير التسريب يكون من خرطوم مثلا ودة سبب نقص المياة عموموا سهلة هتروح لحد بتاع ردياتير يبصلك على الدايرة كلها ويشوف الردياتير محتاح لحام مثلا ويحددلك حالته ولو لقيت حالتة مش ولابد يبقي ريح دماغك واشتري جديد افضل يبقي كدة حلينا مشكلة نقص المياة

اما بالنسبة للزيت فلاحظت بقعة زيت تحت العربية و لكن مرة واحدة بس تحت الموتور مباشرة ,, فى العادة بركن العربية و لا اجد تحتها اى بقعة

طيب موضوع تسريب الزيت تغسل العربية من تحت وتلاحظ بعد كدة بداية التسريب منين أحتمال مثلا أويل سيل الكرنك أو جوان الكارتيرة بتاعت الزيت

======================
ثانيا اثناء فحص العربية فى ادارة المرور لوحظ دخان احيانا اسود و احيانا ابيض خارج من الشكمان

موضوع الدخنة بردو بمبدأ الاسهل اولاً هنقول الكاربيراتير مش مظبوط ودة يأكدة صنيعي كاربيراتير محترم قبل مانقول فيه مشكلة فى الموتور ومتقلقش الدخنة السودة ممكن نتيجة زيادة نسبة البنزين العربية مبتقدرش تحرق كويس ودي بطة كهربا مع كاربراتير
والدخنة البيضا ممكن جوان المانيفولد

و بناءا عليه تم رفض اتمام الترخيص و اعطانى مهلة شهر للاصلاح , و الكلام ده كان امبارح ,

طيب انا اسف اني اقول لحضرتك الكلام دة (( كنت ظبط مهندس الفحص علشان يخلصلك اجراءاتك وبعد كدة لو فيه حاجة فى العربية نعملها على رواقة وتكون خلصت نقل الملكية والترخيص والفحص )) علشان كدة كنت بسئل حضرتك انتا تبع اى مرور وعلى فكرة انا يوم مكنت بفحص المهندس اصلا مشفش العربية من اساسة اخد اللى فيه النصيب ومضي على الفحص منغير مايشوف العربية

فرحت للميكانيكى علشان اقوله على مشكلة الدخان فقالى ان دى مشكلة كاربرتير فروحت لبتاع الكاربرتير لاقيته زحمة جدا و كنت مستعجل على شغلى فاضطريت امشى و رجعتله بالليل لاقيته قفل و هاروحله بكرة ان شاء الله

على فكرة لو ميكانيكي كويس ممكن يعملك كل حاجة فى العربية ينضفلك الكاربيراتير ويظبطة ويظبتلك كهربا

=========================
سؤال اخير يا شباب , عداد السرعة عندى مش شغال كمان عداد المسافة بتاع الزيت و الكهربائى قالى انه عايز اغير واير سرعة , فهل لو غيرت الواير العدادين السرعة و المسافة هايشتغلوا ؟؟

خلي مشكلة العداد فى الاخر وخد الموضوع أولويات وعموما الواير سهل تغيرة وان شاء الله العداد يشتغل بس فيه حاجة تانية اسمها ساعة الفتيس وهي عبارة عن ترس بلاستيك بياخد حركته من الفتيس علشان يقيسلك السرعة والمسافة

=========================

متأسف للاطالة بس عذرا لانكم علمتم انى جديد جدا على العالم ده

دمتم بود

عموما ان شاء الله المشاكل دي تطلع بسيطة ويكون الموضوع ماهو إلا ظبط كهربا وكاربيراتير مع تظبيط الردياتير والعربية تبقي تمام فى زيارة واحدة للميكانيكي وفي يوم واحد

هفكرك تاني

مشكلة الزيت أنا شاكك في تسريب الزيت بسبب اويل سيل الكرنك او جوان الكرتير

مشكلة نقص الماية زي ماحضرتك قولت تسريب من الردياتير والوصلات

نصيحة متديش ودانك للصنايعية اللى يقولك طقم شنبر ونص عمرة والكلام دة الموضوع ممكن يبقي حاجات بسيطة وتدبس فى مصاريف ملهاش اخر ...... وعموما لو حضرتك من القاهرة ممكن اتفق معاك على يوم وعلى مكان مناسب ليا وليك واحاول اساعدك فى حل مشكلتك على ارض الواقع وربنا يوفق ان شاء الله

تقبل خالص تحياتي

**sakr_skoda** · 13-10-2014 11:49 PM

مبروك وانشاء خير***

**أحمد جودة** · 16-10-2014 01:44 PM

المشاركة الأصلية كتبت بواسطة SroMolla

الله يبارك فى عمرك استاذ صبحى
و لو انى متقل عليك و على الاخوة لكن متعشم فيكم و جزاكم الله عنى كل خير
شوية اسألة من فضلك ,
ازاى اعرف ان زيت الفتيس عايز يتغير ؟ و لا بيتزود زى زيت الموتور ؟

زيت الفتيس بتشيك عليه مثلا كل ماتغير زيت الموتور أو على فترات أطول ولازم الزيت يكون باين من نهاية واير السرعة

ان كان بيتغير اغيره ازاى ؟ و ان كان بيتزود ازود منين ؟ و ايه افضل نوع زيت لتغييره او تزويده ؟

أى زيت محترم درجة لزوجة 90 درجة وليكن شل مثلا وبفضل العبوات مش السايب

واير السرعة عندى مش شغال و قريت فى الموضوع المثبت انه بيركب فى التابلوه من فوق و فى الموتور من تحت و انا شايف انه فكه من التابلوه سهل ان شاء الله و ممكن افكه لكن يتفك ازاى من الجهة التانية ؟
و لو عايز اشتريه استيراد او اصلى يبقى بيتباع فين ؟ فى التوفيقية ؟
و اسف على الاطالة

واير السرعة فعلا طرف بيتفك من الطابلوة والطرف التاني بصمولة 8 بيتفك من عند مكان تزويد الزيت بس لعلم حضرتك فك الواير من ناحية الفتيس اسهل كتير من الطابلوة لان الطابلوة بردو لية طريقة معينة فى الفك والتركيب

ودة مضوع شارح الطريقة بإستفاضة وبالصور

http://www.nilemotors.net/Nile/329753-a.html