الموضوع: عزل السطح ضد الحراره و الميه

المشاركة الأصلية كتبت بواسطة rotanamasoud

عزل كامل للحراره لازم الواح فل ابيض بسمك5 سم وفوقها طبقه رمل وفوقها طبقه اسمنت وفوقها العازل اللى تختاره
او تكبر دماغك بموضوع غير مكلف لاكن بيتعمل كل سنه فى دخله الشتاء(انا بعمل كده)
بتجيب شكاره اسمنت وشكاره بودره وعامل بيسقى السطح بالخليط ده بيبقى املس جدا وبيسد اى حاجه مع مزاريب والشمس فى الصيف بتشققه فبيتعمل كل سنه

شكرا جدا لحضرتك بس البودره دي عباره عن ايه و بتتجاب منين

المشاركة الأصلية كتبت بواسطة حسام الغرباوي

كنت عملت موضوع كامل عن الحوار دا هبقي اجيبلك الرابط

لكن خلاصة الكلام

1 - لازم يكون عندك مزراب مياه في كل الاحوال او تعمل وصلة علي المجاري
2 - افضل عزل هو عزل الفوم و بيتومين مأكسد مطاط والخيش ( ودا مكلف شوية بس ميزته انه عزل حراري وصوت ومياة )
3 - في عزل حراري فقط اللي هو تجيب فل سمك 5 سم وتعمل عليه اسمنت خفيف من فوق

ملاحظة :: اي طريقة عزل لازم تعمل ميل في السقف شوية وقنوات وتوصلها بمزاريب او علي الصرف

ده الحل اللي انا اعرفه بس مكلف اوي هايخش 7 او 8 الف جنيه بكل حاجه

المشاركة الأصلية كتبت بواسطة grumby78

شوف ياسيدي افضل شيء تعمل موضوع العزل ده زي الكتاب مابيقول عشان انت بتحمي استثمارك ونتيجة العك في الحاجات دي مش بس عدم الراحة لا ده كمان خسارة واعادة اصلاح . حفيدك في حدود معرفتي الاول وبعد كنس السطح تماما يعني ميكونش في ذرة رمل بتدهن بيتومين على البارد او ساخن ودي طبقة تسد بيها المسامات وهيا اوليه . بعدين رولات الانسومات اللي بتتلحم بالباشبوري ودي لازم تجيبها معتمدة وسماكة لاتقل عن 4 مم . لازم كمان تعمل رقبة ازازة على الداير ودي عبارة محارة بميل لكسر الزاوية القائمة اللي بين سور السطح والارضية . لازم كمان اللحامات تكون تمام وبعد مايخلص تشوفها بعينك وتتأكد ان مافيش حاجة هربانة من الصنايعي وكمان يكون الانسومات مكوي مع السور وتحته رقبة الازازة . وبعدها تفتح ميه في السطح للتأكد ان العزل تمام وتسيبها يوم مثلا وتتأكد ان مفيش اي تسريب تحت في الشقة . بعدها في ماده رغوية زي الاسمنت بتعمل فوم بخلطها بالمياه ودي لعزل الحرارة . واخيرا تعمل ضفرة بميل متجهه للمزاريب او جراجير المياه في المناور . الاسعار متغيرة ولا تحضرني بس هيا بالمتر يعني تقيس عندك كام متر مربع وتحط عليها لفف الانسومات - سعرها - وتطليعها - تشوين - والبيتومين وده تحسب حتستهلك كام . ومصنعية العامل او فني العزل . وبكده تقدر تنسى هم العزل وتريح بالك تماما من القصة دي مع الاهتمام بعمل ضفرة نهائية لاتقل عن 10 سم ودي لحماية العزل وعملها بميل وتجري فيها الميه وتتاكد ان الميه مش بتركد على السطح . بالتوفيق

طيب و بعد الشغل ده كله هايبقي السمك كبير لان في شقه بروووف فوق فكده هايبقي ارتفاع البلاط عالي