اغرب اقلاع طائرة بوينج فى التاريخ... مش عارف طبار عملها ازاى!!

**ahmed_eng2001** · 10-10-2014 04:38 PM

المشاركة الأصلية كتبت بواسطة shiko85

طيب و ايه المشكله ؟؟!!
اولا على حسب الـ description بتاع الفيديو دى طائره cargo هتتسلم للشركه اللى هتشغلها و لازم الطائره يتعملها اختبار نهائى خصوصا لــ Control surfaces (أسطح التحكم) زى الـ Ailerons - Elevator - Rudder - Spoilers - Flaps & Slats و اللى هو عمله ده حتى لو مكتوب فالفيديو انه wave good bye فهو بكده عمل الأختبارات دى
# بخصوص السرعه القليله فالطائرات الـ cargo ليها lift off weight مصممه تعمل به
take off & landing و لما تكون الطائره بدون الحموله فالـ thrust المطلوب علشان تعمل take off بيكون اقل كتير جدا من المطلوب و هى بكامل و زنها
# اما المسافه القريبه من الأرض فده عادى و بنشوفها كتير و فيه طياريين بيتعملوا roll + yaw طبعا بعد ثوانى من الـ take off على حسب الـ course اللى هيمشى فيه و الـ destination بتاعته بس طبعا مش اى طيار يقدر يعمل كده لازم يكون محترف لانه ببساطه ممكن يفقد الـ lift force و الطائره تدخل فـ stall و توقع

انا اختلف مع حضرتك فى بعض النقاط .....

المشكلة انه عمل حاجة ملهاش لازمة و هو على ارتفاع منخفض و هو بيعمل اقلاع ... تركيز عالى .. الماكينات بالقرب من طاقتها القصوى ... و مش ملهاش لازمة و بس ... دى كمان حركة خطيرة شوية
حركة الوداع دى .... الطيارين بيعملوها على ارتفاع عالى شوية .... 2000 قدم مثلا
الاختبار النهائى لأسطح التحكم بيكون و الطيارة بتعمل مناورات للوصول لمدرج الاقلاع ... و ده لو حب يختصر وقت التاكسى ... و علشان ميأخر الرحلة .... او بيعملها و هو واقف قبل ما يطلع على الممر ...
انما يعمل اختبار لأسطح التحكم و الطيارة فى الجو ؟؟!!!! ده مش مقبول

سرعة الطائرة على الممر ثابته تقريبا لكل طائرة ... و من المعروف ان فيه سرعتين على الممر ... V1 و دى تقريبا ثابتة ... و Vr و دى كمان تقريبا ثابته ... ( اعذرنى انا مش فاكرهم كام بالظبط للجامبو )
الى بيختلف قدرة دفع المحركات ..... فالطائرة حتوصل لل Vr مثلا ب 85 % من قوة دفع المحركات القصوى ... بدلا من 95 %

المسافة من الارض ... بتختلف من كل مطار و التانى ... و على حسب خبرتى القليلة .... مش قبل ما يصل لارتفاع من 700 قدم .. قبل ما يبدع يعمل مناورات ... و فى الغالب بيلم العجل قبل الارتفاع ده ...
فيه بعض المطارات المسافة بتقل عن كدة نظرا للظروف الجغرافية الموجود فيها المطار ... زى بعض مطارات فى جنوب شرق اسيا و امريكا اللاتينية ..... و سويسرا !!!!

**shiko85** · 10-10-2014 04:39 PM

المشاركة الأصلية كتبت بواسطة الفجر

طيب لو نفترض الاحتمال الاول وكان هناك رياح عرضية طيب لية الطيار اصلا وافق على الاقلاع طالما فى رياح بشكل ده !!!
علشان الطائره تعمل tack off (الأقلاع) لازم يكون فيه رياح قويه عكس اتجاه الأقلاع مش فنفس الأتجاه لان ده بيسهل سحب او شفط الهواء و دخوله بكميه كبيره للمحركات و بالتالى تتم عمليه الأحتراق و يتولد الـ thrust او القوه المطلوبه للـ take off
و فكل مطار و اوقات على كل run way هتلاقى wind direction indicator زى الصوره

وده اللى بيحدد اتجاه الرياح الى جانب بعض الأجهزه و الردارات
و الرياح الجانبيه مش بتأثر على الأقلاع لانها مش بتعمل lift ولا drag غير ان شكل الـ airfoil بتاع الجناح و شكل الطائره عموما بيسمح انها تتغلب على اى رياح جانبيه و الأستفاده منها فالتوجيه فأوقات كتير لان الطائره معرضه للرياح الجانبيه فكل وقت على حسب اتجاه الحركه
ولو الطيار بيستعرض طيب ازاى اصلا عينوة فى الشركة الطيران وهو مختل نفسيا !!!
مفيش الكلام ده الطيار بيخضع لفحوصات كتير جدا و لازم يكون عامل ساعات طيران كتير علشان يقدر يطير و مفيش حاجه اسمها بيستعرض لان ده هيأثر عليه و يدخل فتحقيقات كتير و ممن يتفصل و تتسحب منه إجازه الطيران او رخصه الطيران و ممكن يدخل السجن كمان

**shiko85** · 10-10-2014 04:57 PM

المشاركة الأصلية كتبت بواسطة ahmed_eng2001

انا اختلف مع حضرتك فى بعض النقاط .....

المشكلة انه عمل حاجة ملهاش لازمة و هو على ارتفاع منخفض و هو بيعمل اقلاع ... تركيز عالى .. الماكينات بالقرب من طاقتها القصوى ... و مش ملهاش لازمة و بس ... دى كمان حركة خطيرة شوية
عايز اقول لحضرتك ان الحركه دى و غيرها بتتعمل اوقات كتير بعد الصيانه خصوصا لو كان فيه تبليغ عن عيوب فالـ Control surfaces او حصل تعديل فيهم و هكذا
حركة الوداع دى .... الطيارين بيعملوها على ارتفاع عالى شوية .... 2000 قدم مثلا

الاختبار النهائى لأسطح التحكم بيكون و الطيارة بتعمل مناورات للوصول لمدرج الاقلاع ... و ده لو حب يختصر وقت التاكسى ... و علشان ميأخر الرحلة .... او بيعملها و هو واقف قبل ما يطلع على الممر ...
ده اختبار الطيار كأجراء عادى قبل كل اقلاع علشان يتأكد ان كل حاجه شغاله و الهيدرولك واصل بدون مشاكل
لكن اختبار طائره جديده او طائره بعد الصيانه بيكون مختلف شويه بيوصل لأقصى قدره للطائره و المعدات علشان يتأكد ان حاجه سليمه و جاهزه تشتغل حتى فأصعب الظروف
انما يعمل اختبار لأسطح التحكم و الطيارة فى الجو ؟؟!!!! ده مش مقبول
بيحصل لانه عمل الأختبارات على الأرض و لازم يتأكد انها شغاله زيها زى اى حاجه بيتعملها صيانه او اختبار

سرعة الطائرة على الممر ثابته تقريبا لكل طائرة ... و من المعروف ان فيه سرعتين على الممر ... V1 و دى تقريبا ثابتة ... و Vr و دى كمان تقريبا ثابته ... ( اعذرنى انا مش فاكرهم كام بالظبط للجامبو )
الى بيختلف قدرة دفع المحركات ..... فالطائرة حتوصل لل Vr مثلا ب 85 % من قوة دفع المحركات القصوى ... بدلا من 95 %

N1 & N2
السرعه اللى ممكن يلغى الـ take off قبلها هى الـ N1 لكن بمجرد انه يعدى السرعه دى لازم يكمل و الـ take off بيكون على الـ N2
السرعه واحد لكن القوه اللازمه للوصول لها بتختلف طبعا مع اختلاف الحموله
انا عايز اقول لحضرتك انى شوفت اكتر من مره طيارين بيعملوا الـ take off قبل ربع الـ run way و فيه بنفس الطائره بيعدى الـ 3/4

المسافة من الارض ... بتختلف من كل مطار و التانى ... و على حسب خبرتى القليلة .... مش قبل ما يصل لارتفاع من 700 قدم .. قبل ما يبدع يعمل مناورات ... و فى الغالب بيلم العجل قبل الارتفاع ده ...
فيه بعض المطارات المسافة بتقل عن كدة نظرا للظروف الجغرافية الموجود فيها المطار ... زى بعض مطارات فى جنوب شرق اسيا و امريكا اللاتينية ..... و سويسرا !!!!
بالظبط, فيه مطارات لازم الطيار يعمل roll + yaw بعد الـ take off و فيه مطارات مشهوره بالمشكله دى و طبعا الطائرات الـ cargo المدنيه غير الحربيه و الطيارين كمان بيختلفوا جدا

**طارق _عبد السلام** · 10-10-2014 05:18 PM

ماشاء الله حوار الطيارين مع بعض ممتع

لكن بقى اللى زى حالتنا هقول رأيى اظن انها مقصوده والكاميرا متابعاه وهو عملها باقتدار

بس ازاى دى الطلعه للطياره الواحد بيحس ان دماغه انضغطت وبتكون صعبه جدا على الانسان العادى

**amr011111** · 10-10-2014 06:10 PM

هوه احتمال من اتنين
ياما الطيار طالع زفه وبيحى العريس والعروسه زى ما اى حد بيعمل بالعربيه يمين وشمال ساعه الزفه :)
او
ان التباع هوه اللى كان سايق :)

**DODGE2013** · 10-10-2014 06:37 PM

شيكو انت طيار حربي ولا مدني والي بيقولك الحركه الي عملها صعبه هيا لا صعبه ولا حاجه

بس حتى لو محترف ممكن توسع منه غصبا عنه لو الرياح شدة في نفس اتجاه الميلان بسرعه جامده سعتها باي باي

هو غلطان نوعا ما انه عملها وهو بالارتفاع المنخفض اوي ده حتى لو محترف والي بيقولك حتى لو بعد صيانه بيعملوا الحركه ديه فا مبيعملوهاش على الارتفاع ده نهائي الا لو طياره وبيجربوا عليها وبيبقوا لسى مسؤولين عنها

والي بيتكلم عن الكروس ويند فا تأثيره مش جامد اوي ساعة الاقلاع هيا مأثره جدا ساعة الهبوط وتخوف الطيار اكتر

في الهبوط عن الاقلاع دايما يقولك الاقلاع مفيش اسهل منه وده صحيح الا لو مطار الرنواي مش كبير او قدامك حواجز او شاطى الخ الخ من العقبات ان دائما الاقلاع سهل لاكن الفن كله في الهبوط ولو فيه طيارين في الموضوع ده ياريت كله يقول عامل كام ساعه وعلى طرازات ايه يمكن نفتح شركة طيران مع بعض وسميها نايل موتورز اير لاين هههههههههه

**الفجر** · 10-10-2014 06:45 PM

مش معقولة معانا هنا طيارين مدنين وحربين ولا اية ؟؟؟

**ahmed_eng2001** · 10-10-2014 06:58 PM

حضرتك مش واخد بالك مما قصدته .....

ما ذكرته حضرتك صحيح ...... و لكن عمل اختبار نهائى قبل الاقلاع لأسطح التحكم يتم فى الهنجر بعد الاصلاح ... او فى منطقة الاختبار .... او قبل الوصول لممر الاقلاع ... او فى مكان انتظار الطائرة ....... و لا يتم عمل هذه الختبارات اثناء الطيران او الاقلاع !!! بمعنى ... الطيار لما بيعمل كده فى الجو ... فده بيعمل مناورة ... مش اختبار طبيعى لأسطح التحكم
فيه اجراء بيعمله الطيار و هو طاير فى الجو فى حالة فقدانه التحكم فى احد الاسطح اثناء الطيران .... و ده قصة تانية خالص

و انا معاك طبعا فى ان اختبار طائرة جديدة يتم بشكل مختلف .... و يتم عن طريق طيار اختبار متخصص ... مش طيار خطوط جوية عادى .... و بيوصل الطيارة لأقصى ظروف التشغيل المصممة عليها الطائرة
و على حسب علمى ... لا يتم عمل الرولنج ده على الارتفاع ده ..... انا عاوز اوضح كمان ان ده مش بيتعمل على كل طيارة بتخرج من المصنع ... ده بيتعمل على النماذج المبدئية و قبل دخول النموذج خط الانتاج
ا
ختلف مع حضرتك فى نقطة صغيرة

N1 and N2 المتعارف عليه .... ال N1 دى بتكون عدد لفات الاكس الداخلى للمحرك ( و ده ليه عداد سرعة من ضمن متغيرات المحرك ) و N2 هى عدد لفات اللاكس الخارجة و معاه الفانة الخارجية .... ( و ده كمان ليه عداد تانى فى اغلب الطائرات )

سرعات الطائرة على الممر ... الطيارين بيعرفوها ب V 1 ..... و Vr .V rotate ..... و بالفعل زى ما حضرتك ذكرت .... عند وصول الطائرة ل V 1 لازم الطيار يطير من على الممر ... علشان فرامل الطائرة مش حتمكنه من ايقاف الطائرة عند اخر الممر ... حتى لو اكتشف وجود حريق فى الطائرة او المحرك بعد كدة ..... و دى حصلت كتير ... اشهرها فى طائرة الخطوط الكينية ...
ماكينة ( محرك ) عمل فاير بعد ال V 1 و الماكينة التانية عملت فاير بعد ما بدأ يطير فعلا و لف بالطائرة و رجع على الممر تانى !!!

ال Vr .. الى بعدها ممكن الطائرة تعمل ( nose up ) و تبدأ طيران

و بالفعل ... الطائرة و هى ثقيلة غير و هى فاضية ..... فى جو بارد غير جو حار ... على ممر مرتفع عن سطح البحر .. غير ممر مقارب لمستوى سطح البحر

يسعدنى الحوار مع حضرتك