الموضوع: نصيحة فى شراء ابيزا 99

بغض النظر عن العربية
انا هقولك نصيحة عن تجربة

طالما انت مسافر برة مصر وهتستخدم العربية شهر فى السنة يبقى احسنلك متشتريش عربية ولما تنزل اجازتك ابقى أجر عربية مدة الشهر اللى انت قاعده
لأن تخزين العربية لمدة سنة حاجة مش عملية خالص

1- لازم تحطها فى جراج طول الفترة اللى مش هتستخدمها فيها وأقل جراج دلوقتى بـ 300 جنيه فى الشهر يعنى 3600 جنيه فى السنة
لو افترضنا انك عندك جراج خاص ومش هتدفع فيه فلوس يبقى ندخل على نمرة 2

2- لازم ترفع العربية وتفك العجل منها عشان الكاوتش بيبوظ من الوقفة وبينشف ولازم بتخزن بطريقة معينة ولو رفعت العربية بالكاوتش بيكون حمل على العفشة

3- لازم تفك البطارية وتخزنها بطريقة معينة ولما تحب تركبها لازم تتشحن قبلها ولو معملتش كده يبقى كل اجازة هتنزلها هتجيب بطارية جديدة

4- لازم قبل ماترفع العربية تغسلها بالجاز عشان لو معملتش كده البارومة هتاكل فيها والطنابير هتصدى والجلب هتنشف وتزيق

5- لازم دورة التبريد تكون نضيفة وتحطلها مانع الصدأ لأن المياه هتاكل فى الردياتير وطرمبة المياه وبعد سنة لما تيجى تستخدم العربية هتلاقيها بتسخن وده لأن دورة التبريد اتسدت

6- لازم تغطى العربية وتقفل اى فتحات فيها لأن ممكن عرسة او فار يدخل يبهدلك الدنيا وياكل فى الفرش او اسلاك الضفيرة

7- لازم بعد سنة لما تيجى تستخدمها لازم تغير الزيت لأن بتكون صلاحيته انتهت وبالتالى لما تحط زيت جديد مش هتلحق تستخدم المسافة بتاعته فى الشهر اللى انت قاعده

8- فيه حاجات تانية كتير فى العربية بتتأثر بالركنة زى طرمبة البنزين وطرمبة المياه وعلبة الشكمان .......
يعنى هتلاقى نفسك ضيعت اسبوع من اجازتك رايح جاى على الميكانيكى والكهربائى والعفشجى عشان تظبط العربية وتستخدمها فى الـ3 اسابيع اللى فاضلين وبعدين ترجع تعمل الموضوع من اول رقم 1 تانى

نصيحة من واحد مجرب

اوك لو كده يبقى تمام

عموما مفيش عربية مفيهاش مشاكل او عيوب ولكن الموديل ده كويس بالنسبة لسعره وسعر قطع غياره و توافرها
وكل اعطالها ومشاكلها محفوظة وهتلاقى حل لأى مشكلة لو قلبت فى مواضيع القسم هنا

1- الموتور بياكل زيت ليه كذا سبب ومش هيبان السبب غير لما الموتور يتفتح
واسهل حاجة انك تجيب شورت بلوك بـ 2500 جنيه وتركيبها مش هياخد نص يوم (برة بيقولوا عليها جرم مكينة) وده بيبقى بلوكة بـ وش السلندر بتاعهابدون ادوات تغذية متقفلة وجاهزة على التركيب على طوول

2- الطابلوه كامل استيراد سعره من 600 - 800 جنيه حسب الحالة والتاجر

3- والسمكرة والدهان مش هقدر افيدك فيهم لأن ده بيكون حسب حالة العربية ولازم تروح بيها لسمكرى وبتاع دوكو عشان هو اللى هيحدد
الاكصدامين استيراد فى حدود 1000 جنيه

4- التكييف لازم تكشف عليه بالكامل لأن جايز يكون فيه حاجة تانية هى اللى بايظة وسعر التكييف كامل 3000 جنيه

قطع الغيار هتلاقيها فى الحرفيين اكيد لكن غير كده انا معرفش لأنى من اسكندرية ومش حافظ القاهرة كويس
ورشة نايل موتورز فى الحرفيين بتعمل سمكرة ودوكو وشغلهم كويس عن تجارب كا حد معانا فى القسم

وده لينك بأسماء الورش والتجار بناء على تجارب الأعضاء معاهم

http://www.nilemotors.net/Nile/365862-a.html

http://www.nilemotors.net/Nile/341028-a.html

بص يا باشا
انا معايا الموديل دة
السعر طبعاً تحفة جداً
لأنك مهما صرفت عليها مش هتكمل حقها ومش هتوصل معاك لل30
اما عن اعادة البيع فالعربية مطلوبة جداً وكل عربية وليها سعرها حسب حالتها فهتبيع هتبيع لو حبيت تبيع

تحياتي