تقييمي ل كيا ريو 2015 بعد 600 كيلو
السلام عليكم
اشتريت كيا ريو 2015 وكيل اول فئة اوتو قبل العيد
ودلوقتي عملت 600 كيلو وقولت اقول رأيي:-
1- الثبات ممتاز بالرغم من ان جنوطي 15 مش هتحس انك ماشي على سرعة والغرز هتبقا مطمن وانت بتعملها
2- عزل الصوت جيد ولكن ليس بالممتاز
3- عزل الحرارة فى الكونصول الامامي جيد ولكن ليس بالممتاز خصوصا فى فترة التليين فى حرارة كبيرة بتطلع من الموتور وبتبان فى الفيبر الى تحت الطبلوه
4- استجابة الموتور فيها تأخير بسيط ولكن عند القيادة ع وضع المانيول العربية بتبقا طيارة وده راجع لان العربية مظبوطه بتنقل بدري جدا يعني ممكن تمشيك على سرعه 50 وانت ع الرابع !
5- استهلاك البنزين لحد دلوقتي كويس متوسط 8.5 لتر / 100 كيلو متوسط برا وجوا البلد بالتكييف , جايز علشان وكيل !
6- الكراسي مريحة جدا والكنبة الى ورا مش ضيقة على الأطلاق
7- التكييف كويس لحقت كام يوم حر بس خلاص الحر خلص
8- الكاسيت جميل و صوته ناعم وعالي ( 4 سماعات فقط )
9- الفرامل استجابتها كويسه رغم عدم وجود abs
10- العفشة ناشقة حاجه بسيطة واعتقد ده علشان يديها ثبات
11- اسوء حاجه فيها ارتفاعها عن الأرض بتحك فى المطبات و الحل انك تاخد المطب بالجمب ومش هحتك خالص حتى لو فيها 5
--- اتمنى تستفيدوا والعربية بشكل عام كويسة وانا مبسوط بيها الحمد لله