تسخين العربيه ونصايح غبور انهارده فى صيانه ال 1000 كيلو ل جيلى ام جراند 7

**iEgyptian** · 13-10-2014 01:30 AM

السلام عليكم ورحمه الله وبركاته اخوانى فى المنتدى ....
انهارده الحمد لله خِلصت من صيانه ال 1000 كيلو لعربيتى جيلى الجديده .
فى بعض الملاحظات اللى عايز اسأل عليه واللى حصلت معايا فى فرع ( غبور ) الغردقه ...
اولا وقبل اى شىء اللى كنت بتكلم معاه دا الناس بتقوله يا بشمهندس مش عارف بقى هو كدا ولا لقب الله أعلم ... المهم
** انهارده صحيت زى الوحش ورحت هناك المهم قبل كل شئ روحت داخل على الناس اللى بتقول عليه بشمهندس دا عشان ياخد الرخصه والكلام دا :
بقوله بعد اذنك هو انا اققولك على اللى فى العربيه ولا بعد ما تخلص بيقولى لا قول بس بسرعه عشان الوقت الدنيا زحمه .
المهم قولتلوا ربنا معاك وقولتلو على اللى فى العربيه ان صوت العربيه عالى والتكييف والكلام دا ...
قالى ياستاذ انت بتكلم فى تاقفيل مصرى يعنى قول الحمد لله .. مش عارف اقوله ايه الراجل دا فصلنى والله المهم قولت طيب انا معايا واحد صاحبى ماسك حسابات فى فرع غبور اللى هنا المهم راح مكلم مهندس تانى شكل الناس كلها مهندسين المهم قالى تمام و 100 100
وشيك على كل حاجه ...
بصراحه بعد تغيير الزيت الموتور صوته نعم بس فى صوته المندس بيقولى دا بيقولى من علبه الشكمان اللى فى النص عشان دى صناعه محليه مصرى عشان كدا ...
فى نقاط بقى انا نفسى اسمع نصيحه حد فاهم جزاكم الله :::
1-هو انا لازم اسخن العربيه قبل ما اطلع واسخنها لحد كام شرطه فى عداد الحراره عشان بتاع التوكيل بيقولى يا باشا درو واتكل على الله ...
ا2-نا عربيتى عامله دلوقتى 1127 لسا فى مرحله التليين برضه يعنى مقرصش على العربيه واعمل ايه بعد ما عدت ال 1000 عشان انا قبل ال 1000 كنت ماشى 100
سألت بياع الفجل اللى هناك دا بقولى ياباشا دوس جيب 180 200 خلاص انت كدا .....
3-انا جبت مياه تبريد من عندهم الجركن اللى ب 48 جنيه دا وحتلى شيل 5000 ايه ممكن توصونى بيه هل التزم معاهم الناس دى وبزيتهم وبابا غنوجهم ...
4-بالنسبه لزيت الباور مش عارف زيت ايه اللى موجود فى الجيلى يعنى لو نقص جيب نفس النوع ازى او اعرف من فين ..
**المشكله والله الراجل المهندس اللى استقبلنى بيعاملنى ولا اكنى جاى اتساقل عليه بيهرب من ...
**انا فضت الكوتشات انهارده وعبت نيتروجين وظبطت زوايا ...
5-فى نقطه تانيه هو انا فى البنزين استنى التنك اما يفضى ولا من الاحسن اعبيه على اخر النص كدا او الربع ..
---->حوار بس تسخين العربيه دا مش فاهمه هى ومرحله التليين لحد امتى حبقى مكتف لحد ما البيه الموتور يلين ...

تقابلوا تحياتى وشكرا فى المقدمه ...

**محمد محليس** · 13-10-2014 03:16 AM

الف مبروك علي العربيه وعلي الصيانه
و خد المعلومه ده من اخوك
بعد البحث الكثير والفرجه علي فيديوهات المتخصصين والخبراء في مجال العربيات
اولا التليين لحد 2000 كيلو وماتعديش الار بي ام عن 2او 2.5 بالكتير
ثانيا التسخين وخاصه العربيات الحديثه من 40 ثانيه لحد دقيقه مش اكتر من كده لان الهدف منه هو تزييت الموتور عقبال لما الزيت يطلع لحد الكامه فوق وياخد دورة كامله جو الموتور
وامش واحده واحده وهي هاتسخن منك علي طول بعد ماتمشي
وشكرا

**تامر راغب** · 13-10-2014 09:42 AM

مليون مبروك على العربية وربنا يكفيك شر طريقها
والله مشكلتك دى مشكلتى ومشكلة ناس كتير بتتعامل مع اللى بيسموه توكيل غبور ده
حاجة زى الزفت ومعاملة كأنك بتشحت منهم ومفيش حد بيسمع
لكن بقى لما بتبقى عندك شغلانة وهتدفع كله بيشيل عنك الحمل
أنا علشان أكشف على العربية بالكامل دفعت طبعا 220 جنيه وعلشان أخلص دفعت إكراميات 55 جنيه
وخلصت بعد 3 ساعات هههههههههههههههههههههه

**A.Saad** · 13-10-2014 11:05 AM

مون على الربع بالكتير
لان بيكون فيه رواسب بتترسب فى التنك ولو استنيت للاخر بتتسحب وتدخل الدورة

**iEgyptian** · 13-10-2014 02:19 PM

المشاركة الأصلية كتبت بواسطة تامر راغب

مليون مبروك على العربية وربنا يكفيك شر طريقها
والله مشكلتك دى مشكلتى ومشكلة ناس كتير بتتعامل مع اللى بيسموه توكيل غبور ده
حاجة زى الزفت ومعاملة كأنك بتشحت منهم ومفيش حد بيسمع
لكن بقى لما بتبقى عندك شغلانة وهتدفع كله بيشيل عنك الحمل
أنا علشان أكشف على العربية بالكامل دفعت طبعا 220 جنيه وعلشان أخلص دفعت إكراميات 55 جنيه
وخلصت بعد 3 ساعات هههههههههههههههههههههه

المشكله تحسه وهو بيكلمك انه هو اللى قفل العربيه او اختراعها ومش فاهم ليه دا انا بكلمه بكل احترام بس نرجع للحقيقه انا اكان معايا فيرنا 2009 اما دخلت فى مجال الميكانيكيا او بمعنى اصح وكر النصابين عرفت التوكيل نصاب بس بضمير شويه

**iEgyptian** · 13-10-2014 02:20 PM

المشاركة الأصلية كتبت بواسطة a.saad

مون على الربع بالكتير
لان بيكون فيه رواسب بتترسب فى التنك ولو استنيت للاخر بتتسحب وتدخل الدورة

معلومه جديده بصراحه كنت اجهلها جزاك الله خيرا بجد

**محمد محليس** · 13-10-2014 08:56 PM

زي ما قولتلك واتكل علي الله
اخرك في التليين الفين كيلو
والتسخين الهدف منه وصول الزيت اعلي الموتور ولا اكتر ولا اقل
وموضوع البنزين ده نسيت اقولك عليه معلش
كل لما التنك يكون فاضي بتستهلك بنزين اكتر
لأن البنزين مع المشي والمطبات بيتحرك يمين وشمال
جوه التنك وبيبقي فيه مساحه كبيره جوه فبيعمل رغوه ويتبخر
لكن لما يبقي التنك مليان بتبقي المساحه جوه قليله
تاني حاجه موضوع الرواسب ده بتسد الخراطيم

**iEgyptian** · 14-10-2014 02:03 AM

المشاركة الأصلية كتبت بواسطة محمد محليس

زي ما قولتلك واتكل علي الله
اخرك في التليين الفين كيلو
والتسخين الهدف منه وصول الزيت اعلي الموتور ولا اكتر ولا اقل
وموضوع البنزين ده نسيت اقولك عليه معلش
كل لما التنك يكون فاضي بتستهلك بنزين اكتر
لأن البنزين مع المشي والمطبات بيتحرك يمين وشمال
جوه التنك وبيبقي فيه مساحه كبيره جوه فبيعمل رغوه ويتبخر
لكن لما يبقي التنك مليان بتبقي المساحه جوه قليله
تاني حاجه موضوع الرواسب ده بتسد الخراطيم

شاكر والله اخى الغالى على المعلومات القيمه ولكن يوجد انهادره شىء حصل معايا فى العربيه ..بسمع صوت زى حك اسطوانه وانا ماشى على الهادى او بلف على الهادى صوت كدا مش عارف اوصفه بس عارف انت اما يكون اسطوانتين حديد مسنونين بيحكوا مع بعض . الصوت دا لسا ظاهر امبارح انا قلت ممكن يكون ظلطه ولا حاجه بس الموضوع ظهر اكتر من الاول فى الماشى الهادى اللى هو من الاول الى التانى او وانا بلف على الهادى او ماشى على مدق . مش عارف دا من ايه دا انا مش عايز اجط الصوت دا فى دماغى بقول العربيه جديده يعنى مفيش حاجه بس الصوت بجد بيزيد وواضح اوى

**bassemali** · 14-10-2014 09:08 AM

المشاركة الأصلية كتبت بواسطة iegyptian

شكرا اكيد على المعلومه اخى الغالى والله يعنى 2000 مش 5000 ولا اللى سمعته من واحد معاه نفس النوع قالى 10000 مش فاهم الناس بتهزى ليه .
انا كنت قلاقان بس من حوار تسخين العربيه عشان الناس بتقول لازم استنى الكلام دا عشان الزيت يوصل والمراوح تشتقل انت كدا حتجيب وش سلندر للموتور
جزاك الله خيرا وتقبل تحياتى

بص ياباشا .. العربيه تتلين لغاية 2000 كيلو من غير ماتقرص عليها .. أما موضوع ال 10 الف كيلو ده .. فالمقصود منه إن العربيه بتدي كامل أدائها بعد ماتعدي ال 10 الاف كيلو الأولانيين .. يعني هتلاقي السحب إتحسن كتير .. التكييف إتحسن .. الفتيس نعم .. صوت الموتور هدي .. بعد ماتخلص ال 10 الاف كيلو دول هتلاقي العربيه فرقت معاك كتير .. الإسبرانزا عندي إتغيرت تماما بعد صيانة ال 10 الاف .. وربنا يوفقك .