سؤال عن فوايد الماستر كارد .... :) وسداد الفواتير

**eng.octooo** · 13-10-2014 04:06 AM

السلام عليكم :

كان عندى كام سؤال كدة عن الماستر كارد من بنك عودة السيلفر وقلت انتو هاتفيدونى اكتر من الكول سنتر بتاع البنك لانهم بيلخبطونى

دلوقتى هانقول انى اشتريت حاجة ب 1000ج ... وليا فترة سماح 55 يوم بتبداء من يوم 5 فى الشهر ادفع فيها المبلغ دة وبعد كدة بيحسب فوائد

لما الشهر يخلص هايبعتولى رسالة على التليفون يقولى قيمة فاتورتك 1000ج مثلا ومعاد الدفع يوم كذا والحد الادنى للدفع 50 ج :)
دلوقتى انا لو رحت دفعت ال 1000ج قبل المدة دى كدة خلاص

طيب لو رحت دفعت ال 50 ج باقى المبلغ ال 950 هايكون عليهم فوايد وهاينزلو الشهر الى بعدة

هاينزلو بقى 950 ج + الفوائد ... هادفعهم كلهم اجبارى ولا هاتتبعتلى الرسالة وفيها حد ادنى جديد ؟

امممم معلش تعبتكم معايا اريحكم شوية ... ممكن انا اروح اشترى موبايل جديد ب 6000ج وانا مش معايا تمنة مثلا

ولما تجيلى الفاتورة هايقولى عليك 6000ج ومعاد دفعك اخر الشهر واقل رقم للدفع 500 ج هاروح انا دافع 1000ج والشهر الى بعدة هايقولى عليك 5000ج ومعاهم الفوايد واقل رقم 500ج هادفع 1000 وهكذا لحد ما اخلص تمنة .... الموضوع دة بقى هنا لية نهاية يعنى الفواتير دى هاتفضل تجيلى لحد امتى ؟ لانى عايز اجيب موبايل جديد واقسطة انا ب الطريقة دى اية رايكم ؟

**hesham fawzy h** · 13-10-2014 04:09 AM

متابع

**svneleven** · 13-10-2014 04:32 AM

أعتقد اللي حضرتك كتبته كله صح. هتدفع جزء و الباقي هيحط عليه فوايد و ينزل في الفاتورة الشهر اللي بعده.
موضوع ال 56 يوم ده حد أقصي يعني مش كل مرة بيديك سماحية 56 يوم. هو فترة السماح عبارة عن يوم 26 من الشهر التالي لعملية الشراء. يعني لو حضرتك اشتريت يوم واحد أكتوبر تدفع يوم 26/11 يعني 56 يوم زي ما قال.
لكن لو اشتريت يوم 30 أكتوبر تدفع بردو يوم 26/11 يعني حوالي 26 يوم فقط.
الأهم من كل ده أوعي تشتري و تدفع جزء و الكلام ده لان نظريا بعد كام شهر هتخلص الفلوس اللي عليك لكن في الحقيقة هي دوامة مش هتخرج منها.
كل اللي أعرفه بيستعمل الفيزا بالشكل ده مديون ب 20 أو 30 ألف في البنك.
أنا بشتري لو معايا فلوس الحاجة كل ما هنالك أن الفلوس في البيت أو في البنك أو عشان ما اشيلش فلوس كتير و أنا ماشي.

**eng.octooo** · 13-10-2014 05:28 AM

المشاركة الأصلية كتبت بواسطة svneleven

أعتقد اللي حضرتك كتبته كله صح. هتدفع جزء و الباقي هيحط عليه فوايد و ينزل في الفاتورة الشهر اللي بعده.
موضوع ال 56 يوم ده حد أقصي يعني مش كل مرة بيديك سماحية 56 يوم. هو فترة السماح عبارة عن يوم 26 من الشهر التالي لعملية الشراء. يعني لو حضرتك اشتريت يوم واحد أكتوبر تدفع يوم 26/11 يعني 56 يوم زي ما قال.
لكن لو اشتريت يوم 30 أكتوبر تدفع بردو يوم 26/11 يعني حوالي 26 يوم فقط.
الأهم من كل ده أوعي تشتري و تدفع جزء و الكلام ده لان نظريا بعد كام شهر هتخلص الفلوس اللي عليك لكن في الحقيقة هي دوامة مش هتخرج منها.
كل اللي أعرفه بيستعمل الفيزا بالشكل ده مديون ب 20 أو 30 ألف في البنك.
أنا بشتري لو معايا فلوس الحاجة كل ما هنالك أن الفلوس في البيت أو في البنك أو عشان ما اشيلش فلوس كتير و أنا ماشي.

متشكر جدا ليك ... يعنى ممكن الفاتورة تتدفع على 5 او 6 شهور طيب معلش مش فاهم تحذير حضرتك .. قصدك ب الدوامة الى مش هاخلص منها هيا انى لما اخلص كل الفلوس الى عليا هاتنزل فلوس تانى ؟ ولا قصدك انها طريقة مش عملية ؟

**fepsceasar** · 13-10-2014 09:40 AM

المشاركة الأصلية كتبت بواسطة eng.octooo

متشكر جدا ليك ... يعنى ممكن الفاتورة تتدفع على 5 او 6 شهور طيب معلش مش فاهم تحذير حضرتك .. قصدك ب الدوامة الى مش هاخلص منها هيا انى لما اخلص كل الفلوس الى عليا هاتنزل فلوس تانى ؟ ولا قصدك انها طريقة مش عملية ؟

اعتقد المقصود ان الفلوس هيتحط عليها فوايد وانت تدفع جزء والفوايد يتحط عليها فوايد وهكذا وبالتالى ممكن 5000 جنيه فى سنة تسدهم 7000 او اكتر ولو كسلت هتلاقى على سنتين تلاتة وانت بتدفع الحد الأدنى المبلغ زاد ووصل لأرقام كبيرة

**Ahmed_Rahem** · 13-10-2014 09:47 AM

المشاركة الأصلية كتبت بواسطة eng.octooo

متشكر جدا ليك ... يعنى ممكن الفاتورة تتدفع على 5 او 6 شهور طيب معلش مش فاهم تحذير حضرتك .. قصدك ب الدوامة الى مش هاخلص منها هيا انى لما اخلص كل الفلوس الى عليا هاتنزل فلوس تانى ؟ ولا قصدك انها طريقة مش عملية ؟

هناخد المثال بتاع الموباي، هتشترى يوم 1 نوفمبر 2014 وهتسدد على 6 شهور، هنفترض الفائدة 1% شهرى (12 سنوى) لتسهيل الحسبة وسعر الموبايل 1000 جنية.
فى 30 نوفمبر هتسدد 175 جنية
فى 31 ديسمبر هتسدد 175 جنية
وهكذا لمدة 6 شهور تنتهى فى 30 ابريل.
اجمالى المسدد 175 * 6 شهور بيساوى 1050 جنية.
يعنى الفائدة حوالى 50 جنية على 6 شهور بالارقام الى فوق.
المشطلة بتيدى لو اتاخرت فى السداد، لو اشتريت حاجات تانية بنفس الطريقة (لانك هتستسهلها) وبالتالى المبلغ بدل 1000 جنية هيبقى 10000 جنية والفوائد بدل 50 جنية هترب فى ارقام فلكية أو بتشترى حاجات العادية وبتدفع قسط الموبايل فقط وتنسى تسدد باقى المشتريات وتتحسب عليها فوائد تانية وانت مش منتبة.
لو عايز تعمل كدة فعلاً يبقى التقسيط على 3 شهور بحد اقصى، ومتشتريش غيرها لحد متخلص فلوسها بالكامل، واى مشتريات شهرية تسدد بالاضافة إلى القسط (وليس القسط فقط).

**eng.octooo** · 13-10-2014 11:17 AM

متشكر جدا ليكم .... انا فعلا ماكنتش هاعملها لاكتر من 4 شهور ومش هاجيب بيها اى حاجة تانى مجرد الموضوع دة بس ....

الفكرة ان المرتب لو اتدفع كلة فى موبايل هايعملى مشاكل ف انا فكرت فى الموضوع دة علشان امشي نفسى مش اكتر :) ومتشكر جدااااا ليكم

**ahmed.teawater** · 13-10-2014 12:11 PM

المشاركة الأصلية كتبت بواسطة eng.octooo

متشكر جدا ليكم .... انا فعلا ماكنتش هاعملها لاكتر من 4 شهور ومش هاجيب بيها اى حاجة تانى مجرد الموضوع دة بس ....

الفكرة ان المرتب لو اتدفع كلة فى موبايل هايعملى مشاكل ف انا فكرت فى الموضوع دة علشان امشي نفسى مش اكتر :) ومتشكر جدااااا ليكم

اعتبر نفسك ماضى شيكات وبتسددها عشان تلتزم
لو سهلت بالنسبه ليك موضوع الفيزا هتتعب بعد كده ف السداد

**ahmed-moga** · 15-10-2014 04:51 AM

لو حدك الأئتماني في الماستر كارد يجيب الموبايل يعني مثلا 6000 جنيه والموبايل تمنه 6000 جنيه روح هاته من موبايل شوب علي 12 شهر بدون فوائد وهتدفع كل شهر 500 من غير فوايد الا لو اتأخرت انا شخصيا عامل كده

-

الموضوع: سؤال عن فوايد الماستر كارد .... :) وسداد الفواتير

LinkBack

أدوات الموضوع

عرض

سؤال عن فوايد الماستر كارد .... :) وسداد الفواتير - انشر الموضوع فى :

-

-

-

-

-

-

المواضيع المتشابهه

سؤال على فوايد البنوك

سؤال بخصوص الكريدت كارد

سؤال للى عندهم فكره بسيطه حتى عن الفيزا والمستر كارد

سؤال بالنسبة للكريدت كارد

دفع الفواتير بالفيزا من خلال الانترنت هل هو آمن ؟؟

الكلمات الدلالية لهذا الموضوع

المفضلات

المفضلات

ضوابط المشاركة