مشكلة مش عارف لها حل

**ihabyossef** · 13-10-2014 11:15 AM

السلام عليكم

بداية انا ساكن في برج سكني في منطقة شبة راقية في الاسكندرية عدد الشقق حوالي 60 شقة وانا طبيعة شغلي سفر ( 3اسابيع واجازة 3 اسابيع ) يعني بسيب الشقة نص السنة تقريبا ومراتي وابني بيكونوا عند حماتي فى فترة السفر بس مراتي من وقت للتاني بتروح تبص على الشقة

لحد كدة جميل

فين المشكلة

في الدور الخامس عندنا شاب عنده حوالي 40 سنة - قدراته العقلية محدودة - بس ما كانش بيأذي حد كان اخره ممكن يتبول في الاسانسير وهو عايش مع والدته

من شهر تقريبا هاج ومسك امه ضربها والست اتنقلت عالمستشفى وماتت هناك بعد كام يوم
اتقبض عليه واتحول للامراض العقلية وقبل العيد بكام يوم افرجوا عنده وشرف في العمارة
تاني يوم العيد اتهجم على الشقة اللي جنبه - عائلة محترمة - بس كلها بنات وجت النجدة ما عملتش حاجة علشان مجنون

اغلب السكان بيسافرو وبيسيبو زوجاتهم واطفالهم في العمارة

وده اصبح قنبلة موقوتة في قلب العمارة ,

مش عارف الحل

برجاء اقتراح الحلول

مع الشكر

إيهاب

**mohammadrashee** · 13-10-2014 12:01 PM

الحل يروح مستشفى
وتعمل باب حديد

**هيثم مجدي** · 13-10-2014 04:00 PM

الباب الحديد امان و حضرتك في الشقة
ولما تكون مسافر الأفضل زوجة حضرتك متروحش تبص على الشقة و شوف أخوك او اخوها
او شخص موثوق فيها يتابع الشقة و حضرتك مسافر

ممكن كمان تركب كاميرا في الدور بتاعك لزيادة الأمان بحيث متفتحش الباب الا لما تكون عارف مين
ولو حصل اي دوشة تقدر تعرف في ايه من غير ما تفتح الباب و تتعرضوا للخطر

**shiko85** · 13-10-2014 04:21 PM

وعليكم السلام ورحمة الله وبركاته
و ازاى المستشفى تفرج عنه و هو بالحاله دى ؟؟ ده يعتبر خطر و لو المستشفى شايفه انه سليم يبقى فين العقاب انه قتل والدته ؟؟؟
و الشرطه تسيبه يتهجم على الجيران بدون تحويله للمستشفى او حتى عمل محضر ؟؟!!
هو عايش لوحده فالشقه ؟؟
شوف حضرتك اى برنامج اتصل بهم و اشرح المشكله دى يمكن يكون فيه نتيجه

**salodas** · 13-10-2014 05:29 PM

1- ركب باب مصفح ... أو باب حديد على باب الشقة .
2 ركب كاميرة مراقبة على باب الشقة بحيث زى الشباب ما قالو فوق ... تعرف مين برة قبل ما تفتح الباب و تعرف كمان الى بيحصل برة .
3- مراتك وعيالك ميسكنوش فى الشقة طول ما أنت مش موجود .
4- بلغ عنه فى كل مكان وأعمل شكوى مجمعة من السكان كلها ... ده قتل أمه يا جدعان ... يعنى انت وأسرتك بالنسبة له هتكونو ولا حاجة .
5 - ادعى ربنا يشفيه .
6 - ربنا معاك.

**بحار** · 13-10-2014 06:28 PM

الكاميرا والباب الحديد امان لو الاسرة جوه الشقه .. المشكلة انه يقابلهم وهما على السلم رايحيين مشوار او بيقضوا لوازمهم .. لازم شكوى مجمعه من السكان وتتخلصو منه لانه فعلا فى انتظار كارثه تانيه .. ربنا معاك

**ehabouf** · 13-10-2014 07:22 PM

لازم تعملوا محضر في القسم وتتطالبوا بتحويله لمستشفى الأمراض العقلية (تاني وتالت ورابع) وانتوا بتعملوا المحضر تفهم الظابط انك عايز صورة من المحضر (علشان مايتركنش)
المشكلو ان مستشقيات الأمراض العقلية علشان الأماكن فيها محدودة فمابيحجزوش غير الحالات شديدة الخطورة

**pioneerahmed** · 13-10-2014 08:32 PM

طيب و اللي قتل امة دة قليل الخطورة؟!!!

**ihabyossef** · 13-10-2014 09:55 PM

الف الف شكر لأهتمام حضرتكم وبجد ربنا يجازيكم خير انا بجد مش عارف انام خصوصا اني دلوقتي في وسط البحر وما فيش شبكات موبايل عشان اطمن على الوضع في العمارة والنت بيجي بالعافية
ربنا يطمنكم وياااااااارب يعدي الموضوع على خير
وإن شاء الله اول ما انزل حنفذ مقترحاتكم بخصوص الباب الحديد والكاميرا
او اعزل وخلااااااااااااااااص

مع الشكر
م/ ايهاب يوسف