تأمين اللوحات الجديدة110 جنيه . أين تأمين اللوحات القديمة ولماذا لا يرد للمواطنين ؟

**semsem67** · 27-10-2008 04:02 PM

عند تجديد الرخصة في وحدات المرور التي بها الأرقام الجديدة 3حروف و3 أرقام يدفع المواطن 110 جنيه تحت مسمى تأمين لوحات سواء كانت السيارة جديدة بدون لوحات سابقة أو يتم تجديد رخصتها ولها لوحات فيتسلمون اللوحات القديمة ولا يردون التأمين الذي كان قد دفع فيها وهو 20 جنيه ويدفع المواطن التأمين الجديد!!!
أين حق المواطنين في استرداد التأمين للوحات القديمة طالما سلموها للمرور؟؟
في مصر 4 ملايين سيارة يعني بنتكلم على 80 مليون جنيه!!!!!!

**osamaesm** · 27-10-2008 04:31 PM

في حجات مش بترجع
زي الزمن مش بيرجع وبرده التأمين مش بيرجع

**mohamed2002** · 27-10-2008 04:49 PM

اكيد حيقولو التامين 130 الخاص باللوحات الجديده وتم خصم 20 جنية قيمه التامين الخاص باللوحات القديمه وبقي 110 الرقم النهائي

**elassar2010** · 27-10-2008 04:57 PM

لما الحداية تحدف كتاكيت يبقى المرور يرجع التامين

**aliabutaleb** · 27-10-2008 05:06 PM

والله نقطة فعلاً كانت غايبة عننا كلنا
حضرتك فعلاً معاك حق
أقصى ما يمكن ان نفعله إننا نبعت لعضو مجلس شعب يعمل طلب إحاطة لوزير الداخلية
وكالعادة وزير الداخلية مش هايسأل فيه
شئ محبط جداً

**AhmedSarhan** · 27-10-2008 05:08 PM

سؤال برىء يفرض نفسه....هوا حضرتك حصل يعنى انك أخدت منهم أى حاجة قبل كدا عشان دى تبقى مزعلاك.....متحاولش

لينا رب اسمه الكريم...و اسمه برضو المنتقم الجبار الذى يمهل ولا يهمل

**OlaOsman** · 27-10-2008 05:12 PM

لأ ده انا أصلا معترضة على اللوحات المؤقتة دي أم 90 جنيه.. انا المفروض اني هاروح الشهر اللي جاي أجدد الرخصة عشان كنت واخدة رخصة مؤقتة و لوحة نمر مؤقتة 3 شهور يخلصوا الشهر اللي جاي ان شاء الله.. طبعا متوقعة انهم هايجددوا 3 شهور كمان بنمر برضه مؤقتة.. بس مش عارفة هادفع تاني ولا لأ.. هو انا ذنبي انكوا أخدتوا قرار بوقف التعامل بالنمر القديمة و انتوا مش أده؟

**abo_hosni** · 27-10-2008 07:08 PM

المشاركة الأصلية كتبت بواسطة mohamed2002

اكيد حيقولو التامين 130 الخاص باللوحات الجديده وتم خصم 20 جنية قيمه التامين الخاص باللوحات القديمه وبقي 110 الرقم النهائي

كلام حضرتك صحيح انت شغال معانا في الحكومة ولا إيه :) هما الـ 20 جنيه رجعوا لكل اللي استبدلوا النمر القديمة فعلاً (يعني العشرينات اللي دفعتوها زمان ماضاعتش هدر و ده ضمن خطة حكومية سابقة لادخار فلوس المواطنين. سؤال خبيث طيب الادخار ده مش له فوائد و المفروض آخد أكتر من 20 جنيه؟ أقول لك لأ الفوائد عليها خلاف و احنا بنجنبك أي احتمال للوقوع في إثم)

أما سؤال الناس الخبثاء ليه بقى اللي بيرخص جديد مابيدفعش 130، فده تشجيع من الحكومة للمواطنين لدخول عالم السيارات. تمام زي إعلان موبينيل بتاع "أدخل يا حسين عالم الموبايل" و ده في صورة 20 جنيه الحكومة بتقطعهم من رزقها كل يوم الصبح عشان تشجع الناس تركب عربيات جديدة

أما بخصوص شكوى الأخت علا من النمر المؤقتة، ده ضمن خطة مزدوجة الهدف للتكافل الاجتماعي + لتوطيد علاقة المواطن بالحكومة يعني بدل ما نسلمك النمر الجديدة و تمشي من عندنا لازم نسيب رابط يخلينا نشوفك و باقي المواطنين كل شوية و 3 شهور مدة كافية. طيب ليه ال 90 جنيه؟
الـ 90 جنيه دول + 20 جنيه (اللي الحكومة قطعتهم من رزقها فوق) = 110 جنيه ثمن نمرة لسيارة جديدة تسلم للفقراء بنظام القرعة في صندوق زجاجي شفاف بمعدل نمرة/فقير/ربع سنة (ن.ف.ر.س)

و حضرتك اقرأي المكتوب عليها دي نمرة (مؤقتة) يعني (ربنا يسهل)، مش (موقوتة) يعني (مضبوطة بالساعة) و حضرتك استلمتيها برضائك التام و دفعتي الفلوس مساهمة في مشروع تكافلي عظيم

سؤال خبيث طيب عرفنا فلوس الترخيص جت منين، الحكومة جابت باقي فلوس العربية للفقير منين؟
ج: من فلوس تانية يتم جبايتها منكم بانتظام شديد زي الساعة و لم تسألوا عنها :k48: ، ليس عن عدم معرفة أو بسبب كسر النفس، و لكن عن طيب خاطر منكم و تيقنكم أين تذهب نقودكم إلى غير رجعة

سؤال خبيث: ليه الحكومة ما بتعلنش عن تسليم النمر و العربيات الجديدة على القفراء؟
ج: مراعاة لمشاعرهم.
و بعد ما يستلموا العربيات مش هتعرفوهم طبعاً و كده نكون حققنا هدفنا
و في ناس من كتر حيائهم بياخدوا النمر الجديدة و يعلقوها على الحيطة في بيتهم

أنا مكلف من الحكومة بالرد على استفسارات الخبثاء

إمضاء: لابس نظارة بمبي و إيده في المياه الباردة

**tservers** · 27-10-2008 09:47 PM

زي العسل ياabo hosny

**badblood** · 28-10-2008 02:40 AM

الله يلعن الحروف ع الارقام
مش عارفين يهلبوا الناس ازاي
بكره يعبوه الهوا بتاع ربنا في كياس ويبوعوا
المسؤلين ما شبعوش فلوس
حسبي الله ونعم الوكيل فيك يالي في بالي