الموضوع: ظاهرة الضرب فى المدارس

انا حصل لابنى قصه شبييه بدى بس علمت المدرس الادب لانه بلطجى

راجع فى يوم متاخر من الشغل لقيت ابنى لسه صاحى ولم ينام دخلت اقول له صاحى لدلوقتى ليه لقيت الولد بيترعش بقول له اقعد وكلمنى مالك الولد مش عارف يقعد فيه ايه قالى المدرس ضربنى قلتله ليه قال انه اخطأ فى لون الكراسه وجاب كراسه نفس اللون كراسه دراسات والمفروض ان الحصه رياضيات قلتله وحصل ايه قال المدرس ضربنى بالعصايه قلتله ورينى مكان الضرب ..... مش ممكن منظر كارثى عقلى طاااااااااار منى

اقسم بالله لو كان الوقت بدرى كان المدرس ده اتربط فى المدرسه واكل علقه ماكلها فى حياته الولد كميه الزراق لدرجه ان فيه جلد اتشال من الضرب ومش قادر يقعد اخدت الولد كنا الساعه 12 ليلا وعلى قسم شرطه المحله الكلام ده كان قبل الثوره... بعمل محضر قالوا انتظر الظابط بقول للظابط لقيته ضحك وبيقولى ايه يعنى كلنا انضربنا من المدرس مش معقول تعمل محضر نزلت البنطلون للولد وقلتله لو ابنك ده كان زمانك ضربت المدرس بالنار .. الظابط مجرد ماشاف الولد لقيته بيقول انا عايز ابن التييييييييييت ده ..وعملى محضر واتحولت على المستشفى العام لعمل تقرير.. لقيت الدكتور بعد ماشاف ابنى بيقول لى ابنك عمل ايه.. قلت له غلط فى لون الكراسه قالى متسيبش الحيوان ده (المدرس)..وفعلا ناس عرفت من ووصل للمدرس انه مطلوب ..المشكله ان المدرس ده كان مصاحب بلطجيه..ولما عرفوا انهم مش هياخدوا حق ولاباطل معايا وممكن هما كمان يتبهدلوا فيها ..بعت لى مديره المدرسه وناس عارف انى مش هقدر ارفض لهم طلب ..قلتلهم لازم اكسره الاول وجانى لحد البيت ومردتش استقبله .. المشكله انى صعب على اولاده ..وهو فضل مستخبى مبيروحش المدرسه .. ومكنش فيه نيه عندى انى احبسه اصلا لانى عرفت ان سجله اسود وهيتفصل نهائى وبعد ما اتربى فعلا وهددته ان لو ابنى او اى تلميذ فى المدرسه حصل له اى شىء ومحترمش نفسه هحبسه فعلا وهربيه بطريقه تانيه واقر وتاب .. وفى النهايه اتنازلت عن المحضر مع ان مأمور القسم هدده وكان رافض الصلح للضغط اكثر عليه

وبقول لصاحب الموضوع دى الطريقه الوحيده اللى تنفع مع المدرس اللى عايش درو البلطجى على الاولاد

لو مفيش اصابه ظاهريه..او اى شىء تجيبه بيه اكبر تهديد له انك هتشتكيه فى النيابه الاداريه وهتفضل وراه لحد مايحترم نفسه لان لو دخلت المدرسه وعملت معاه الواجب هو هيلبسك المحضر ..وهتبقى انت اللى فى ايده..