الموضوع: بلد عايزه الحرق

أبو دى بلد على دى عيشة الواحد والله جاب أخره من أم البلد الزبالة دى عمالين بس نتكلم الاخوان والسيسى وسايبين البلد شعب يحب الكلام وبس
انا لو اتكلمت عن كمية الفساد اللى فى البلد دى ممكن سيرفير المنتدى يقع من البلاوى اللى هتتكتب
الحقيقة انا مش عارف اكتب ايه ولا ايه ولا ايه

بم ان المنتدى فى المقام الأول سيارات فانا هتكلم عليها الاول
تلاقى عربيات تمنها فوق ال 300 الف وانت طالع يعنى وتلاقى الحكومة بتوفرلك بنزين شبه وشها العكر سواء بنزين 9 او 95 حاجة استغفر الله العظيم وبسببه العربيات بتجيب مواتير وهى لسه زيرو وتلاقى بقى التسقيف والحاجات اللى انتوا عارفينها يعنى ابقى شارى عربية بمبلغ كبير وشوف كان جماركها ايه وبتشتريها باضعاف اضعاف تمنها فى اى بلد تانية وبسبب بنزين زبالة تلاقى ان العربية مش مظبوطة معاك

أسعار السيارات بقى فحدث ولا حرج ....هيونداى i10 هاتشباك لو سعرها يوصل لفوق ال 100 الف جنيه مصرى يبقى ده اسمه ايه ده انا بالسعر ده لو فى بلد محترمه اركب لكزس وحاجات عاليه اوى قيس على كده كل العربيات اللى موجودة بقى

نتكلم عن الطرق أسواء طرق هتشوفها فى حياتك هى الطرق المصرية المفروض لو احنا فى دولة محترمه وماشى فى طريق مبصش على النقر والحاجات دى بيبقى تركيزى فى الطريق عامة وبس انما تبقى ماشى على طريق دولى وفجاة على سرعة عالية تلاقى حفرة قدامك طب افرض جيت تتفاداها مانت جنبك واحد ممكن تلبس فيه وانا مش بتكلم عن الطريق الدولى بس ده كل الطرق كده

السايس..... وكان الشارع بتاع أبوه لازم فى اى مكان تركن فيه عربيتك تدفع ( تشخلل جيبك علشان تعدى ) وياريت انه بيعملك حاجة فى العربية لو فكر يمسحلك الزجاج وتلاقيه مجلمط


عن السيارات فيه بلاوى بس الموضوع مش هيسع لذكرها


الاعلام .............اقذر حاجة بشوفها فى حياتى كلهم زبالة ومتافقين وده مثال واحد على قناة صدى البلد مشهور يقولك اللى هيقول ان ثورة 25 يناير سلمية هضربه على قفاه ومرتضى منصور يقولك اللى هيقول 25 يناير ثورة هضربه بالجزمة وحياة الدرديرى على قناة الفراعين تقولى ايوه انا بحتقر 25 يناير واشتكونى واعملولى
ده غير الفتنة اللى يعملوها فى الشعب وللاسف فئة كبار السن بتصدق هؤلاء الأغبياء


كنت فى المطار النهارده بجيب الوالدة من المطار فانا كنت جايب العربية اللى محمل عليها الشنط وحاططها جنب العربية ويدوب بفتح شنطة العربية الاقى واحد بيشيل الشنط وبيحطها فى شنطة العربية وعمال يرزع ويخبط فى الشطنه وكانه شايف عربية 127 قدامه والعربية لسه زيرو المهم بهدلته وقولتله امشى من قدامى حالا بدل ما مش هيحصل كويس

تبقى فى الاسواق العامه مثلا محل تيشرتات وبنطلونات تبقى بتتفرج كاى واحد تلاقى تعالى يا باشا انا بقى مبحبش نظام ان حد يجبرنى على حاجة فى اى بلد بتفرج براحتى ومحدش بيكلمنى غير لما بنوى شراء اى منتج


التعليم..........أنا أسف فى اللفظ بقى أوسخ حاجة فى مصر كلها لان مفيش تعليم من الاساس ده كلام هجص وبس والكل بيعتمد على الدروس الخصوصية وفى راى المدارس يقفلوها احسن وياريت ان اللى بياخد درس ده بيستفيد حاجة والله ولا حاجة الا البعض القليل وفى الاخر كله يعتمد على التلقين والحفظ

التربية : مبقاش فيه فى مصر أخلاق مره كنت ماشى بعربيتى وشوية عيال باين عليهم فى ابتدائى ماشين قدامى فى نص الطريق فانا بضربلهم كلاكس محدش عبرنى فتحت الشباك وناديت واحد منهم بقولى حبيبى وسع شوية الاقيه يرد عليا ببجاحة ايه يا عم انت مالك وشتيمة بقى ميصحش اقولها
وانا هنا بتكلم عن عيال صغيرة مش ناس كبار كمان ده غير لما تلاقى عيال صغيرة بتشرب سجاير ومخدرات وشيشة ..........الخ ويقولك الشباب هم مستقبل مصر مستقبل مين يا عم ده الأجيال اللى جاية اسواء اجيال هتشوفها مصر


التدين : ويقولك شعب متدين بطبعه طب لما كل يوم تسمع حالة اغتصاب وقتل وتلاقى طبعا طول ما انت ماشى واحد بيعاكس واحدة وعلنى كده طب تعالى فى اوروبا كده تلاقى الناس لابسين شبه عار ومحدش بيبصلهم وكل واحد فى حالة وهما اساسا مش مسلمين
ده غير كلام تانى مش عايز ادخل فى تفاصيله


كفاية بقى انا ايدى وجعتنى من الكتابة
لو تلاحظوا انى كنت عملت موضوع قبل كده عن التنازل عن الجنسية المصرية والهجرة الى المانيا ........أقسم بالله أى فرصة هتجيلى لانا مسافر و هولع فى أم الجنسية المصرية اللى ما اخدتش منها غير القرف وبس سكفينى فخرا انى اكون مواطن المانى وعلى الاقل هتعامل احسن مليون مره من انى مواطن مصرى

حرام بجد والله اللى بيحصل مش هقول أكتر من كده