الموضوع: ملاك كيا سيراتو خليجي ٢٠١٥

السلام عليكم وحوش نايل موتورز،،، حبيت اعمل موضوع جديد لكل استفسارات و اراء الناس في السيراتو خليجي ٢٠١٥ و قطع الغيار و كل حاجه ليها علاقه بالعربيه نقدر انشاء الله نفيد بعض....

انا معايا سيراتو ٢٠١٥ خليجي الهاي لاين،،،، هي عامله دلوقتي ١١٠٠ كم وروحت عملت صيانة ال١٠٠٠ كم الحمد لله في كيا الخليجي اللي في الرحاب، الناس هناك محترمه بصراحه وانا اشتركت في شركة AAA اللي مسؤوله عن العربيات الخليجي، انا اشتركت سنتين او ٤٠٠٠٠ كم، لما روحت غيرلي زيت SHELL و فلتر زيت و كشف عالعفشه و ونضف فلتر وهوا وتكييف و سألني تحب تغير هوا عجل بنيتروجين وغيرت وغسلو في الاخر العربيه، كل ده ببلاش خدو بس فلوس الزيت و الفلتر حوالي ٣٦٠ جنيه،،،،،

ختمولي الكتاب بتاع الضمان تبع شركة AAA و قالولي الصيانه التانيه عال١١٠٠٠ كم، بس مجبوش سيرة اني اروحلهم تاني عال٥٠٠٠ كم؟!!! انا سمعت من الناس ان في صيانه كده بردو مجاناً عالعربيه عباره عن فحص كامل للعربيه ومش بيلعبوا في اي حاجه مجرد Full Checkup عالعربيه، الكلام ده صحيح؟!!

تاني حاجه انا بصراحه مظهرش معايا صوت الفرامل في التيل الخلفي اللي ناس كتير بتشتكي منه عالمنتدى خصوصاً بعد ال٢٠٠٠ كم، حد ظهرله العيب ده؟؟؟ بس انا لما بفتح الكبوت و بسمع صوت الموتور صوته تمام وكل حاجه بس في صوت تكتكه كده خفيف اوي و سألت اصحابي اللي معاهم كوري من زمان قالولي ده عادي و الرحاب بردو قالولي عادي عشان سير الكاتينه معدن وانا كان معايا لانسر بوما و السير بتاعها كلن كوتش عادي فانا مش واخد عالصوت ده في الموتور،
اخر حاجه لو عايزين كشف او شييت مجمع بكل اسعار قطع الغيار بتاعتها عشان الواحد محتار يأمن عليها لو حصل حاجه لقدر الله ممكن اقدر على مصاريفها ولا لازم تأمين؟

ياريت تطمنوني يا شباب وجزاكم الله كل خير،،،، وشكراً