تقرير شامل رحلة شرم الشيخ فى الفترة من 11 الى 15 اكتوبر
اولا احب ان اشكر الزملاء اللى شاركونى قبل السفر بنصائحهم للسفر او للصيانة العربية
ثانيا انا عارف ان فى تقارير قبل كده اتكتبت عن الموضوع ده بس لو تم اضافة هنا معلومة جديدة يمكن ان تفيد الزملاء وتعطى الموضوع ثراء وتكون من ضمن الموضوعات ومرجع لاى عضو يريد ان يحصل على معلومات بخصوص السفر الى شرم الشيخ ؛ قبل اى شىء وقبل ما انوى ان اسافر بالسيارة عملت صلاة استخارة واستقرت انى اسافر بها لما وجدت من زملائى من احباطى بالسفر بها واللى يقول لى ده خطر ديه مجازفة حرام عليك انت معاك مراتك وبنتك :babypubh: والطريق خطر ومش عارف ايه حسسونى انى طالع ارض الضياع وحقابل دينصورات وتنين مجنح :evil:
واللى بصراحة شجعنى ولو انهم اثنان فقط ؛ وسبب اختيارى للسيارة عشان اكون براحتى اقف فى اى رست براحتى ؛ المدام وبنتى وخصوصا ابنتى لن تستطيع ان تصمد فى اى اتوبيس وكانت حتعزبنى انا وزوجتى ؛ اتفسح بها فى شرم اكنى فى اسكندرية بالظبط ؛ بالاضافة الى انها اوفر بكثير من السوبر جيت كما سأعرض لكم تكاليف العربية فى اخر التقرير ( معلش استحملونى شويه )
البداية اولا كانت مع صيانة السيارة :
1- تم المراجعة على ضغط الكاوتش وتتاكد ان الكاوتش بتاعك يقدر يستحمل السفر يعنى من الاخر ميكنش كاوتشك الجومة بتاعته تعبانة ولا كل شويه يريح منك وتروح تزوده لانى فعلا شفت كاوتش كتير على الطريق شايط ومتقطع من عربيات ومرمى على جانبى الطريق .
2- اتأكد ان السيور بتاعتك سليمة ومش متشققة ولا مهرية وطبعا اى حد متابع لصيانة سيارته وبيغير السيور فى ميعادها يبقى ميعتلش هم للموضوع ده بالنسبة لى السيور مكنتش عدت 8000 كليو على تركيبها ؛ كله محسوب بالورقة والقلم ههههه ؛ وبرضه القيت نظرة عليها قبل السفر .
3- عمل دورة نظافة للرداتير مع انى عارف ان الريداتير بتاعى والحمد لله تمام بس برضه رحت عملت له دورة نظافة انا كل 8 شهور بعمل له نفس الدورة واغير المياه .
4- غيرت زيت الموتور مع انه كان باقى له حوالى 1300 كيلو واغيره ؛ بس انا قلت اغيره اضمن ... انا ماشى بمبدأ ريح عزيزة ( عربيتى )... تريحك ؛ صون عزيزة ... تصونك .
4- راجعت على جميع سوائل العربية بالنظر كله تمام والتكييف كده كده كنت بستخدمه على طول عشان الحر اللى الواحد فيه وراجعت على انوار السيارة وغيرت الفانوس الشمال عشان كان مصفر على الاخر .
ثانيا : حجز الفندق
ولانى كنت اريد ان احجز خلال فترة العيد وجدت الحجوزات كمبليت فقررت ان احجز الاسبوع اللى بعد العيد تكون الدنيا هدت شويه حجزت فى فندق جافى رسورت 4 نجوم على خليح نعمة 3 وجبات بدون مشروبات وانا نزلت فيه العام الماضى فعشان كده كنت عارفه قعدت فيه 4 ليال .
ثالثا : الطريق
اتحركت انا واسرتى ( زوجتى وابنتى ) الساعة 12.30 ليلا وصلت بوابة الاسكندرية 1.2 صباحا مشيت على مهلى لم اتعدى 130 ك/س وصلت محطة تموين امارات مصر بعد بوابة القاهرة على 3 فجرا مونت منها ومنها على الدائرى ثم طريق السويس وكل ده والدنيا ظلمة وبالذات فى الطريق ده لم اتعدى 100 ك/س عشان اول مرة امشى عليه مع انى كان جنبى طيارات والدنيا كحل مش عارف كان بيجروا اذاى ؟؟!!! وصلت عند بوابة السويس ومحطة كالتكس 6 صباحا بعد ان الدنيا نورت والواحد شاف الطريق مونت منها ودخلت على طريق النفق قعدت فى استراحة قبل النفق حوالى ساعة ريحت نفسى والعربية وشربت قهوة عشان افوق عشان اللى فات حمادة واللى جاى حمادة تانى خالص . عديت النفق على 7.3 واخدت طريق شرم ؛ طريق جميل مع انى كنت خايف منه بس بصراحة ذى الفل والمنحنيات اللى فيه والواحد يخدها براحة وبهدوء تمر بسلام اما حتعمل فيها شوماخر المنحنى حيرميك بره لم اتعدى فى هذا الطريق 130 ك/س عشان اول مرة امشى عليه وكنت واخدى حذرى من اللى جايين فى المقابل بصراحة فى سواقين اتوبيسات وتويوتات قاتلين :pirate14: جايين فى حارتك ولا همهم حاجة ترعش له ولا هو هنا ربنا يسترها معاهم ومعانا .
مونت مرة فى ابو زنيمة ومرة فى مدينة الطور عشان اريح شويه وادخل على التقيل ملفات قبل شرم ومنطقة الجاذبية اللى لولا الزملاء هنا قالوا عليها كنت افتكرت انى عربيتى فيها حاجة العربية مبتسحبش ومش راضية تجرى بس بتيجى بفايدة ان المنطقة فيها منحنيات ( حمادة تانى خالص ) دخلت على مدخل شرم ودفعت 3 جندى ووصلت الفندق على 12.3 طهرا وهى ساعتين نمتهم وقمت بأه ده احنا فى شرم حنقضيها نوم ولا ايه:049: احنا مش بنيجى كل يوم هنا والحمد لله قضينا 4 ايام تمام .
فى رحلة العودة اتحركت من الفندق 10 صباحا وانا طالع من شرم المرور محبش امشى من شرم من غير ما يخدوا منى تذكار راح فقعنى مخالفة ردار بعد بوابة شرم فى منطقة اساسا الواحد ماشى فيها بالعاية لانها مطلع وشفت الرادار وسرعتى لم تتعدى 100 واول ما لمحت الردار رحت مهدى على طول راح فقعنى سرعة زيادة قال 110 ك/س اقول للباشا احنا ضيوف عندكم يقولى كلنا ضيوف يا بيه .الحمد لله رجعت اخدت الطريق بزمن اقل من الذهاب عشان كنت اخدت عليه .
بس المتعب بجد الدائرى بتاع القاهرة زحمة متعرفش عشان ايه طريق السويس القاهرة فيه شويه نقر وحفر عجب وتريلات محتلة الطريق عاوز تنزل تبوس راسهم عشان يعدوك الحمد لله وصلت الى محطة امارات مصر على مدخل القاهرة ريحت فيها ساعة وبعت كده طلعت على طريق القاهرة اسكندرية وصلت البوابات 9.3 مساءا ومنزلى بسيدى بشر 10.3 والحمد لله .
رابعا : التكلفة
- المسافة المقطوعة : 1271 كيلو ذهاب وعودة
البنزين المستهلك : 112 لتر * 2.6 = 291 جنيه
الزيت : تقريبا فى حدود 55 جنيه
كارتات الطريق : 17 جنيه
يعنى التكلفة فى حدود 363 جنيه .
بالاضافة الى تكلفة الرادرا طبعا 150 جنيه .
ملحوظة : تذكرة السوبر جيت من اليكس حتى شرم 130 جنيه .
ارجو ان يكون هذا التقرير شامل ووافى واسف على الاطالة
