هو غريب شوية إن حضرتك تكتب عنوان الموضوع "إلى مالكي السيراتو الجديدة".. وكل اللي ردوا محدش منهم معاه العربية!!!!
طيب..
عموما.. العربية مميزة جدا في إمكانياتها... ومقارنة بالعربيات اللي في نفس الفئة بتاعتها دلوقتي ممكن نقول إنها تعتبر من أفضل الخيارات حاليا
يعيبها من وجهة نظري الآتي:
علشان تستمتع بيها فعلا وتحس إنها مميزة لازم تجيب الهاي لاين أو الفئة اللي قبلها مباشرة.. يعني مضطر تدفع زيادة كتير شوية
استهلاك البنزين فيها أعلى شوية من منافسينها .. بس هو هو نفس استهلاك الإيلانترا .. لإنهم نفس العربية في الآخر.
الفوانيس الليد فعلا غالية جدا .. بس ليهم رونق لا يعلى عليه.. والغاوي ينقط بطقيته
في المقابل... مزاياها كالتالي:
موتور قوي بالنسبة للفئة بتاعته 130 حصان
قاعدة عجلات هي الأطول في فئتها... يعني مسافة كبيرة جدا للجالسين في الخلف
العفشة متوازنة بشكل كبير... يعني مش ناشفة زي الشكل القديم... ولا طرية تحسسك إنها سايبة
ثبات العربية أنا شخصيا بعتبره كويس جدا.. بس أكيد ليه حدود... يعني أنا مثلا بمشي 120 ومش بحس إني أصلا ماشي بسرعة.. وجربت أوصل لحد 160 ومفيش أي إحساس بالقلق (على الطوالي طبعا)
الفئات العالية فيها شوية أوبشنز مش موجودة في أي عربية منافسة.. كفاية نقل السرعة من الدركسيون والباور اللي تقدر تتحكم في قوته.. وكمان الكراسي المكيفة والتكييف الخلفي... ولا حاجة من دي موجودة عند أي عربية منافسة ليها في مصر.
طبعا.. عوامل السلامة فيها كويسة جدا .. بس في الفئات العالية بس... عندك ESP .. ABS.. وكمان 6 إيرباجات
أنا شخصيا معايا فئة الـex.. بس هي هنا مختلفة عن الموجودة في مصر (أقل منها كتير للأسف).. ومع ذلك مبسوط بيها جدا.. ولو كانت الأمور مستريحة ماديا أكتر شوية كنت أكيد هجيب الهايلاين.
توكل على الله وهاتها.. مش هتندم
...
المفضلات