مرور فيصل الجميل

**eng_amg** · 19-10-2014 06:26 PM

امبارح كان عندي فحص وتجديد رخصة لعربية لانوس في مرور فيصل الجميل.
الصراحة مدخلتش المرور دا من اول 2013 كنت برخص لانسر وكان المرور زحمة ولكن مكنش في محسوبيات ولا سماسرة.

امبارح بقي روحت الساعة 6:30 ص علشان الحق مكان في طابور الفحص قبل الزحمة... بدري بقى.:)
لقيت الطابور واقف 3 صفوف جنب بعض من باب الفحص لحد النساجون الشرقيون ناحية شارع الهرم... الكلام دا 6:30 الصبح.

قولت طبعا استحالة حلحق اخلص فحص وشبابيك النهاردا.

لقيت ناس حلوة باين عليهم (مواطنين شرفاء) بيقولوا : عايز تخلص؟
قولت ماشي.. ايه النظام؟
قالي 120 ج طابور . و 180 ج فحص. دا غير الشبابيك وطبعا المصاريف الرسمية.

بصراحة انا بحب الالتزام ومبحبش اعمل حاجة غلط. لكن مكنش ينفع اخد اجازة من الشغل يوم تاني او يومين قولت ماشي. عديني الطابور فقط..

قالي والطفاية والمثلث والاسعافات؟
قولتله معايا.
قالي لا حيخليك تشتري تاني. ولما سألت قالوا فعلا لازم تشتري تاني.. بلطجة كدا.
المهم اخد 100 ج فحص و 120 طابور. وكام واحد كدا ملوش اي 30 لزمة طلع يقولي (الشاااي) داغير الجراج يعني حوالي 250:300 ج

الجميل ان كل دا علي أعين السادة الضباط الي هما طبعا بيقاسموا معاهم.

خلصت الفحص ووقفت في الشباك والخزنة وروح صور وتعالي.....

علي 11:30 استلمت الرخصة لاقتها بدون اثبات الفاميه.

سألت في الشباك قالي روح عدل الملف من مهندس الفحص..
طبعا علشان اخلص صبحت علي مهندس الفحص بكباية شاااي :)

وانتظرت ساعة كمان طلعت الرخصة بعنوان غلط.

سألت قالي روح الشباك يطبعلك رخصة تانيا...

اه والله.....

طبعا كنت صاحي الساعة 5:00 ص ومش شايف ادامي..
قولتلوا لا خلاص. دا العنوان دا صح. دا انا كنت غلطان.

واخدت الرخصة ومشيت...

ودا قمة قلة الادب في مصلحة حكومية.

**ahmedelrayan** · 19-10-2014 07:12 PM

مرور فيصل ده من اسوأ المرورات فى مصر انا نفسى اغير محل الاقامة بسببه

**محمد عبدالدايم** · 19-10-2014 07:47 PM

انا كان محل اقامتى تابع لمرور البساتين وللاسف غبرت وبقيت تابع لمرور فيصل بس رخصه عربيتى مرور عين الصيره وعندى فحص وتجديد ونقل ملكيه ف مايو 2015.
و عمرى ما اتعاملت لا مع مرور فيصل ولا عين الصيره بس من الواضخ انها هتكون تجربه منيله. ربنا ييسر الحال.

**hugan** · 19-10-2014 09:58 PM

ههههههههه
احلي حاجه العنوان الغلط
ربنا ينتقم منهم
سبب عذاب المواطنين
انا مش فاهم يعني من قله طالبي الشغل في مصر
ولا من قله الفلوس اللي بينهبوها
ما يقسموا كل الادارت الي 2 و3 ويريحوا الشعب

**tameem2010** · 20-10-2014 01:08 AM

ياسيدي احمد ربنا ان العنوان هو اللى غلط
انا كنت في المرور الزباله ده وطلع لي الرخصة برقم شاسية مش بتاعي خالص معرفش جابه من فين
والحمد لله انى اخدت بالي والا كنت لبست في الحيط
بس الحمد لله الغلطة كانت من موظف الكمبيوتر وعشان كده مرجعتش الفحص
بص احمد ربنا انهم رخصوا لك العربية من اساسه

**S O P H O S** · 20-10-2014 03:03 AM

ربنا يستر
بكرا رايح افحص وارخص تاني ان شاء الله
دعواتك من الي هشوفه كده

**gade2** · 20-10-2014 11:25 AM

شكله ايه المهندس دا علشان الواحد ياخد باله وهل المرور فى اكترمن مهندس فحص لان
كان فى مره مهندس مرور فى فيصل مليان كده بس كان ابن حلال

**eng_amg** · 20-10-2014 12:14 PM

المشاركة الأصلية كتبت بواسطة ahmedelrayan

مرور فيصل ده من اسوأ المرورات فى مصر انا نفسى اغير محل الاقامة بسببه

المشاركة الأصلية كتبت بواسطة محمد عبدالدايم

انا كان محل اقامتى تابع لمرور البساتين وللاسف غبرت وبقيت تابع لمرور فيصل بس رخصه عربيتى مرور عين الصيره وعندى فحص وتجديد ونقل ملكيه ف مايو 2015.
و عمرى ما اتعاملت لا مع مرور فيصل ولا عين الصيره بس من الواضخ انها هتكون تجربه منيله. ربنا ييسر الحال.

ياريت والله نغير محل الإقامة في البطاقة.. فعلا أنا بفكر بجدية أعمل كدا.. حتى لو حكتب عقد إيجار عند أي صديق لي في أكتوبر أو م.نصر

صديق لي عنوان سكنه لسه في الضاهر مع إنه نقل الهرم من 10 سنوات لكنه رافض يغير محل الإقامة..
الوقتي عرفت ليه.. :)

المشاركة الأصلية كتبت بواسطة ashrafwolf

انا ساكن في فيصل و مش هقول غير حسبي الله و نعم الوكيل
حسبي الله و نعم الوكيل
حسبي الله و نعم الوكيل

المشاركة الأصلية كتبت بواسطة s o p h o s

ربنا يستر
بكرا رايح افحص وارخص تاني ان شاء الله
دعواتك من الي هشوفه كده

عادي بقى.. شدة وتزول.. أهم حاجة تروح وأنت متفائل وأي موقف يحصل ينرفز تكون متوقعه علشان تعرف تكمل التجديد علي خير..

**MOHAMED HASAN** · 20-10-2014 12:19 PM

انا مرورفيصل و ساكن فى العمرانيه و المرور بياخد منطقه الهرم و فيصل و العمرانيه و بولاق الدكرور دى كارثه دا كل منطقه من دول تعمل بالناس بتوعها تعمل محافظه لوحدها انا رخصتى منتهيه من 7/2012 و مش عارف ارخص لحد دلوقتى و مش فاضى للكلام دا بس انا سالت فى المرور قالوا منطقه الهرم و العمرانيه حيتنقلوا فى مرور منمذج زى البنك فى المريوطيه على شهر 2 الجاى انا حستنى لحد الوقت دا و ربنا يسهل