مساعدة في اختيار عربية زيرو

**paramara** · 20-10-2014 04:57 AM

انا كان معايا بي ام دبليو e46 2004 high line و الحمد الله بعتها من اسبوع لاني طلع عين اهلي في العربيات المستعملة، و مع ان العربية تحفة و تقريبا عربيتي كانت من انضف الـ e46 اللي في البلد و كنت بحبها جدا بس برده مستعملة و ورتني ايام ربنا يعلم بيها.

فقررت اني اظبطها و اخلص من قرف امها للابد و قد كان، و طبعا كان القرار اني معتدش هركب عربيات مستعملة تاني و هجيب عربية زيرو.

ولاد الحلال اللي زيكوا كده قالولي مادام هتجيب زيرو يبقي هات مرسيدس زيرو عشان سعر اعادة بيعها كويسة و شوية كلام كده مش فاهمه بس المهم ان الكلام اللي انا مش فاهمه ده اقنعني و انا اقتنعت.

طبعاً زي اي شاب مصري اصيل عملت نفسي فتك و قولت هقعد بقي علي الانترنت و اشوف اسعار العربيات الكميلة دي و اشوف في reviews علي اليوتيوب، بس الموضوع مكنش مفيد اوي لاني معرفتش استقر علي حاجة و انا الوقتي محتار ما بين الـ A و الـ CLA و الـ C.

عاوز عربية تكون الـ reliability بتعتها عالية جداً، في نفس الوقت تكون عملية في بلدنا الحلوة الكميلة الامورة خالص دي، و تكون الرفاهية عالية جداً من الاخر عربية من الـ ٣ دول و متزعلنيش.

فقلت بقي اسأل اهل الخبرة بدل ما انا عامل فيها فتك كده و برجع اعيط في الاخر (اه والله العظيم بعيط).

دي هتكون رابع عربية ليا في سنة، فبعيداً عن الناس اللي ممكن تجري واريا عشان دي رابع عربية في مدة قليلة و عمال اخسر في فلوس، خطرت علي بالي فكرة اني مشتريش كاش و ادفع مقدم ١٧٠ الف و اقسط الباقي عل كام سنة عشان اضمن كده ان العربية تخيب ظني و تقعد معايا شوية حلوين.

فانصحوني كده اعمل ايه و اروح فين و اجي منين و اجيب ايه، من الاخر مش عاوز اجيب عربية و ازعل، اخوكوا عاوز يتبسط.

**Ayman_saad** · 20-10-2014 08:26 AM

صباح الخير
الحكاية مش حكاية فتاكه ، لا
الحكاية ومافيها أن الأنسان دائما يحب الأفضل ، وهذا الحب مشروع ،
نرجع لمشكلتك
أنت لسه نازل من bm يبقي أتوماتيك هتروح للمرسيدس ،
لأنك مش هتعرف تركب أي عربية تانية بأستثناء الأتنين دول ،
والأنسب لك هتكون الـ C وفي الحالة دي هتقدر تقول أنك بدأت تركب مرسيدس ،
ولكن للأسف فيه كلام مثار حالياً عن مشكلة في موتور الـ C علشان نوعية البنزين ،
أنا حاجز الـ C 180 أعلي فئة وبعد ما سمعت الكلام ده بقيت متخوف وبفكر جدياً أنقل علي BM
أنا قولت لك وجهة نظري ومش عارف بقي قدرت أفيك ولا لأ ،
علي العموم موفق إن شاء الله .

**dedo_ryo** · 20-10-2014 12:41 PM

بلاش مرسيدس دلوقتي خالص
بص عاللينك ده و استني شويه
لان مرسيدس عندها مشكله كبيره في المحركات اليومين دول لانها مش متوافقه مع البنزين

**hesham fawzy h** · 20-10-2014 01:05 PM

مشاكل المرسيدس فردية

الفترة الى فاتت البنزين كان مغشوش فعلا

و ربنا يستر المرة الجاية

**paramara** · 21-10-2014 04:52 PM

يا نهار ابيض!
طب ايه الحل؟ و بردة عاوز حد يفضلي واحدة من التلاتة كمقارنة مثلاً.

**paramara** · 24-10-2014 11:09 AM

الا من مجيب؟

**TeMoON** · 24-10-2014 12:17 PM

المشاركة الأصلية كتبت بواسطة paramara

يا نهار ابيض!م
طب ايه الحل؟ و بردة عاوز حد يفضلي واحدة من التلاتة كمقارنة مثلاً.

حضرتك ممكن تشترى 320 جديدة هتكون افضل من مرسيدس وبتستخدم بنزين 92 عادى ومفيش منة مشكلة وبما ان حضرتك ناوى تخلى العربية معاك كام سنة يعنى هنتكلم ف 4 او 5 سنين تجيب البى ام وتركب العربية وتستمتع بيها وتنسى المرسيدس وفى الحالة دى انت الكسبان نظرا لكوارث الموتور والبنزين فى مصر مغشوش ومرسيدس ملبسة الناس الطاقية فا نصيحة خليك فى bmw افضل من مرسيدس من بعد مهازل مرسيدس والبنزين 95 وانت احق بالفرق دا يعنى فرق حوالى 4 جنية فى اللتر انت اولا بية فا حضرتك فكر تفكير عملى وممكن تشوف 118 لان لسة مشكلة مرسيدس طويلة شوية

**Ayman_saad** · 24-10-2014 01:24 PM

كلام الأخ / TeMoON مظبوط
أنا لغيت بالفعل حجز الــ C
وبأذن الله عربيتي القادمة هتكون BM
علي فكرة عندك 316 ممتازة فعلاً ولو عندك أمكانيات فيه برضو عندك X3
وبالتوفيق إن شاء الله

**paramara** · 24-10-2014 03:52 PM

المشكلة ما اخبيش عليكم اني متعقد شوية من الـ bmw علي الرغم فعلا ان كل الناس بتشكر جداً في الـ f30، و الفكرة ان المرسيدس بيمسك سعر شوية عن البي ام و الأودي، و كان نفسي اجرب حاجة مختلفة غير البي ام شوية.

بجد الواحد محتار جداً و مش عارف اعمل ايه.

**TeMoON** · 27-10-2014 09:06 PM

المشاركة الأصلية كتبت بواسطة paramara

المشكلة ما اخبيش عليكم اني متعقد شوية من الـ bmw علي الرغم فعلا ان كل الناس بتشكر جداً في الـ f30، و الفكرة ان المرسيدس بيمسك سعر شوية عن البي ام و الأودي، و كان نفسي اجرب حاجة مختلفة غير البي ام شوية.

بجد الواحد محتار جداً و مش عارف اعمل ايه.

المشكلة هنا فى مرسيدس الموتور الى بيبوظ ومشكلة الاودى وبى ام ان سعرهم بيقع وانت عاوز تركب مرسيدس ومتعقد من بى ام يبئة الحل من وجهة نظرى الى على ادى كالاتى

اشترى عربية رخيصة لمدة سنة وشوف مرسيدس هتعمل اية فى المصيبة الى عندها دى يا المشكلة اتحلت والعربية بقت زى الفل يا تكون قررت وحددت تركب اية بدل مانت محتار كدا فى ظل كوارث مرسيدس مع المصريين

الموضوع: مساعدة في اختيار عربية زيرو

LinkBack

أدوات الموضوع

عرض

-

-

-

-

المواضيع المتشابهه

هجيب عربية زيرو ومحتاج مساعدة من الخبراء

مساعدة فى اختيار عربية اتوماتيك

أرجو المساعدة في اختيار عربية زيرو

مساعدة في اختيار عربية جديدة

مساعدة في اختيار عربية 4x4 في السعودية..

الكلمات الدلالية لهذا الموضوع

المفضلات

المفضلات

ضوابط المشاركة