سرعة الاجابة بخصوص اسكودا اوكتافيا 2007

**badawy2014** · 21-10-2014 10:53 AM

ارجو من الاعضاء المحترمين الجواب عن هذا التساؤل معايا فيرنا 2004 اوتوماتيك و امامي اسكودا 2007 عاملة 170000 الف حاله جيدة

ممكن اعرف السعر يتراوح بكام
استهلاك البنزين لها و ايضا اسعار قطع الغيار ( من حيث الجودة و السعر و عمر القطعة )
اماكن الصيانه
و ماهي الاشياء التي يجب النظر فيها عن شراء هذة العربية حيث انني معلوماتي عنها = صفر

الرجاء من السادة الاعضاء الرد الوافي و شكرا جدا لكم

**eng_amg** · 21-10-2014 11:17 AM

السكودا a5 إستهلاكها في البنزين رائع جدا علي موتورها وحجمها ووزن العربية - يعني زيها زي اللانسر 1600 مثلا.ويمكن أقل.
بالنسبة لقطع الغيار متوفرة جدااااااا ولكن غالية طبعا بالنسبة للكوري. ومينفعش تقارن ألماني بكوري

لكن لو قارنت بالياباني لنفس الفئة والموديل حتلاقي الأسعار واحدة تقريبا. بل والله في حاجات أرخص من الياباني.
أنا بقارن باللانسر 2007 1600

الحاجات إلي لقيتها أرخص بالمقارنة بأسعار التوكيلات زي:

- تيل فرامل أمامي وخلفي
- طنابير أمامية
- مساعدين أمامية
- فلاتر هواء وتكييف وبنزين
- غيار زيت الأوتوماتيك. وناس كتير مبتغيروش
- فوانيس شبورة أمامي
- ومش فاكر كويس بقيت الحاجات

إلي حتلاقيه أغلى شوية في الاصلي:
- فوانيس أمامية
- مساعدين خلفي
- طاقم سير الكاتينة كامل

لكن الفارق مش كبير.

وطبعا عمر قطعة الغيار 3 أو 4 أضعاف الياباني

أهم حاجة تبص عليها في العربية بعد الأساسيات هي الكهرباء والألكترونيات. تتأكد أنها سليمة زي حالة الفابريكا ومتلعبش فيها.

المشكلة في أوكتافيا إنها مليئة بقطع غيار إلكترونية عن العربيات الياباني في نفس الموديل.
يعني حتلاقي في زجاج الباب كونترول - ولزيت الموتور كونترول - ولزيت الفيتيس كونترول ... يعني لازم تتأكد أنها عربية مش متهانة.

وربنا يوفق

**eng_amg** · 21-10-2014 11:19 AM

بالنسبة للصيانة أي ميكانيكي بيشتغل فيها للصيانة الدورية - اللهم إلا في حالات معينة خاصة بالفيتيس والزيوت لازم يكون حد فاهم في سكودا.
عموما أي حد محترم يشتغل فيها عادي جداااااا

**reda elgohary** · 21-10-2014 11:26 AM

متابع
وبالتوفيق ان شاء الله .

**reda elgohary** · 21-10-2014 11:27 AM

بس نصيحة ، روح أكشف ع العربية ف توكيل سكودا عشان يعمل لك تقرير بالحالة .
والله المستعان .

**badawy2014** · 21-10-2014 12:52 PM

شكرا جد ا جدا علي سرعة الرد من الاعضاء المحترمين

ولكن هل هناك اختبارات اعملها في السواقة يعني امشي مثلا في مطلع اشوف rpm كام حاجة زي كدة
و كمان سعر السيارة يتراوح بين كام و الف شكر مرة ثانية لكل من قام بالرد

**moumen_hs** · 21-10-2014 02:05 PM

ياباشا علشان ماتدبسش شوف العربية وفصصها زى مانت عارف وأتاكد أنها بتعمل الصيانات فى نوعيدها وتغير زيت الفتيس على 60 الف أهم حاجة ولما تقول هشترى أكشف عليها فى التوكيل هو 500 جم الاقصى فى المعادى بيديك تقرير مفسر لكل حاجة لان أخويا كان هيشترى عربية كل حاجة فيها سليمة وفبريكة بس لما كشفنا عليها فى التوكيل شرك الفتيس ونصحنا بعدم شرائها لان الفتيس لم يتم عمل تغير الزيت فى ميعادة ودة قلب العربية أو أرتوك فى العبور أو شوف الصينات بتعاتها فى أى توكيل وجيب تاريخ العربية حدود السعر 105 الى115 فى ظل الغلو

**طارق _عبد السلام** · 21-10-2014 02:40 PM

هو ال 170 الف ده كيلو.....؟! اظن صح مش فلوس

من ناحيه الكيلومتر فده كتير شويه بس الاهم عندك هو فواتير الصيانه

ثانيا الاختبار اثناء القياده ده بعد الفحص والتمحيص الجيد للعربيه هتشوف نقلات الفتيس عامله ايه معاك هل هى سلسه جدا ومبتحس بنتشه او رزعه او دبه فى الفتيس .. ده المهم والاهم.. وتكون العربيه واقفه صح..مش تشتريها وتوقفها انت

**طارق _عبد السلام** · 21-10-2014 02:45 PM

هو ال 170 الف ده كيلو.....؟! اظن صح مش فلوس

من ناحيه الكيلومتر فده كتير شويه بس الاهم عندك هو فواتير الصيانه

ثانيا الاختبار اثناء القياده ده بعد الفحص والتمحيص الجيد للعربيه هتشوف نقلات الفتيس عامله ايه معاك هل هى سلسه جدا ومبتحس بنتشه او رزعه او دبه فى الفتيس .. ده المهم والاهم.. وتكون العربيه واقفه صح..مش تشتريها وتوقفها انت