منقول من مغترب مصرى فى الامارات ( حدث بالفعل)

**Secret-Man** · 22-10-2014 12:34 AM

من المواقف الطريفة أول لما سافرت لإمارات
أول نصيحة من عمي ، لو توهت وقف عربية شرطة وقولوا تايه وهيساعدوك !!
أول حاجة جت في دماغي أن عمي بيسلمني
أول أسبوع توهت فعلاً ومش عارف أعمل أيه ؟؟
أتصلت على عمي قولتله أنا تايه في دبي ومش عارف أوصل للسكن بتاعي
قالي زي ما قولتلك شاور لأي سيارة شرطة
عملت زي ما قال شاورت لسيارة شرطة وقفوا وسألوني
الشرطة : شو فيه
أنا : تايه ومش عارف أوصل للسكن بتاعي
الشرطة : أركب
أنا : أركب !!!!؟؟؟؟ ليلتي مش فايته شكلها
ركبت في السيارة في الكرسي اللي ورا أتنين قاعدين واحد سايق والتاني جمبيه وقدامه لاب توب فتحه وسألني
الشرطة : أيه اللي تعرفه عن المنطقة اللي انت ساكن فيها يعني محل مشهور ماركت مطعم
أنا : فيه هايبر ماركت أسمه كذا والمنطقة أسمها كذا
اتحركنا دخل بنزينة على الطريق سألوني بتشرب قهوة ولا شو بتحب تشرب
أنا في بلاهه أحسد عليها ، أنت حضرتك بتتكلم بجد !!!!؟؟
الشرطة : يعني هتشرب قهوة
المهم جت القهوة وشربتها ووصلنا عند الهايبر ماركت اللي اعرفه ووصلوني لحد البيت ، وأنا كنت من الأزبهلال اللي أنا فيه فاتح بوقي ومش مترجم الصراحة
يا ترى لو عملنا إعادة للمشهد ده مع الشرطة المصرية أيه اللي هيتم ، مثلاً واحد جي من قرية أو محافظة ما من مصر ونزل القاهرة ووقف سيارة شرطة وقالوا تايه
هسيبك لخيالك مع أني عارف اللي هيحصل

منقول من مغترب مصرى فى الامارات

**هيثم مجدي** · 22-10-2014 12:46 AM

هاهاها خيال علمي :)
طب هقول لحضرتك حاجة بجد. العساكر الغلابة اللي بيبقوا في اشارات المرور, دول من اكتر الناس اللي ممكن تدلك على عنوان في المنطقة اللي هم فيها او مواصلات لاي مكان برضه.
انا دايما بسألهم عمر ما واحد فيهم قال معرفش. بيدلني على الاقل على موقف قريب او كذا لأنه بيركب اكيد منه وهو مروح.

لكن دي مش عقيدة الشرطة ولا فهمهم. انما هي شهامة و معدن طيب للغلابة اللي بيبقوا واقفين طول اليوم في الشمس.

**Shocky** · 22-10-2014 12:49 AM

**ibrahim sallam** · 22-10-2014 01:02 AM

ااقولك انا

هنا في مصر الشرطه الحمد لله ابتكرت حاجات جميله جدا

يعني ممكن تلاقيهم في سياره ميكروباص وممكن تلاقيهم في سياره سوزوكي 7 راكب وممكن تلاقيهم في تكاتك

وممكن تلاقيهم في عربيات كارو ومش تسالني هي الحاجات ديه كلها بتاعتهم

ويسلام بقا وانت واقف بتركب مواصله وتشاور لميكروباص من دول

لاء وتيجي تفتح الباب تلاقي اجمل ترحيب وطيخ وطاخ وطوخ غير قاموس التيييييييييت

وفي القسم نبقا نتحاسب

**adelghanem** · 22-10-2014 01:27 AM

لو شاورت لاى سياره شرطه فى مصر
وقولت لهم انا تايه حيركبوك معاهم...
ويودوك لاقرب قسم ويتسلوا عليك

**rompo10** · 22-10-2014 01:45 AM

حضرتك جاي تحرق دمنا ولا ايه عيب راعي شعور اخواتك في مصر هههههههههههههههه

**طارق _عبد السلام** · 22-10-2014 01:58 AM

ياسلااااااااااام نفس الموقف بالظبط حصل لصديق لى وفعلا الظابط محرموش من حاجه

ظابط داخل على القهوه هو ومعاه المخبرين بيفتش الناس قام صاحبى وهو بيديله البطاقه بيقوله والله عمرى مادخلت القسم ياباشا قام قايل للمخبر خد الواد ده... ولموا كم واحد وبعد ماوصلوا القسم قالهم فين الواد اللى عمرو مادخل قسم قال له اناياباشا قاله اهو انت دخلته اهو يا....... يالا على بيتكوا مشفش خلقتك تانى.... شوفتوا محرموش من حاجه

نفس الموقف .. بس مشربش القهوه فى البنزينه هههههههههههه ياراجل ده سؤال قال لو شاورت وقلتلهم تايه قال ...... ياااااااااااااااااااااه ده هياكل ضرب

**MTAK** · 22-10-2014 02:38 AM

حدث لي موقف مشابه في سنه 96 تقريبا،
كنت عاوز ادخل المركز الثقافي الامريكي الموجود داخل السفاره و معرفتش انهي باب و كنت انا وواحد صاحبي و لفينا حوالين السفاره شويه و فشلنا و خفنا لان لقينا بوكس في ناس لابس دروع بتبصلنا و متبعانا، و كان منظرهم ايامها غريب و له رهبته
المهم قمنا روحنا لحد عندهم و الظابط نزل من العربيه و قلنا له مش عارفين فين الباب

بكل احترام جاب فايل كبير من العربيه و مكتوب عليه خطة التأمين
و قالنا انا معرفش بس ندور سوا

و طلع خريطه للمكان بالمداخل و المخارج و لقينا الباب و اتفضلوا و خلاص و لم يطلب حتي البطايق

حدث بالفعل معي شخصيا

بس طبعا لا اجزم انه ممكن يحصل دلوقتي بس قبل ما حد يتريق يا ريت يدور علي الاجابه

**أحمد كمال** · 22-10-2014 09:43 AM

طيب

انا كنت باطير طيارتي بالريموت في صحراء الروية على الطريق العابر

حتة مفيهاش صريخ ابن يومين ......... و مرصوف فيها حتة صغيرة جدا للطيارين الهواة يطيروا طياراتهم ......

و جنب ارض بتاعة احد الشيوخ الكبار أوي أوي أوي أوي (و هو عارف ان الهواة بييجوا يطيروا جنب ارضه و عادي جدا) ...... احب اقول لك لو واحد زيه في مصر مش هتعرف تقرب من ارضه بخمستاشر كيلو

الطيارة تاهت مني و ما عرفتش ارجعها ....... دخلت بعربيتي وسط الصحراء ادور عليها

كملت و غرزت في الرملة

مش عارف اطلع

و ييجي لي ملاك من السما ...... دورية مدنية من العاملين بارض الشيخ المذكور اعلاه

باختصار :

1- سحبوا لي سيارتي من الرملة

2- العجلة اتخرمت ....... غيروا لي العجلة

3- صمموا اروح معاهم العزبة اشرب حاحة و انا رفضت لاني كنت اتبهدلت و تعبت

4- شافوا معايا طيارة تانية بكاميرا (الاولى كانت طيارة بجناحات مش تصوير) .... قالوا لي ما تطيرها و تدور بيها ....... قربت من سور ارض الشيخ و رجعت قالوا لي لا خش ورا السور يمكن تكون وقعت جوة (عايزك تتخيل لو طيارتك اللعبة وقعت في ارض مسؤول مصري ههههههههههههههههه)

5- خد تليفوني و اداني تليفونه عشان لو لقى الطيارة

6- بعد يومين لقى حطام الطيارة صوره و بعت لي الصور و قال لي لو عايز تيجي تستلمها (الجسم اتحطم بس المحركات و اليكترونيات الطيران سليمة فالخسارة اقل بكتير من خسارة كل شئ)

7- لا تخرج قبل ان تقول سبحان الله

الموضوع: منقول من مغترب مصرى فى الامارات ( حدث بالفعل)

LinkBack

أدوات الموضوع

عرض

منقول من مغترب مصرى فى الامارات ( حدث بالفعل) - انشر الموضوع فى :

-

-

-

-

-

-

المواضيع المتشابهه

اشتري هديتك من مصر - دعوة لكل مغترب

حوار مثير بين مغترب مصرى وشرطي سعودي

ارفع راسك فوق انت مصرى ... منقول

تعديل روعة على هوندا سيفيك تسعينات / ابداع مصرى / منقول

الكلمات الدلالية لهذا الموضوع

المفضلات

المفضلات

ضوابط المشاركة