الموضوع: افضل الحلول لو سمحتم

السلام عليكم ورحمة الله وبركاته
ياااارب يكون الجميع بخير و عام هجري سعيد عليكم ياااارب
كنت عايز آخد راي الاخوه الأعضاء في موضوع عربيتي فيكترا 97 2000 سي سي كنت عملت حادثه من شهر و نص و العربيه اتقلبت بيا و الحمد لله المهم في كذا حل لتصليح العربيه او بيعها عايز اخد رأيكم في افضلها
ملحوظه :- على اعتبار ان الموتور و الفتيس و التابلوه و الضفيره سليم
1 . أصلح العربيه نفسها و ده عايز مني اجيبلها نص خلفي و سطحيه و 2 باب و كبوت و مرايه قدام و اغير عفشه بالكامل و 5 كاوتش جديد و 2 اكصدام و ريداتير و سربنتينه تكيف 4 فوانيس و النثريات انته عارفينها و ده ح يكلف في حدود 17000 جنيه
2 . أشتري عربيه كامله متقطعه و دي بتكون بالمكنه و الفتيس و كل حاجه على اساس اخد رقم الشاسيه و الورق بس من العربيه القديمه و مس بيجي فيها الجنوط و الكاوتش و دي في الاوتو بتكون في حدود 17000 جنيه و تصرف سمكري و بويه و جنوط و كاوتش و دي تصرف كمان 15 تقريبا علشان تقف على حيلها و تبقى تمام
3 . ابيع الورق و العربيه و افضل عرض جالي فيهم 20000 للورق و 7000 للعربيه
ارجو الافاده و شكرا