الموضوع: للناس اللى هاجرت او بتفكر ايه رايك فى المقولة دى

المشاركة الأصلية كتبت بواسطة zorg

ده اخر موضوع ليا هسأل فيه عن الهجرة
ماهو رايك بالمقولة القائلة:
(اهم حاجة تحط رجلك فى البلد انشالله لو هتيجى زيارة او سياحة وانتا هتعرف تلاقى سكة - سيبك من اللى بتقراه فى المواقع و المنتديات و اللى الناس بتقولوا لك)
ياترى هل فى حد ممكن يعمل كده
ببساطة انا تعبت من البحث بقالى سنتين على الانترنت وفى النهاية انا قررت انى همشى بعد كام شهر مش عارف هروح فين بس همشى وخلاص
---
بعض الناس ممكن تكلمهم ويقولك سيبك من القوانين ومن الدنيا دى كلها وتعالى و حط رجلك وانتا هتعرف تتصرف او احنا هنساعدك هناك
الواحد يائس لدرجة انه ممكن يمشى ورا كلام هو مش مقتنع بيه - حاولت اسمع اغانى وطنية عشان اضحك على نفسى بس الواقع مفعوله اقوى بكتير ومدمر :d

الكلام ده كان زمان ممكن يحصل، دلوقتي اوروبا فيها نسبه كبيرة عايشة على تبرعات الكنايس، الي بيقولك تعالى واحنا نساعدك غالبا مش هيوريك وشه، حاجه بالعقل، اهل البلاد مش عارفين يعيشوا وبيهاجروا استراليا وكندا، هتروح هناك تعمل ايه؟
اهم حاجه ان الواحد يقنع باللي ربنا رزقه، حكاية ان اوروبا مفتاح النجاح دي خرافة الناس عايشة عليها وناس بتدور على السهل، وانا للاسف كنت منهم،


لو مخنوق من مصر جدا، جرب حظك في دولة خليجية
ولو ليك سكة في مصر وممكن تسلك خليك عندك احسن

لاء ما انا بدور على عرايس من بلاد نفسي اروحها في مواقع تواصل اجتماعي اجنبيه منها ما هو مجاني ومنها ابو فلوس للتعارف بشكل اسرع هدخل فيها بعد كام شهر

ههههه - اضحكتنى للاسف الموضوع معدش زى زمان انك توقع واحدة فى غرامك عن طريق الواى فاى مجربتش المواقع ابو فلوس بس خلى بالك من الscam
--------------------
طيب نتكلم فى الموضوع:
الموضوع خرج عن فكرته الرئيسية والسؤال كان واضح: هل تقبل بالمقولة اللى ذكرت فى الموضوع او لا؟
انا مبتكلمش على انك تروح اسود او تعيش بشكل مش قانونى - انا بقول انك تروح هناك ومن هناك تبدء تدور يعنى من الاخر تنط فى البحر وتعوم - يعنى فى ناس تقولك تعالى واعمل بزنس وبعدين وفق اوضاعك بدل ماتعقد على الانترنت ترخى كتير و اصل وفصل
اللى يقولك تعالى دراسة سنة او سنتين فى البلد الفلانية وفى الفترة دى حاول تتجوز
- لان الخلاصة انا تقريبا دعبست على الانترنت وتقريبا معتقدش خلاص ان فيه اى معلومات جديدة الواحد هيقدر يوصل لها
وملحوظة تانية انا مش عايز اسافر اكون ثروة وفلوس انا عايز اسافر واعيش على قدى
انا هجرب فين معرفش بس انشاللة البوست القادم بخصوص الموضوع ده اتمنى ان احكى فيه تجربته و البلد اللى انا رحتها اذا كان فى نصيب انشالله

ربنا يوفقك ياكبير وتنجح في تجربتك

يا جماعه الدنيا بره مش وردي برضه بس احنا طبعا شايفين الخدمات و الطرق و الشوارع و المواصلات و النظافه
و فاكرين ان ده هو التحضر لكن الواقع ان ده كده زي المياه و الهواء هناك حتي رومانيا و الدول الفقيره فيها الشوارع النضيفه و المواصلات المحترمه احنا بس اللي قاعدين في بلد مش ادميه
لكن بالنسبه للمشاكل موجوده و الدنيا مش هتضحك لك هناك فلازم تبقي عارف انك رايح مكان مش الجنه بس مكان فيه ادميه
ربنا يوفق كل واحد لما فيه الخير