حكايتي مع بيجو 405 لكي يستفيد باقي الأعضاء

أنا متابع بقالي فترة كبيرة جدا يمكن حوالي سنتين المنتدي و ماشاء الله طبعا و من الآخر فيه ناس كتييييير خبرتها واسعة جدا و مش محتاجة حتي تقرأ الموضوع بتاعي دة بس الحقيقة أنا كتبت الموضوع دة لأن ساعات حد بيكون بيدور علي معلومة و ممكن تكون معلومة بسيطة خااااالص بس حتفرق معاه كتير جدا في أداء سيارته و عشان كدة أنا نويت كل ما أعمل حاجة في العربية أكتبها لعل و عسي حد يستفيد من أي مشاركة
أبدأ بوصف عربيتي :- بيجو 405 موديل 96 لونها فيراني - كماليات : باور - سنتر - 2 زجاج كهرباء - تكييف

بداية المشوار :- اتعرفت بحد محترم كان عارض سيارته للبيع روحت قابلته في سوق مدينة نصر و خلصنا و احنا واقفين و رجعنا بالعربية

شهر و احد و بدأت المتاعب (( بطاااااارية ))) جبت واحدة Acd delco سعودى 70 أمبير و انتهت مشكلة البطارية باقلها حوالي 3 شهور ماشاء الله تمام

العربية بتدخن روحت للميكانيكي قالي نغير البوجيهات قلت توكل علي الله ما تاخدش رأيي غيرناها و مفيش فايدة قالي مشكلة في الكربراتير لأنه فيه بوابتين الثانية فيهم بتفتح بعد الغيار الرابع رحت خرطت بوابة تانية و انتهت قصة الدخان و جاري التجربة عشان نشوف موضوع استهلاك البنزين

عوامة البنزين محتاجة تتظبط لأن مؤشر البنزين بيدي قراءة وهمية و كمان مؤشر السرعة يعني بيرتعش شوية

مطلوب شحن التكييف- يا مسهل الحااااال يا رب

العربية مع التكييف مش بحس انها اتأثرت في السحب ماشاء الله علي العربية أول ما تفتح علي الطريق و الله بحس إنها مركبة جناحين و لا حد بيصد معاها

النهاردة لقيتها بتدور بصعوبة روحت للكهربائي قالي دور دورت قالي بس يا عم الحاج مفتاح مش عارف كام كدة يا بني و قالي أصلها ما كانتش متوصلة كويس السلكين بتوعها كانوا عايزين يتشد عليهم

توتة توتة ............ الحدوتة و نكمل القصة بحوارات أخري للبيجو 405 اللي و الله مع إني كنت مش باقبل رسمتها إلا إني و بعد تجربة أشتريها من جديد لو باشتري عربية من أول و جديد
السلام عليكم :first:

لو كل عضو عمل زى ما حضرتك عملت انه قابلته مشكلة فى عربيتى وحلها وكتب المشكلة وكيفية حلها لاصبح هذا المنتدى موسوعة لا يستهان بها وبالتوفيق

جزاك الله خيراً على نشر التجربة

السلام عليكم و رحمة الله و بركاته ، أورد المشاركة في هذا المنتدى الرائع و هذه الموضوع لعل الله ينفعنا و ينفع بنا آخرين .
أنا اشتريت بيجو 405 موديل 2003 من حوالي ثلاثة شهور و الحمد لله كويسة حتى الآن و لكن في يوم لمبة البطارية في التابلوه نورت نور خافت فلم أهتم قلت لعلها معلقة و كانت بتدور معايا و تمشي كويس ، و على فكرة استخدامي للسيارة بسيط جدا بالمقارنة بغيري ، و بعد يومين أو ثلاثة كنت أوصل الحاجة و عند بداية مطلع نفق الهرم بالجيزة ألاقي السيارة وقفت مكانها ، و لا تريد التحرك أو تدور حتى و كانت لمبة البطارية تضيئ بسيط عند بداية الدوارة ثم تنطفئ ، و بعد محاولات كثيرة زقتني سيارة أجرة لأركن على جنب لأمشي النفق بدل وقفتي و سط النفق ، ثم اتصلت بالكهربائي بتاعي و شرحت له الموقف بالضبط فقال لي هذه بطارية و يبدو أن الدينمو لا يشحن ففقدت البطارية شحنتها ، يلزم زقها أو توصيل بطارية شغالة بها لتحريكها ، وبالفعل اتصلت بصديق و حضر وفكينا بطاريته و وصلتها بسيارتي حتى أخرجها من النفق و ركنتها و كان يوم خميس قبل المغرب و في اليوم التالي أخذت الكهربائي صباحا ببطارية من عنده ووصلنا و دارت و الحمد لله حتى وصلنا الورشة ، و قال يلزم حل الدينامو لمعرفة سبب المشكلة إما أن تكون بسيطة مثل الشربون أو كبيسة كتغيير دينامو ، فدعوت الله و اشترينا شربون بخمسة جنيهات و ركبه و ركب الدينامو و جينا ندول .................
الحمد لله دارت السيارة و لكن لمبة البطارية الجافة لم تكن خضراء بعد أن وضع البطارية على الشاحن حتى يركب الشربون ،و قال أن بعد يوم أو يومين سوف تضيئ لمبة البطارية لما الدينامو يشحن البطارية كويس ،و الحمد لله السيارة من ساعتها شغالة كويس .
و على فكرة لو الصنايعي من أمين و لا فاهم ممكن يدخل الزبون في حوارات و يشتغل عليه أحلى شغل و يلبسه في الحائط و يخليه يشتري دينامو جديد أو استيراد بالشيئ الفلاني و يأخذ هو الدينامو القديم على أنه خربان ، و لكن الحمد لله ، و لذلك قلت أشارك بهذا الموضوع حتى تعم الفائدة و الله الموفق و يكفينا شر كل ذي شر آميييييييييييييين .
و السلام عليكم و رحمة الله و بركات .

العربيه دي كانت مع الوالد الله يرحمه مو ٩٢ حوالي ١٥ سنه و كان بيحبها جدا و ايده باستمرار فيها بس الصراحه انا الشهاده لله مكنتش بالعها و مكنتش بطيق سيرة البيجو اصلا بعد تجربه زباله مع ٢٠٥ خدت اللي ورايا و اللي قدامي لغاية مالفت الايام و رجعت للبيجو تاني
ربنا يديك خيرها و يكفيك شرها

يا ريت حضرتك توضح الأداء بتاع العربية معاك عامل ايه
يعنى الثبات على السرعات المختلفة عاملة ازاى
التسارع قوى و لا ضعيف
العربية عفشتها و قيادتها ناعمة و لا خشنة
حالة الموتور بعد السنين الطويلة دى ايه اخباره و اتعمر قبل كدة و لا لأ
الفارق بين التقفيل المصرى اللى معاك و الفرنساوى اللى قبل 95
أسعار قطع الغيار مقارنة بالكورى مثلا

وربنا يديك خيرها ويكفيك شرها

من 2 سنه اشتريت برستيج من معاق و كانت جامده جدا كانت اوبشن عالى جدا كانت محتاجه طقم شمبر عملته عند ميكانيكى بيجو شاطر اتكلفت حوالى 2000 جنيه لحد ما اتزنقت فى الفلوس بعتها وانا زعلان و اشتريت 127 و لما ربنا كرم الحمد لله دورت على بيجو تانى بس الفلوس كانت اقل شويه جبت 405 مصرى اباظه كربراتير 1600 تكييف وزجاج كهرباء بوب فيها واحده واحده اول مشكله ليها معايا كانت من يومين بعد حوالى 6 شهور من شرائها تبطيل و خنقه و مفيش سحب طلعت على ميكانيكى البيجو الاصلى علطول غير الموبينه و بقت زى الفل
و مره كمان كنت مسافر السرعه الاولى للمروحه قطعت بس التانيه شغاله روحت لكهربائى عادى فتى فيها فتى السنين وكان هيخرب الدنيا اعتذرت له انى لازم اروح للدكتور دلوقتى و ذهبت لكهربائى بيجو وانا بحكى له عالمشكله كانت ايده فالموتور على حساس مربوط فالكربراتير سلك واقع منه لحمه وبقت زى الفل وهذه تجربه 6 شهور