الموضوع: شكرا لكل من هاجمني و اهانني

متزعلش نفسك يا باشا و كلنا اخوات في المنتدي

المشاركة الأصلية كتبت بواسطة amr_8800

انا مقدر شغورك جدا يا فندم
وربنا يوفقك في حياتك ويزيدها استقرار
والله مفيش حد مرتاح ولو فاكر ان الفلوس بتريح تبقا غلطان كل ما الفلوس بتزيد المسؤوليات بتزيد و الضغوط بتزيد
وكويس انك معاك عربيه هتستفيد كتير من نايل موتورز في الموضوع ده
واهلا بيك مره ثانيه

متشكر لرد حضرتك جدا و علي فكره الموضوع مش فلوس خالص و بس هو تفريغ لأفكار كانت في بتبقي في دماغ الواحد في موقف معين و في في لحظات معينه و من افضل الطرق لما تبقي مضغظط نفسيا انك تكتب اللي حاسس بيه بياعد انه يعملك relief و يحسن حالتك
و بالنسبه لعضويتي في المنتدي انا يشرفني اني اتعامل مع واحد زي حضرتك

المشاركة الأصلية كتبت بواسطة fares_311

السلام عليكم
أنا قرأت موضوع (بلوج غريب حبيت اشاركه معاكم) ودخلت بعديها على المدونة وقرأت فيها وبصراحة اتعاطفت معاك جدا جدا ربنا يقويك على اللي شفته في حياتك ونفسي اليأس اللي عندك يروح علشان تعرف تعيش وتتقدم في حياتك وعلى العموم لو كانت الدنيا وحشة معاك فربك حيعوضك في الآخرة.يا ريت كنت أقدر اعمل حاجة اخفف عليك

ربنا يخيلك يا باشا و تعاطفك انا مقدره و علي راسي عامه انا ظروفي مكنتش نيله خالص و لو كنت حضرتك لاحظت كنت هتلاقي اني مقارنه بمن حولي ظروقي وحشه لكن طبعا في ناس ظروفها اسوء بكتير و الواحد بيحمد ربنا علي كل حال

المشاركة الأصلية كتبت بواسطة Mohamed.Ramah

انا قرأت موضوعك صدفة ومتفهم موقفك والمريت بية وصدقنى مش لوحدك فى كتير من الشباب فى مصر عايش بمستوى اقل وفى الاتحرم من حواسة و الاتولد مشلول وغيرة وانت اكيد شايف وعارف طب دول يعملو اية انا عاوز بس عاوز اقولك كلنا كشباب بتواجهنا نفس الصعاب انت اكيد قابلتها بدرى عننا امال تقول اية على الشباب خريج 2013 و 2014 فى الظروف الجميلة الحوالينا المقفولة من كل حتة والشغل المتاح الوحيد كول سنتر مفيش اكتنر منة وحتى شوف اسعار الشقق دلوقتى مين معاة اقل حاجة 200.000 دة غير الشروط الحصول على الشقة لذا فى كتير بقى بيرضى بالقانون الجديد

ياريت تحاول تصلى وتدعى لربنا وتقول يارب هل انت فكرت فى ربنا خلال السنين الفاتت ووقت كتابتك للمدونات هل حاولت تتقرب اكتر لربنا بقراة القرأن ولا كنت مخنوق وملكش نفس تقرأ وبتصوم علشان دة رمضان وبس وبتصلى علشان تخلص مش بتصلى بخشوع وتتقرب الى الله انا بقولك كدة مش حعمل فيها بنصح لاء انا بسالك عادى لانى الياس والضعف والخوف بيصيبو الانسان البيدور على الدنيا مش بيعمل لاخرتة كان اخرتة هى دنيتة

من نسي الله تعالى انساه نفسه في الدنيا ونسيه في العذاب يوم القيامة قال تعالى ) ومن أعرض عن ذكري فإن له معيشة ضنكا ونحشره يوم القيامة أعمى قال رب لم حشرتني أعمى وقد كنت بصيرا قال كذلك أتتك آياتنا فنسيتها وكذلك اليوم تنسى ( أي تنسى في العذاب كما نسيت اياتي فلم تذكرها ولم تعمل بها واعراضه عن ذكره يتناول اعراضه عن الذكر الذي انزله وهو ان يذكر الذي انزله في كتابه وهو المراد بتناول اعراضه عن ان يذكر ربه بكتابه واسمائه وصفاته واوامره والائه ونعمه فان هذه كلها توابع اعراضه

خد بالك انا سمعت خطبة ان البلاء بينزل على الانسان وبيقول لية انا بالذات وبيستغرب وبيشتكى الحوالية من اهل او اقارب او اصحاب بس صدقنى المفروض الانسان يلوم نفسة لان اى ابتلاء من عند الله اختبار والابتلاء بينزل على الانسان لوحدة فى حالة البيعملة فى السر ولو البيعملة دة فى العلن والحوالية شايفين وعارفين بس بيطنشو بيصيبهم معاة نفس الابتلاء - ومتنساش لا يغير الله بقوم حتى يغيروا ما بأنفسهم

انا بقولك نصيحة حاول انت جربت وتعبت فى كل حاجة حواليك وكانت الدنيا مليانة هم ومشاكل وصعاب حاول فى الموضوع دة وادعى ربنا يرزقك بالزوجة الصالحة والاطفال الصالحين وصدقنى حتى الزواج رزق من عند الله فكلة بميعاد ربنا يعافيك ويكشف عنك الهم والكرب بأذن الله

شكرا علي ردك لكن انا علاقتي بربنا اقوي بكتير من اللي حضرتك بتقوله و افتراض الناس ان السبب ان الواحد اللي ظروفه وحشه و مستمره وحشه ده سببه ان علاقته بربنا مش قويه و لا مش بيدعي و لا بعيد عن ربنا ده محض خيال حضرتك انا شفت ناس الواحد نفسه يعمل ربع اللي بتعمله من عبادات و حالها زفت و مش بيتصلح و شوفت ناس غرقانه في المعاصي و حالها فل الفل و بيعلوا زياده و الدنيا فاتحه ليهم دراعتها
ده الواقع حضرتك الرزق ربنا كاتبه حتي للكافر و الملحد و البوذي و ربنا مخلاش ظروفهم وحشه علشان كفار

المشاركة الأصلية كتبت بواسطة theislamic

ربنا يعينك و يهديك و يوفقك لما يحب و يرضى و تذكر حديث النبي صلى الله عليه و سلم:


يقول - صلى الله عليه وسلم - في الحديث الذي يرويه عنه أنس بن مالك - رضي الله عنه - : (إِنَّ عِظَمَ الْجَزَاءِ مَعَ عِظَمِ الْبَلاءِ، وإِنَّ اللَّهَ عَزَّ وَجَلَّ إِذَا أَحَبَّ قَوْمًا ابْتَلاهُمْ، فمَنْ رَضِيَ فَلَهُ الرِّضَا، وَمَنْ سَخِطَ فَلَهُ السَّخَطُ) رواه الترمذي وحسنه.

ربنا يعفوا عنا جميعا و يرزقنا

المشاركة الأصلية كتبت بواسطة amoor89

ساعات كتير لما كان يبقى عندى مشكلة كنت بدخل فى حالة اكتئاب واقول برده اشمعنا انا ما غيرى كويس والدنيا معاه زى الفل لكن لما كنت برجع لربنا كنت بحس انى راضى بقضاء الله
صلح علاقتك بربنا وانت هتلاقيه بيفرجها عليك من حيث لا تعلم

علاقتي بربنا مش وحشه خالص و يارب تفضل كده و تتحسن كمان و كمان و ردي علي تفسيرك للظروف اللي فيها موجود فوق

المشاركة الأصلية كتبت بواسطة KemozTanta

انا قريت البلوج وعجبني كلامك بس ايه الاحباط المزمن اللي انت معيش نفسك فيه !
الحقيقة انت معذب نفسك بأيديك وواضح انك شخص انطوائي وغير اجتماعي ومش عارف انت عامل مناحة ليه ع الجواز
هو الجواز دا اخر الدنيا عشان تحطة معيار وتقيم نفسك بيه وتفكر فيه ليل نهار ! هو يعني 10 رفضوك يبقي انت متستاهلش تعيش في الحياة خلاص
الجواز نصيب واهتم بشكلك ومظهرك وفكر في حياتك .. هتقابل بنت الحلال اللي هتلاقيها في وشك وتتجوز وتخلف
انت بالمنظر دا هيعدي عليك مش ال 32 ولا ال 33 لا ال 40 وال 41 و 43 كمان وانت لسه بتندب حظك.. الحق نفسك انت لسه في الثلاثينات ودا سن مش كبير ولا نيلة واقسم بالله اانا بشوف شباب ثلاثينات افتكرهم حاجة وعشرين ! رغم انهم شايفين الغلب بس بيعرفوا يرموا ورا ضهرهم ويضحكوا مش منكدين علي نفسهم وقافلين بابهم عليهم وعايز كل شىء في الحياة يتحقق
اخرج من الدائرة اللي انت فيها دي احسن ماتموت قبل الحاج والحاجة من الحسرة والقهر !

احباط نتيجه الظروف و الناس حواليك بتساهم فيه لما واحد يقعد يغتت عليك و يقولك انت ايه يا بني مش بتشتغل ليه و لا مش بتتجوز و لا مش عارف ايه
موضوع الجواز ده شئ طبيعي انك تفكر فيه ليه محسسني اني خارج تفكيرالعقل البشري و فوق الثلاثين مش صغير و احسبها لما عندك 34 و متجوزتش ابنك هيبقي عنده كام و انت عندك 50 سنه
و انا مش منكد علي نفسي بسببه و لا حاجه لكن هو خطوه طبيعيه
موضوع اني انطوائي ده مش صحيح انا كان عندي صحاب كتير بس كله اختفي مع زحمه الحياه و المشاغل و اللي اتجوز و اللي سافر و اللي قطع مع نفسه و اتلهي في حاله المشكله بقي ان مدخلش حد مكان اللي اختفوا فبالتالي مع الوقت مبقاش عندك حد تقدر تعتبره صديق حقيقي تقابله بأستمرار لكن اخرنا نتقابل كل ما ينزلوا اجازه مره و لا مرتين
لكن بقيت وقتي مفيش حد اخرج معاه الا زمايل الشغل و دول انت عايش معاهم اصلا في الشغل و لما بتخرج معاهم مش بتحس باي نوع من التغيير

المشاركة الأصلية كتبت بواسطة eslamavitch

انا قريت البلوج بتاعك ومتضامن معاك وكل يوم بفتح اشوف نزلت حاجه جديدة ولا لسة كدة وصدقنى فى شباب كتير زيك كدة انت بس صلى وادعلى ربنا يرزقك ببنت الحلال اللى تسعدك وتعوضك عن سنوات الضايع اللى فاتت وحبقى اطمن عليك من المدونة :)

ايه ده هو في حد بيقرا الكلام اللي انا بكتبه غريبه جدا انا اه بشوف traffic بس محدش بكتب تعليق واحد عن اي حاجه عامه المشكله انا بكتب اللي جوايا من غير تزويق و اعتقد انه جوه ناس كتير بس الناس بتخاف لم تكشفهم و تعري اللي جواهم في ناس عايزه تقنعيني انه لما بيشوف حد احسن منه و هو حاسس انه ميستاهلش او حتي يستاهل بيبقي ولا هامه و فرحان و سعيد و مبيقلش اشمعني هوه و في ناس عايزه نعتقد ان الرضا ده موجود عن كل الناس مهما حصل لهم و اللي في رأيي مش صحيح
لو احنا ناس فل الفل كده و محدش فينا بشيل جواه مكنتش لقيت مقالب و زنبقه في الشغل من زمايلك و ملقتش حد يقف في سكه خير جاي ليك لمجرد انه ميجيش و ملقتش حد يلسن عليك علشان انت احسن منه
عموما لو عايزني اكتب عن اي حاجه او عندك اي اسئله انا مستعد اجاوب

المشاركة الأصلية كتبت بواسطة باسم يوسف

متزعلش نفسك يا باشا و كلنا اخوات في المنتدي

متشكر جدا يا استاذ باسم كفايه كلمتينك الحلوين دول يخلوا اي زعل يروح
QUOTE=qkash.com;3875800628]طيب مانت زي الفل اهو وعندك شقة وعربية...! احمد ربنا في ناس ظروفهم اسوء بكتير "وتفائل وربنا اكيد هيعوضك عن صبرك كل السنين دي"

ربنا يزيدك ويوفقك ويرزقك من حيث لا تحتسب

ومتزعلش اذا كان انطباعي وردي في الموضوع الخاص بمدونتك معجبكش[/QUOTE]
مش عارف ليه حاسس انك قريت المدونه من ديلها
لو قريت من الاول كنت هتعرف اني قعدت في بيتنا 3 سنين و مكنش حيلتي حاجه
و بدل ما اقعد جنبها 5 سنين و افضل فاشل زي ما انت ذكرت اشتغلت و علمت فلوس جبت بيها الشقه و العربيه
علي اواخر السنه اللي فاتت يعني بعد 9 سنين تخرج
و الحمد الله طبعا علي اللي وصلتله
بس من الواضح كده ان حضرتك مش عايز تقول انك غلطان
يا اما تقول فاشل يا اما تقول ما انت زي الفل بتشتكي ليه
عموما انت طبعا حر في رأيك يا باشا
بس انت مش شايف ان كلمه معجبكش ده كلمه عايمه يعني مش عايز تقول كان رأي غلط او كان انطباع غير صحيح يعني عايز تطلع الغلط فيا انا كلامك ضايقني
عموما انا مش زعلان منك لأنك متعرفنيش فبتالي حكمك عليا جاي من شويه كلام ممكن تفهمهم بطريقه غير اللي انا اقصده
و شكرا علي ردك

بمشهندس انا قريت لك كام بوست من مواضيعك وفعلا حاسس بيك جدا جدا وعلي فكرة اغلب شباب هذا الجيل يمروا بنفس ظروفك بل اسوء منها
ولكن حضرتك وجدت وسيلة للتعبير عن نفسك غيرك ليس لديه الشجاعة في مواجهة ذلك او التحدث او التطرق عن ماتكتبه
احييك ومتابع لك بشدة واصل يافنان

كنت عايز الفت نظرك يابشمهندس اغلب البوستات بتاعتك شبه بعض
يعني ممكن العنوان مختلف
ولكن السرد بينصب في مضمون واحد وتتلخص في
العمر الضائع - الامكانيات الضعيفة - الحظ السيء - مقارنتك باصدقاءك والمقربين ومافي سنك - الارتباط
اعلم ان الشخص واحد وانت تتحدث عن نفسك وماتشعر به ولكن ملاحظتي عدم تنوع المواضيع او الاسلوب في كل بوست يعني ممكن تدمج كل المواضيع في موضوع واحد هو ده قصدي
نريد اختلافات

المشاركة الأصلية كتبت بواسطة kemoztanta

انا قريت البلوج وعجبني كلامك بس ايه الاحباط المزمن اللي انت معيش نفسك فيه !
الحقيقة انت معذب نفسك بأيديك وواضح انك شخص انطوائي وغير اجتماعي ومش عارف انت عامل مناحة ليه ع الجواز
هو الجواز دا اخر الدنيا عشان تحطة معيار وتقيم نفسك بيه وتفكر فيه ليل نهار ! هو يعني 10 رفضوك يبقي انت متستاهلش تعيش في الحياة خلاص
الجواز نصيب واهتم بشكلك ومظهرك وفكر في حياتك .. هتقابل بنت الحلال اللي هتلاقيها في وشك وتتجوز وتخلف
انت بالمنظر دا هيعدي عليك مش ال 32 ولا ال 33 لا ال 40 وال 41 و 43 كمان وانت لسه بتندب حظك.. الحق نفسك انت لسه في الثلاثينات ودا سن مش كبير ولا نيلة واقسم بالله اانا بشوف شباب ثلاثينات افتكرهم حاجة وعشرين ! رغم انهم شايفين الغلب بس بيعرفوا يرموا ورا ضهرهم ويضحكوا مش منكدين علي نفسهم وقافلين بابهم عليهم وعايز كل شىء في الحياة يتحقق
اخرج من الدائرة اللي انت فيها دي احسن ماتموت قبل الحاج والحاجة من الحسرة والقهر !

انتا جبت من الاخر

يا أستاذ أفا.... مش عارف ليه حاسس انك عامل الموضوع ده مخصوص عشان تجيب زباين لمدونتك المهجورة

المشاركة الأصلية كتبت بواسطة yuong313

بمشهندس انا قريت لك كام بوست من مواضيعك وفعلا حاسس بيك جدا جدا وعلي فكرة اغلب شباب هذا الجيل يمروا بنفس ظروفك بل اسوء منها
ولكن حضرتك وجدت وسيلة للتعبير عن نفسك غيرك ليس لديه الشجاعة في مواجهة ذلك او التحدث او التطرق عن ماتكتبه
احييك ومتابع لك بشدة واصل يافنان

متشكر يا باشا و هي و لا شجاعه و لا حاجه بس هي طان نوع من اخراج اللي الواحد حاسس بيه علشان يريح نفسه شويه لأن زي ما قولت الكتابه بتريح نفسيا عن ما تكتم جواك

المشاركة الأصلية كتبت بواسطة yuong313

كنت عايز الفت نظرك يابشمهندس اغلب البوستات بتاعتك شبه بعض
يعني ممكن العنوان مختلف
ولكن السرد بينصب في مضمون واحد وتتلخص في
العمر الضائع - الامكانيات الضعيفة - الحظ السيء - مقارنتك باصدقاءك والمقربين ومافي سنك - الارتباط
اعلم ان الشخص واحد وانت تتحدث عن نفسك وماتشعر به ولكن ملاحظتي عدم تنوع المواضيع او الاسلوب في كل بوست يعني ممكن تدمج كل المواضيع في موضوع واحد هو ده قصدي
نريد اختلافات

باشا تنوع المواضيع ده بيجي لما تكون بتقرا لكاتب او روائي مش واحد علي قده بيطلع كلمتين جواه كاتمين علي نفسه
ممكن برضه quarter life crisis يبقي ليها سبب في كده
بس المواضيع مكتوبه علي 5 سنين و بتلاقي ان في خلالهم محصلش اي جديد فبالتالي يبقي الحال كما هو عليه من غير وجود ما يمكن اضافته
لو حضرتك شايف ان اسلوبي كويس و في حد ممكن يحب يقراه انا ممكن اكتب في اي مواضيع بس حضرتك رشح اي موضوع و انا اكتب عنه علي طول
و شكرا لرد حضرتك

المشاركة الأصلية كتبت بواسطة محمد يوسف

يا أستاذ أفا.... مش عارف ليه حاسس انك عامل الموضوع ده مخصوص عشان تجيب زباين لمدونتك المهجورة

و الله يا باشا الزباين هما اللي جم لوحدهم و انا دخلت اشوف جم منين لقيت نفسي متهزق
ثانيا يعني حتي لو عايز اجيب زباين المدونه المهجوره اللي مليانه عناكب هتخليهم ميجوش تاني علشان المحتوي مش ممتع و مش علي مزاجهم