هل قطع الغيار متوفره في التوكيل ولا هتعب فيها و في الصيانه؟
ارجو الافاده. و شكرا
هل قطع الغيار متوفره في التوكيل ولا هتعب فيها و في الصيانه؟
ارجو الافاده. و شكرا
العربيه دي جميله و بتجري كويس جدا و مع واحد صاحبي و مفيش مشكله من صيانتها خالص و كان قال لي ان قطع غيار عربيه تانيه مش فاكرها حاليا هيا هيا
على حد علمى ان التوكيل بطل ينزلها عشان عدم الطلب عليها (قال يعنى كان بيعملها دعاية) بس هيه عربية جميلة انا شخصيا كنت عايز السيدان ايام مكانت 112 الف لكن ما حصلت نصيب .
والله الموفق
بس انا لسه شتيفها من يومين عند الطارق في مول العرب و كانت ب 185 الف
تقصد الاس كروس مش sx4 التقليدية اللى كانت بتنزل من كام سنة .... الاس كروس SX4 الجديدة نفس فئة السبورتاج والقشقاى وهى عربية ممتازة ومتقفلة في المجر مش في الهند زي باقي عائلة السوزوكي ...
شكرا لردودكم الله يخليكو بس عايز اعرف هل التوكيل كويس و قطع غيارها متةفرة ولا لأ؟
توكل على الله ومش هتندم ان شاء الله
التوكيل بقى احسن من زمان بكتير .. انا معايا sx4 من ٢٠٠٩ والحمدلله مفيش مشكله من قطع الغيار
هي مش متوفره في كل حته زي العربيات المنتشره زي التويوتا والهيونداي بس ان شاء الله انت مش محتاجها اصلا
يعني زيت وفلتر وبوجيهات وتيل فرامل .. صيانه دوريه فقط
حتى الكاتينه جنزير
والعربيه صياناتها ارخص من صيانات الكيا ريو اللي مع اخويا .. عشان الناس اللي بتقول الكوري صيانته ارخص
والعربيه الsx4 s-cross الجديده شفتها امبارح في التوكيل وماشاء الله تقفيلها محترم جدا وخامات محترمه
وانا في رأيي بعد التجربه .. اس كروس احسن من السبورتاج والix-35 .. الا في حاله واحده لو ناوي تركبها سنه ولا اتنين وتبيع
بالتوفيق
هى عربية ممتازة مفيش كلام لكن توكيلها مودرن موتورز أسوء توكيل فى مصر بلا منازع
اقتباس:
المشاركة الأصلية كتبت بواسطة saint2011
صدقني مش أسوأ توكيل في مصر ولا حاجة
بالنسبة لي أحسن من عز العرب وغبور ومنصور بدون مبالغة في كل حاجة
وزيه زي الباقيين من ناحية الضمان ... كله بيعمل من بنها لما يكون في مشكلة كبيرة ... والحمد لله عربيات سوزوكي نادرا ما تلاقي فيها مشكلة كبيرة أصلا
بل بالعكس بحس إن مودرن موتورز بيتعامل بكفاءة وحرفية أكثر شوية من كيا ورينو في الناحية الفنية في صيانة السيارة ...
لكن التسويق والشهرة وانتشار مراكز الصيانة ليهم عامل كبير للأسف مودرن موتورز مش مركز عليه كويس ... بس ابتدى أه يعمل مراكز صيانة تانية ويعمل شوية إعلانات كويسة
قطع الغيار بتاعة الـ s-cross ... لما سألت عليها قلولي إن فيه شحنة كاملة ليها وصلت ولسة ليها كذا شحنة هاتوصل .. ده من كلام التوكيل
يا جماعة انا جبت ال sx4 موديل 2015 ب 185 الف و بكرة رايح اعمل صيانة ال 1000 كم و بصراحة بكلام الناس خايف و حاسس كانى ورطت نفسى مع التوكيل ده فياريت الناس تطمنى و تقولى لو فى بدائل و اسعار قطع الغيار و توافرها عامل ازاى
الف مبروك عالعربيه وربنا يديك خيرها ويكفيك شرهااقتباس:
المشاركة الأصلية كتبت بواسطة manny3000
حضرتك هتعمل صيانة عربيتك في فرع ايه ؟
انا بتعامل معاهم من ٢٠٠٩ وهما محترمين ماتقلقش .. جربت فرع ابو رواش والهايكستب .. ابو رواش هو الفرع الرئيسي اكبر واكثر احترافيه .. عموما روح للاقربلك في الصيانات العادية .. الا لو لا قدر الله عندك اي مشكله الافضل تروح ابو رواش
وصيانة ال١٠٠٠ مافيهاش غير زيت وفلتر يعني حوالي ٤٠٠ جنيه .. وطبعا استخدم زيت تخليقي كل ١٠ الاف كم واختم كتيب الضمان
وان شاء الله كل الصيانات الجاية مافيهاش غير الحاجات الروتينية .. زيت ماتور وفلتر وتنظيف فلتر الهوا وتربيط العفشه .. وممكن كل ٢٠ الف بوجيهات ( الا لو الsx4 الجديدة راكب فيها بوجيهات بلاتينيوم هتغيرها تقريبا كل ٨٠ الف كم )
وتيل الفرامل حسب استخدامك من ٢٠-٤٠ الف كم
وفلتر الهوا ومياه الردياتير كل ٤٠ الف كم
سير الكاتينه جنزير مش بيتغير والباور كهربا مالوش زيت ولا سير
سير الدينامو والتكييف وزيت الفتيس بعد ١٠٠ الف كم بأمر الله
يعني لا تقلق واختيارك موفق ان شاء الله
اي مساعده انا في الخدمة
ياريت حضرتك تقولنا انطباعك عن العربية بعد اول ١٠٠٠كم وعقبال صيانة ال١٠٠ ان شاء الله
بشكر حضرتك جدا يت استاذ احمد مجدى و انا رحت فرع ابو رواش و غيرت الزيت 10000 و الفلتر و على كلمهم كشفوا على كل حاجة لانى حتى من وراء الزجاج مكنتش شايف عربيتى علشان دخلوها بعيد و انا قعدت ساعة و نص هناك و دفعت فعلا 400 جنيه و كنت عايز تعرف من حضرتك كل صيانة لحد 100000 كم المفروض هيتغير ايه و تكلفتها لانهم هناك لاسف لما سالته قالى معندهمش برنت بيها بس ممكن اسالهم بالتليفون قبل ما اروح كل صيانة و اعرف فياريت حضرتك تفيدنى بمعلوماتك خصوصا انا عملت جروب للسيارة على الفيسبوك باسم suzuki sx4 owners و ناس كتير يهمها تعرف الموضوع ده و يشرفنى انضمامك لينا فى الجروب و كل اللى مهتم بالسيارة / و بالذات لو مفيهاش مضايقة لحضرتك لو كتالوج عربى لان اللى استلمته انجليزى بس و مفيهوش اى معلومة عن مواعيد و تحديد ايه اللى هيتغير فى كل صيانة و التوكيل قاللى انه المفروض بيجى معاها و بالعربى و انا مهتم شخصيا بمعلومات حضرتك و كان ليا سؤال هل يفضل اغسل الموتور كل قد ايه علشان فى التوكيل قالى مش وسخ و خليه غسيله فى صيانة ال 10000 و شكرا جدا لوقت حضرتك و تحياتى و تقديرى لذوق حضرتك
مهندس/ عبدالرحمن جمال
انطباعى يا استاذ هيثم ان فرع ابو رواش مش وحش و مهندس محمود شوقى مهندس الاستقبال متعاون بس تحس ان نظام التوكيل فى المعلومات مش قوى يعنى مش زى بقية التوكيلات بيسلمك بورشور بالصيانات لحد 100000 و معلومات عن تغيير قطع الغيار فى كل صيانة و تكلفتها عكس توكيل كيا و عز العرب اللى انا ليا معاهم تجارب سابقة لكن مت انطباعات العملاء اللى اتكلمت معاهم ان الماروتى هى اللى ليها نصيب الاسد فى الشكاوى و محدش اشتكى من sx4 موديل 2015 بالعكس كلنا مقتنعين بيها مع اسيائنا من ان التوكيل شايل منها البلوتوث و الكاميرا الخلفية و فتحة السقف يعنى على الاقل ب 185000 يبقى فيها بلوتوث و انا و 3 من مقتنى sx4 هنحاول نجيب الكاسيت من توكيلها من الامارات الاصلى اللى فيه البلوتوث و الجى بى اس و الكاميرا الخلفية بس بعد رمضان لانى مش رايح دبى قبل شهر اغسطس و سالت التوكيل قالى مادام الاصلى هو نفس الحجم و بيركب مكانه عادى على نفس الوصلات و العربية ممتازة ما شاء الله و انا ركبتلها دفندر خلفى و انا لسة بحاول اجمع معلومات عن اسعار قطع الغيار و ده رقم ا. محمود المسئول عن قطع الغيار فى التوكيل تقدر تستفسر عن اسعار اللى انت عايزها 01119778043 و ده رقم مهندس استقبال.محمود شوقى 01116777856 تقدر تكلمه لحجز صيانة او استفسار عن اى صيانة قبل ما تروح
معلش سؤال يا استاذ احمد مجدى تنصحنى بعد كده اغير برده بالزيت بتاعهم و لا اجيب معايا و انا رايح بعد كده زيت معين
اقتباس:
المشاركة الأصلية كتبت بواسطة manny3000
العفو يابشمهندس تؤمراقتباس:
المشاركة الأصلية كتبت بواسطة manny3000
الحقيقه انا مش متاكد بالظبط هل الصيانات هتبقى زي الموديل بتاعي تماما ولا فيه تغيير .. ولكن اعتقد بنسبة كبيرة هتبقى زيها
صيانة ال10000 هتبقى زيت محرك وفلتر وتربيط عفشه وتنظيف فلتر هوا وتشيك عالفرامل والسوائل .. تقريبا زيت ب300 وفلتر 70 ومصنعية 150 يعني حوالي 550
صيانة ال20000 نفس الكلام + احتمال تيل فرامل حسب استخدامك + احتمال بوجيهات لو نيكل عادية مش بلاتينيوم .. يبقى 550 برضو +/- التيل عندي في حدود 700 +/- البوجيهات في حدود 200
صيانة ال30000 زي ال10000
صيانة ال40000 زي ال20000 + تغيير فلتر الهوا في حدود 200-250 + احتمال تغيير مياه الردياتير حوالي 100 جنيه ... اما المصنعية اعتقد ممكن تكون اكتر من 150 يعني مثلا 200 او 250
صيانة ال50000 زي ال10 وال30
صيانة ال60000 زي ال20000 .. والصيانه دي بالذات فرق شاسع جدا بين اللي حضرتك هتدفعه ان شاء الله وبين عربيات تانيه كتير في نفس الفئة وفئات اقل كمان ... نظرا لانك الكاتينه جنزير مش هتتغير وبقيت السيور معمرة مش بتتغير قبل 100000 وكذلك زيت الفتيس يعني موفر كذا الف جنيه .. وربنا يبارك
صيانة ال70000 زي ال50
صيانة ال80000 زي ال40
صيانة ال90000 زي ال70
صيانة ال100000 زي ال80 + احتمال تغيير سير الدينامو والتكييف وزيت الفتيس .. والمصنعية حوالي 250 - 350 جنيه
طبعا حضرتك ملاحظ ان اسعار المصنعيات مقارنة بتوكيلات كتير اقل منهم تتراوح بين 150-250 جنيه
ارجو اكون مانسيتش حاجه او اتلخبطت في حاجه
بالنسبة لزيت المحرك .. الكتالوج عندك بينصح بلزوجة 5w20 ودي لاوروبا ... و 5w30 لمصر
الزيت المستخدم في التوكيل حاليا اعتقد توتال 5w40
هو كويس ولكن اعتقد لو استخدمت 5w30 هيكون افضل في الاداء واستهلاك البنزين نظرا لان المحرك لسه جديد وخلوصاته ضيقة
والتوكيل عموما مش بيغلسو وممكن تجيب الزيت معاك وبيكتبو الزيت طرف العميل
الزيوت اللي في مصر بدرجة لزوجه 5w30 حسب معلوماتي هي :
mobil 1 esp formula
motul
wolver
wolf
bizol
انا ماجربتش فيهم غير mobil 1 وكان كويس ولكن اعتقد motul كمان هيبقى اختيار كويس
وبلاش wolf عشان API SL مش SN
ارجو اكون افدتك
أرجو قبولي كعضو في جروب ال facebook
اشكرك جدا يا استاذ احمد مجدى و ربنا يكرمنا فى عربياتنا علشان فعلا موضوع التوكيلات ده بقى ازمة فى كل بيت مصرى و هحاول اتاكد من موضوع البوجيهات بتاعة موديل 2015 و يشرفنى دائما تبادل المعلومات مع حضرتك
تم قبول حضرتك يا استاذ هيثم و اهلا بيك فى اسرتنا لمالكى سيارة sx4 على الفيسبوك suzuki sx4 owners
شكرًا علي الإضافة و اتمني أكون من الملاك قريب ان شاء الله... بس كان لي استفسار بخصوص التوكيل وقطع الغيار الغير اصلية او المقلدة ...الموضوع به انتهي علي ايه...و ازاي أكون مالك واثق ف الوكيل بعد كده
انت من حقك الاطلاع على اى قطعة بتشتريها من حيث بلد المنشا و ماترضاش غير بالاصلى اليابانى و اكيد استاذ احمد مجدى يفدنا فى الموضوع ده
اقتباس:
المشاركة الأصلية كتبت بواسطة Dr_Smart
السلام عليكم و رحمة الله و بركاتة
بسأل حضرتك على Suzuki SX4 S-Croos
عامله مع حضرتك و تنصحنى بيها و ايه المشاكل الى ظهرت حتى الان
و لو فيه جروب على الفيس بوك ممكن تديني اللينك بتاعه
شكرا
انطباعكم عن فتيس هذه العربية لو مانيوال؟