الموضوع: ميتسوبيشي أتراج Test drive - هشتريها؟ مش هشتريها!

السلام عليكم ورحمة الله وبركاته

اللى مش غاوي يقرا تفاصيل ينتقل لخلاصة الموضوع فى نهايته.. اللى غاوي يقرا ويدقق يتفضل معايا:

الايام دي انا محتار شويه فى نوع عربيتي القادمة ، معايا اسبرانزا 516 مخليانى مش راضى عن معظم السيارات اللى فى الفئة الاعلى منها، كل ماركب عربية مستعمله فى حود 50 الى 70 ألف تطلع عربيتي اللى تمنها 45 الف احلى منها!
وعشان كده فكرت أجمد قلبى وأكبر الخطوة شوية وربنا يعين، قررت افكر فى الشارك 2008 او السيراتو كوبيه 2011 .. وبدأت بقى أدور واقارن وأبحث كعادتى قبل اي عربية...
لكنى شوفت الأتراج!.. ياباني وبـ 112 ألف وهقسط تمنها!.. يعني ممكن ادفع تمن الاسبرانزا مقدم واقسط الباقي واركب ياباني!..
فى الشارع بالصدفه .. لقيت واحد بيركن اتراج قدامي!..

سلام عليكم ممكن اسألك عن أداء العربية لأنى بفكر اشتريها؟
-- العربية دي Test Drive تعالى جربها عندنا فى المعرض لو تحب!
Test Drive فى طنطا؟ ده شيئ كويس والله؟ فين؟
-- عند خيال
حبيبي.. كل اللى هناك اصحاب ومعارف.. هجيلكم.

وفعلا روحت اتفرجت عليها ، العربية شكلها كويس جدا من قدام ومقبول من ورا والاجناب حلوة.
العربية شنطتها واسعه بشكل كبير رغم ان شكلها من بره صغير! شنطها قد شنطة الاسبرانزا بدون مبالغه.. يعني حوت!
الصالون واسع فعلا!.. انا 190سم وحاليا راكب عربية اوسع من ملعب الكوره!.. ومع ذلك حسيت الاتراج واسعه فعلا.. واسعة لدرجة انى قاعد مبسوط على الكرسي ولفيت قعدت على الكنبه ورا برضه مرحرح خالص!.. مش باين عليها من بره تحسها قد الفيرنا!... اليابانيين دول عليهم حاجات!! فنانين.
التابلوه!!.. أيه ده؟.. هو ده تابلوها؟ هى اخرها كده يعني؟ ولا فيه فئة أعلى؟
-- لا هو كده!
هو ده الكاسيت؟.. وايه الحته الفاضية اللى تحت الكاسيت دي؟
-- بنبرة تريقة ( عشان تحط فيها السجاير )
انا أصلا مابدخنش!.. التابلوه ده تسعيناتي!!.. مش مهم، التابلوه أصلا حرام.. ورجعت لابتسامتي تاني.
طيب نتوكل على الله ، ركب جنبي واحد صاحبي وورا واحد من المعرض يعني 3 .. دورت.. ماشاء الله صوت ناعم، او تقدر تقول مفيش صوت اصلا.
استنى هفتح الإزاز .. ايه ده؟ هو زرار الازاز مش بينور؟ مش مهم.. هحسس لحد مالاقيه.
يللا هوبا نمسك الفتيس وندي D .. ايه ده؟ هى حتى غيارات الفتيس مش بتنور؟ فين الدي طيب؟ انا لسه مش حافظ الفتيس ومنحنياته!.. أيد ياعم نور الصالون.. اه الـ D أهو.. بسم الله
ما شاء الله.. نعومة الياباني.. سلاسة الفتيس وانا بجيب R و D تانى وانا بلف بالعربية.. يللا نطلع على طريق مفتوح بس ناكل مطبين كده.. اه الله ناعمه اهى فى المطبات.. نسحب بقى.. ماشاء الله سحبها زي عربيتي الـ 1600 بالظبط. نفس المكان ده انا بمشي فيه كل يوم وبجيب الـ 80 وانا هنا بالظبط.. كويس جدا السحب.. 100 تمام 120 تمام 130.. الثبات تمام والسحب تمام والموتور هادى.. اللي يشوقها وهى طريه فى المطبات وانا طالع مايتوقعش منها الثبات الجيد ده.. جميله جميله.
نسيت الشل السيئ للتبلوه.. نسيت فقر الصالون والاضاءات.. ركزت بس على السحب والثبات والنعومة وسحب البنزين القليل جدا.
انا خلاص.. هشتريها.. بلا استعمال بلا بتاع. العربية دي هتكسر الدنيا ومصر كلها هتركبها.
رجعت المعرض.. صاحبي ماسك شغل المعرض هناك شافنى سلم عليا وقعد معايا.. ايه هتشتري؟
قولتله ايوه انا جربت الاتراج وممتازه!.. وشه غير قوي! .. قالى انت بتسافر كتير متأكد انها هتنفعك؟
ايوه ياعم .. هى 1200 بس سحبها ممتاز جدا..
قالى ياراجل؟ هو انت مابتشغلش التكييف ولا ايه؟
أوباا! انا نسيت اجرب السحب مع التكييف!
قالى طيب يللا جرب تاني بالتكييف، يللا قوم!
اخدت المفتاح تاني.. ركبت وجنبي صاحبي ومعانا صاحبى التاني بتاع المعرض.. شغل التكييف.. قيد نور الصالون عشان اشوف الـ D .. معلشي اصلي مش حافظها، وبحب اشوف واتأكد.
اطلعي يلا... ماتطلعي.. الله؟.. اطلعي!.. انتى مش بتجري ليه؟.. الله فين السحب؟.. هو انت اخرك 60؟؟ ايه صوت الموتور ده؟؟؟ هو " بيجعر " كده ليه؟...
قالى دوس بنزين.. قولتله افاجئك؟ الدواسة على اخرها!! انا رجلى على الصاج!! مفيش سحب!! الموتور صوته اعلى من صوت عربيتي موديل 2007 !!! هى العربية اتحولت؟
رجعنا.. وفهمت هو قالى ليه بلاش انا!
العربية ممتازة جدا داخل المدينة.. كمان ممتازه جدا ى السفر بدون تكييف.
مع التكييف ومعاك شخصين متوسطي الحجم انسى!! مش هتنجزك خالص! هتفحت الموتور لو عاوز تقرص شويه!.. مش سكتي، ماعطلكش!

خلاصة القصة الطويلة دي ايه؟
الأتراج تجربتى معاها اثبتت انها خيار جيد جدا لو لسيدة، او واحد كبير فى السن بيمشي تاتا تاتا.. او شاب عادى بيمشي زي اي حد بس طافى التتكييف مابيحبوش. كده هتشتري عربية موفرة جدا جدا وفى نفس الوقت شيك وياباني وهتعيش معاك. احسن من اى منافس فى الحتة دي.

أما لو انت من هواة التكييف زي حالاتى.. بلاش اتراج، مش بتاعتك خالص.
ولو عاوزها للسفر الطويل مع العيلة فالوسع والشنطة الواسعة وانها ممكن تكون عائلية منظر فقط.. ماينفعش خالص تكون عائلية لان لو مليت المساحات دي كلها ركاب وشنط العربية مش هتقدر تسحب وهتضايقك جدا. وهتتجيب اخر الموتور بسرعة وهتهلكة.


...
انا حبيت انقل التجربه للفائدة فـــــقــــط عشان اساعد كل اللى محتارين حيرتي.. اتمنى ماحدش يهاجمني.. انتقدوا كلامى زي ماتحبوا وعارضوه زي ماتحبوا بس هجوم عليا شخصيا زي مابشوف فى مواضيع بين الاعضاء ( فياريت بلاش ).
ربنا يبارك للى اشتراها.. واكيد هو مش غاوي تكييف ولا ناوي يحملها اعداد كبيره.. واكيد كل واحد شاري على قدر احتياجه من السيارة.. انا بخاطب اللى لسه ماشتراش وبنقله تجربه قصيرة جدا تساعده فى اتخاذ القرار المناسب له.

طيب يا جماعة ايه رأيكم في الديهاتسو تريوس بلاتنيوم موديل 2015 لأني بافكر اشتريها
هي 1500 سي سي ولكن حجمها اكبر من حجم السعة