المدير المصري والمدير الاجنبي...ألف سلامه

**Abdelrahman** · 28-10-2008 07:50 PM

المدير الأجنبي : يسعى لتثبيت قدم الشركة
المدير المصري : يسعى لتثبيت قدمه في الشركة

المدير الأجنبي : يحترم آدمية الموظف
المدير المصري: لا يعرف يعني ايه آدمية

المدير الأجنبي: يبدأ كلامه بجملة "أنا اعتقد"
المدير المصري: يبدأ كلامه بجملة "أنا قررت"

المدير الأجنبي: تتفانى في العمل يرقيك
المدير المصري: تتفانى في مدحه يرقيك

المدير الأجنبي: يضعلك خطة تتناسب مع قدراتك
المدير المصري: يضعلك خطة تتناسب مع خياله

المدير الأجنبي: يستمع لك
المدير المصري: يستمع لزميلتك في العمل

المدير الأجنبي: يثق فيك
المدير المصري: يثق في نفسه

المدير اجنبي: يتحدث معك بصراحة
المدير المصري: يتحدث معك بوقاحة

المدير الأجنبي: مسموح لك أن تشكيه
المدير المصري: مسموح لك أن تمدح فيه

المدير الأجنبي: يناقشك إذا طلبت الاستقالة
المدير المصري: يدفعك إلى الاستقالة

المدير الأجنبي: يعاملك حسب حالتك النفسية
المدير المصري: يعاملك حسب حالته المزاجية

المدير الأجنبي: يقول لك "Good Morning"
المدير المصري: يقول لك "انت جيت؟"

المدير الأجنبي : يفضل أن يمدحك أمام الاخرين
المدير المصري: يفضل أن تمدحه أمام الاخرين

المدير الأجنبي : يوم حلو .. يوم مر
المدير المصري : يوم مر ... يوم أمر

المدير الأجنبي : يراقبك
المدير المصري: يتجسس عليك

المدير الأجنبي: يطور أفكارك وينسبها لك
المدير المصري: يسرق افكارك وينسبها لنفسه

المدير الأجنبي : تطلب منه إجازة
المدير المصري: تترجى منه إجازة

المدير الأجنبي : يهنئك بالعيد
المدير المصري : يطلب منك العمل في العيد

المدير الأجنبي: يرى مستقبلك واعد
المدير المصري: يرى مستقبلك في ايده

المدير الأجنبي: يمسك أعصابه إذا اختلفت معه
المدير المصري: يمسك في زمارة رقبتك لو فكرت في الاختلاف

المدير الأجنبي: ينتظر سماع رأيك في العمل
المدير المصري: ينتظر سماع رأيك فيه

المدير الأجنبي: يثير أفكارك
المدير المصري: يثير أعصابك

المدير الأجنبي : يناقشك بالصوت
المدير المصري: يناقشك بالسوط

المدير الأجنبي : يريدك أن تقول "انا اقترح"
المدير المصري: يريدك أن تقول "انا أؤيد"

المدير الأجنبي: بيجيب مكاسب من أجلك
المدير المصري: بيجيب أجلك

المدير الأجنبي : كلمته زي السيف
المدير المصري: كلمته زي الزفت

المدير الأجنبي : بقراراته يرفعك
المدير المصري: بقراراته "يرفعك"

المدير الأجنبي: يعاملك باللتي هي أحسن
المدير المصري: يعاملك باللتي هي في رجله

المدير الأجنبي: لن يقرأ هذا الموضوع
المدير المصري: يقرأ هذا الموضوع ويرفدني

**ahmed azab** · 28-10-2008 08:52 PM

فعلا والله

**AlmAhAtmA** · 29-10-2008 09:42 AM

من خلال خبره 11 سنه مع مديرين اجانب و شهر مع مدير مصري
اؤيدك بكل قوه

و حسبي الله و نعم الوكيل

**أشرف العدوي** · 29-10-2008 09:59 AM

نسيت تقول ان معظمهم تافهين و لا يدرون ما يتخذون من قرارات
موقف مع مدير مصري ( الحمد لله خلصت منه ) كنا مسمينه شنخر

اتصل بيا باليل الساعة 8 و قالي يا اشرف بكرة الصبح تكون في فرع قنا
انا قولت يالهوي قنا ايه يا ريس الساعة دلوقتي 8 باليل و مش هلحق احجز في القطر
قالي : أتصرف دي تعليمات مجلس إدارة
قولته انا هعمل الي عليا و انزل اشوف في حجز و لا لاء
نزلت و لقيت الحمد لله حجز ذهاب بس قطار 10.55 باليل و صول 9 صباحاً
روحت خدت الشنطة و لبست و ركبت القطار المهم القطار عطل في اسيوط
لقيته بيتصل انت لسة ما وصاتش الفرع الساعة بقت 9.15
قولته يا باشا القطار عطلان في اسيوط انا اعمل ايه
قالي و هو بيزعق يا اشرف بطل دلع و شد حيلك عايزين نخلص !!!
مش عارف أشد حيلي أزاي قولته يعني انزل من القطر و اجري قدامه هو انا الي سايق
قالي مش عايز كتر كلام و 9.45 بالكتير تكون في الفرع !!!!
انا قولته ربنا يسهل و قفلت .
تعرفوا انا سايب الشركة بقالي حوالي 4 شهور و تقرير فرع قنا لسة معايا لحد دلوقتي محدش سألني عليه و لا حتى انا عملت ايه هناك .

على فكرة رحلة العودة كانت عذاب ( قنا الغردقة القاهرة )
احب اطلب اجازة كأني شتمته بحد من أهله
تيجي الساعة 5 الم حاجتى و مروح الاقيه يقولي انت رايح فين
بصراحة الواحد استريح منه
انا نفسي احطلكوا صورته بس خايف يجيلكوا اكتآب ( اصلي صورته و هو نايم في المكتب ) كان شكله مسخرة
و مصورة فيديو و هو بيرقص بردو في المكتب مع انه كان تخيييين قوي .