خد وهات ايه رايك؟ ايه هيه اكتر محافظة فيها اسوء سواقين واحسن سواقين

**Chucky** · 31-10-2008 10:08 PM

انا بعترض على رائى الناس اللى بيقوله ان الموضوع كده بقى نفسوى و الكلام ده

انا مثلا من القاهرة بس اقدر اقولك ان اسواء سواقة بشوفها من خلال المحافظات اللى روحتها و سوقت فيها هى سواقة القاهرة ( احنا بصراحة كتر خيرنا اننا عارفين نتحكم فى العربية فى عز الزحمة دى ) بس قواعد المرور عندنا منعدمة لدرجة مهولة... انا لما بقف لحد فى تقاطع و اقوله يعدى هو الاول بحس انه بيبصلى ولا اكنى كائن فضائى و راكب مركبة فضائية مش عربية عليها نمرة ملاكى القاهرة

اكتر محافظتين بحس انهم بيحترمه القانون و قواعد المرور هما الاسماعيلية و الاسكندرية ( فى الشتاء بس نظرا لان فى الصيف اغلب الاسكندرية بتكون مصييفين ) انا بنزل اسكندرية تقريبا كل اسبوع فعملت مقارنات كتير فى طرق السواقة فى الشتاء و الصيف و بجد بعرف اذا اللى كان سايق العربية هناك اسكندرانى ولا من القاهرة من طريقة سواقته قبل ما اشوف رقم العربية حتى

ملحوظة: انا مش بقول ان كل الناس هنا و فى اى محافظة تانية ينطبق عليهم المثل ده بس على الاقل الاغلبية العظمة

المشاركة الأصلية كتبت بواسطة ba7ary

موافق على ذلك تماما
وبالإضافة لذلك أقول إن أخلاقيات الزحام أصبحت هي السمة الغالبة لأغلب المصريين، تلاقي الكل ماشي مخنوق وقرفان ومش مركز وحاسس إن حقه ضايع في البلد فعاوز ياخده بدراعه على الأقل في السواقة
وحاجة غريبة كل ماتركب مع أي حد بيسوق- وأنا منهم على فكرة- تلاقيه قرفان من سلوكيات بقية اللي بيسوقوا ومن الغشومية وووووو...وده طبعا باستثناء فئة محدودة من عديمي الإحساس اللي مابتفرقش معاهم أصلا.....الفكرة أني بأسأل نفسي طب ولما كله متضايق من كله يبقى مين الصح
نهايته
كل مرة بانزل أسوق أقول وأنا طالع بالعربية ..اللهم سلم سلم

بص انا مش هقولك انى الانسان المثالى اللى عمرى ما بغلط فى السواقة

بس انا الحمد لله بحاول على قد ما اقدر التزم بقواعد المرور ( كل اصحابى بيتخنقه منه فى سواقتى علشان كده ) انا بجرى و بشد بالعربية و كل حاجة بس بعقل و فى نفس الوقت طول ما انا ملتزم بالقواعد

بس بجد زى ما قولت ساعات لما تبقى انت ملتزم تحس ان الناس بتبصلك اكنك كائن فضائى... و يحسسوك انك انت اللى غلطان

**mada121977** · 31-10-2008 10:51 PM

مع احترامى للجميع ومن غير ما حد يزعل ... اخوكم بفضل الله بقاله 10 سنين رايح جاى على الطريق الزراعى من المنصوره الى القاهره وخلال هذه المده لقيت ان اسؤ سواقين هم سائقى الميكروباص من القليوبيه يليهم سائقى الميكروباص من الغربيه و المنوفيه وسائقى البيجو من مدن دكرنس وبلقاس و المنزله من الدقهليه ده بالنسبه للاجره ... بالنسبه للملاكى اسؤ سائقين وعن جداره ومن غير زعل هما ملاكى الغربيه وخاصه المدينه اللى بتبدأ ب 60 من على الشمال ومفيش عندهم اى احترام لسائقى العربيات الاخرى على الطريق وتلاقيه بيزنق عليك اكن الطريق بتاعه لوحده (من غير تعميم ) يليهم ملاكى القاهره ثم ملاكى الدقهليه وخاصه نمر المنصوره ... بالنسبه للعربيات الربع نقل والنصف نقل فى برضه نقل الغربيه بجميع انواعه يحتل المركز الاول وعن جداره فى سؤ القياده ( اول مابشوف واحد فى مرايه العربيه عمال بياخد غرز يمين فى شمال وبيكسر على العربيات اللى ماشيه بعرف على طول انه نمر الغربيه والحمد لله بنسبه 90 % بيطلع توقعى صح ) وفى المركز التانى نقل دمياط ودول برضه من اسؤ السواقين اللى ممكن تقابلهم ومعندهمش احترام للغير على الطريق والمركز الثالث لسواقين نقل الشرقيه .
ومن غير ما حد يزعل وبرضه من غير تعميم للمره التانيه

**medomada** · 31-10-2008 11:07 PM

فى رأىى أسواء سواقين هما الإسكندرانيه , المسأله مش بس ذوق و أخلاق لكن انا لاحظت إن الإسكندرانيه هما يتصفوا أنهم بيسوقوا سواقه تعرض الغير للخطر, يعنى سواق ماشى بدون ما يراعى سلامه اللى حواليه بل بالعكس ممكن يعرضك لحادث لا قدر الله فقط علشان يعدى و بدون أدنى إهتمام ,و على فكره أنا باعرف الإسكندرانيه فى القاهره من سواقتهم و كتير أراهن اللى معايا إن العربيه الفلانيه إسكندريه و كلامى يطلع صح, مش عارف ليه لكن ده راىى.

**romeeoo** · 31-10-2008 11:43 PM

المشاركة الأصلية كتبت بواسطة mada121977

مع احترامى للجميع ومن غير ما حد يزعل ... اخوكم بفضل الله بقاله 10 سنين رايح جاى على الطريق الزراعى من المنصوره الى القاهره وخلال هذه المده لقيت ان اسؤ سواقين هم سائقى الميكروباص من القليوبيه يليهم سائقى الميكروباص من الغربيه و المنوفيه وسائقى البيجو من مدن دكرنس وبلقاس و المنزله من الدقهليه ده بالنسبه للاجره ... بالنسبه للملاكى اسؤ سائقين وعن جداره ومن غير زعل هما ملاكى الغربيه وخاصه المدينه اللى بتبدأ ب 60 من على الشمال ومفيش عندهم اى احترام لسائقى العربيات الاخرى على الطريق وتلاقيه بيزنق عليك اكن الطريق بتاعه لوحده (من غير تعميم ) يليهم ملاكى القاهره ثم ملاكى الدقهليه وخاصه نمر المنصوره ... بالنسبه للعربيات الربع نقل والنصف نقل فى برضه نقل الغربيه بجميع انواعه يحتل المركز الاول وعن جداره فى سؤ القياده ( اول مابشوف واحد فى مرايه العربيه عمال بياخد غرز يمين فى شمال وبيكسر على العربيات اللى ماشيه بعرف على طول انه نمر الغربيه والحمد لله بنسبه 90 % بيطلع توقعى صح ) وفى المركز التانى نقل دمياط ودول برضه من اسؤ السواقين اللى ممكن تقابلهم ومعندهمش احترام للغير على الطريق والمركز الثالث لسواقين نقل الشرقيه .
ومن غير ما حد يزعل وبرضه من غير تعميم للمره التانيه

+1000000000000

**adhamsabry51** · 13-11-2008 12:32 PM

شوفوا بقي يا جماعة و الله و من غير تحيز اسوا سواقه علي الأطلاق هما ملاكي القاهرة و الجيزه احنا في الصيف بنعرفهم من غير ما نشوف النمر دايما تلاقيه بيزنق و يحشر نفسه في اي حته و مافيش احترام لتقاطعات الطرق و تديله اشاره و لا كانه شايفك و لو جيت تخش الحاره اللي جنبك حتي و انت مدياه اشاره تلاقيه يكبس و يزنقك و مالوش دعوه بالشارات خالص و ده طبعا بالأضافه الي قاعدتهم المشهوره البوز بيز احنا عندنا برضه في نسب غلاسه بس مش زيهم بصراحه

**fast_car** · 13-11-2008 10:06 PM

الاسوء عن تجربة الاسكندرية بيجروا على طول فى كل المواقف من غير مراعاة للاخرين ودى طبعا مش شطارة وكمان لما بتقفل قوى والعربيات بتزحم بتلاقيهم لايصين دة بالنسبة للملاكى لكن الاجرة مشاء الله لادا عاملة شغل جامد تلاقى السواق من دول بيرمى من غير ما يبص حتى فى المريات تحت مبدا اللى خايف على نفسة يوسع و طبعا عضم العربية مساعد
لكن بصفة عامة سواقين القليوبية اكتر عجل على الطرق كلها فى مصر مشاء الله المحافظة دى بطلع سواقين قلبهم جامد لكن منهم اللى استاذ سواقة ومنهم اللى بيستعرض على اللى حوالية

**م.احمد زكريا** · 17-11-2008 09:03 AM

سواقين الاسكندرية بحس انهم متهورين حبتين وبالذات التاكسيات

**hossaam** · 17-11-2008 11:28 AM

في رأيي الشخصي..

طالما بقيت اجراءات استخراج الرخص
واختبارات السواقة على وضعها الحالي في كل المحافظات
وكذلك سوء تخطيط الطرق والاشارات...واللي هو سمة عامة
في كل مكان..اذا هنفضل نشوف عجايب في السواقة في كل محافظة

..بس يا ترى ده ذنب مين بالضبط!!

**abou_ruqi** · 17-11-2008 11:50 AM

يا جماعة كل واحد بيسوق حلو في بلده و لما يسافر لمحافظة تانية اهلها بيقولوا عليه حمار

يعني لما تنزل اسكندرية حتعرف فعلا ان العربيات القاهرة والجيزة سواقينها حاسين ان الناس كلها ماتت وهما لوحديهم زي الفيلم بتاع ويل سميث i am legand كآن الوبا كل كل الناس خلاص

واظرف حاجة في اول صيف بعد التوسعة كان كل يو تيرن علي الكورنيش فيه واحد قاهرة او جيزة لابس فيه !!

بتسوق في بلد غريبة ، بتجري ليه وانت مش عارف في ايه بعد الملف ؟؟؟

واعتقد اني لما بنزل القاهرة ممكن تظهر مني تصرفات غريبة علي آهل البلد وهكـذا

انما اظرف حاجة قريتها في الموضوع ان الاسكندرنية لا يلتزمون بالحارة ، هو حضرتك عايش في سويسرا ؟؟؟؟ هو في حد في اي محافظ تانية عنده حارات اصلا ؟؟؟؟ الحارات للزينة في كل شوارع مصر