الموضوع: خد وهات ايه رايك؟ ايه هيه اكتر محافظة فيها اسوء سواقين واحسن سواقين

أفضل سواقين أكيد في القاهرة .. و أسوأ سواقين في القاهرة برضه !

هي القاهرة إيه غير مجموعة متناقضات مضروبة في الخلاط ؟

بالنسبالي اسواء سواقين وكتير شوفتهم في اسكندرييييييييييييييييييي ييييييييييييييييييييييييي يية

الاسماعيليه ناس محترمه جدا جدا

صدقني كل المحافظات زي بعض أسوء سواقين طبعا هما سواقين الميكروباصات والتاكسيات ماعدا قلة محترمة وفاهمة في السواقة وأظن أن طبعا الافضل في القاهرة بحكم كمية العربيات الماهولة اللي فيها وكترة السواقين الكويسين

فى رأييى ان افضل سواقين فى مسألة التحكم فى سياراتهم موجودين فى القاهرة، لكن فى مسألة احترام من حولهم فالأمر فى القاهرة يتراوح من قمة الذوق الى قمة قلة الذوق، لكن فى المناطق الريفية تجد معظم سواقين الملاكى مبيعرفوش يسوقوا وخوافين ومعظم سواقين الميكروباص سواقين هم البلطجة بعينها بشكل يعتبر معاه سواقين ميكروباصات القاهرة ملائكة

اكتر ناس بحب سواقتهم هم محترفى السفر على طريق مصر اسكندرية الصحراوى، ملاكى ونقل وميكروباصات واتوبيسات تلاقى منهم شغل عالى اوى، مشى فى نص الحارة واشارات وتخطى بالعقل واللى منهم بيجرى مش بيضايق حد، لكن طبعا الطريق فى الصيف بيبقى اهبل جدا لما يتملى مصطافين مالهمش لا فى السفر ولا فى سواقة الطوالى وتلاقى العجن اشتغل

الاسكندرانية بحس انهم طيبين ومش مستعجلين، ولما كان المرور شادد حيله فى اسكندرية كانوا قمة فى النظام والتحضر لدرجة انك تحس انك سايق فى اوروبا، بس طبعا كله بقى فى الكلتش ديلوقتى بعد ما المرور سيب العملية هناك، بس لحد ديلوقتى اكتر حاجة بتعجبنى فى اسكندرية ان عند الالتفاف من طريق الى طريق تلاقى اللى مستنيين يلفو بيقفوا فى حارة واحدة فقط لحد ما الاشارة تفتح حتى لو وصل طول طابور المنتظرين الى كيلومتر ومبيقفلوش طريق اللى ماشى طوالى، بس مشكلتهم انهم لما الاشارة بتفتح العربية اللى قدامك سواقها مش بيفكر ينقل الفتيس غير بعد ما تكون العربية اللى قدامه مشيت بتاع 50 متر، زى ما السواقين كبار السن بتوع التاكسيات القديمة فى القاهرة بيعملوا وبالتالى على ما انت توصل لأول الاشارة بتكون قفلت تانى

السواقة فى بورسعيد كانت متعة لأن البلد كلها كانت فاضية وبالتالى محدش بيغلس على حد،ومثلها دمياط، بس شوارع بورسعيد احسن بكتير من شوارع دمياط، اما السواقة فى المنصورة وطنطا فمحسيتش انها فارقة عن القاهرة، الاسماعيلية والسويس منظمين والكثافة فيهم قليلة وبالتالى الدنيا مافيهاش مشاكل،دمنهور فاضية وشوارعها ضيقة وبالتالى انت مجبر على المشى بالراحة بس عندهم عادة اهل الأرياف بتاعه التكتل على مزلقان القطار من الاتجاهين وسد طريق القادم من الاتجاه المقابل وبالتالى لما المزلقان يفتح بعد مرور القطار يحتاج فض الاشتباك بين السيارت القادمة من الاتجاهين فترة قد تمتد احيانا لحين وصول القطار التالى

انا رايى اوحش سواقة فى مصر هما سواقين المنزلة ( دقهلية) مجانين بجد يعنى بص الصراحة محترفين