الموضوع: لاخواننا اللى ناويين يرخصوا اليومين دول(تجربه شخصيه)

السلام عليكم ورحمه الله وبركاته.
الساده مشرفى المنتدى العظيم انا كتبت الموضوع دا فى قسم المتسوبيشى لمطابقته لنوع السياره الخاصه بالموضوع فأن ارتأيتم ان ينقل الموضوع للمنتدى العام فتفضلوا مشكورين لتعميم الاستفاده.
انا كان لى موضوع لسه من يومين بأسال فيه عن مصاريف ترخيص سياره لانسر 1600اوتوماتيك كلاسيك خليجى وربنا اكرمنى ولقيت ناس محترمه زى الاستاذ (حسن خليل) رد على فى حدود معرفته وطبعا انا باشكره.ودورت فى المنتدى مالقيتش حاجه قريبه. ففكرت للاستفاده العامه للاعضاء انى اكتب عن مصاريف الترخيص وخصوصا ان انا رخصت النهارده والحمد لله.
الترخيص مدته 3 شهور فقط واخذت نمر مؤقته لعدم وجود نمر جديده.اليكم التكاليف:

1- 30 جنيه ثمن الاستمارات
2- 95 جنيه التامين الاجبارى(لمده سنه واحده )
3- 250 جنيه الضريبه (برضه سنه واحده)
4- 90 جنيه تمن اللوحات الجديده (اللى ما اخذتهاش !!!!!!)
5- 60 جنيه ضريبه ترفيه ( لامتلاكى سياره ملاكى اخرى !!!!!)
6- 20 جنيه تأمين لوحات (مش عارف اللوحات المؤقته ولا الجديده؟؟)
7- 80 جنيه شهاده بيانات (لان العربيه خليجى)
8- 100 اكراميات (50 داخل المرور لزوم حلاوه العربيه و50 لمندوب المعرض اللى عمل كل حاجه)

يعنى العمليه كلها اتكلفت 725 جنيه بالاكراميات وطبعا دا لان ربنا رحمنى والسياره الخليجى (الكويتى) بتيجى بتجهيزات مميزه منها طفايه الحريق والمثلث العاكس وشنطه الاسعاف اللى بينص عليهم قانون المرور الجديد واللى تكاليفهم ممكن تكون فى حدود 200 جنيه.
ارجو ان يستفيد من هذا الموضوع كل اعضاء المنتدى المقبلين على الترخيص الجديد او التجديد.

المشاركة الأصلية كتبت بواسطة lancer92

ألف ألف مبروك ، ربنا يبارك لك فيها و يبعد عنك شرها.
بس عندى سؤال ، هى شنطة الأسعاف اللى جاية مع العربية قبلوها عندك ، أصل انا عربيتى 1600 اتوماتيك هاف سبورت كويتى 2008 ، و طبعا فيها طفاية و شنطة اسعاف و مثلث زيك ، و لكن لما رخصت ما كانتش الحاجات دى مطلوبة (عدا الطفاية) و شنطة الأسعاف ماهياش من المعدن ولا حاجة ، فهل كده تغنى عن شراء الشنطة اللى بيقولوا هاتتحدد و لا لأ ، و بعدين هل اعتبروا المثلث مطابق للمواصفات ؟
و شكرا

الف شكر يا باشا, انا بصراحه ماحدش كلمنى ولا على شنطه اسعاف ولا مثلث ولا طفايه لان بصراحه يمكن انا كنت باتكلم معاهم بلغه مختلفه عن لغه حضرتك (لغه اللحلوح !!!!!!) اكيد حضرتك تعرفها وبعدين ياباشا فيه كلام كتير دلوقتى عن احتمال الغاء فكره شنطه الاسعاف لان الشكاوىو(الاصوات العاقله) تعالت الايام الماضيه مطالبه باعاده النظر فى موضوع شنطه الاسعاف وذلك ليس لثمنها ولكن لعدم جدواها وصعوبه تحقيق الهدف المرجو من ورائها وذلك لجهل معظم الشعب بمبادىء الاسعافات الاوليه(مش قلت لك اصوات عاقله) فالحكومه بتفكر جديا فى الغائها مع استبدالها برسوم لتحسين مرفق اللاسعاف(يعنى هى هاتتنازل عن عبقريتها ببلاش؟؟!!!!!
اما بالنسبه للمثلث فماحدش يقدر يتكلم عليه نص كلمه دا يابانى ياريس وبينور فى الضلمه احسن من كهرباء الحكومه نفسها .